Myìdàm Htoq Lé Yhûmsîng Garai Chamchyuîyuì Kut Pyâm É Hkyô
24
Wú keq, haû Yhûmsîng Garai gi, myìdàm htoq lé lhoqhâm pyám luî,chamchyuîyuì kut pyám râ nghut lhê;
Yhang gi, haú lé mau hpan myì hpuq kut pyám luî,
haú má nyi é bang lé lhoqpyo pyám râ nghut lhê.
2 Haú hkûn, hkyangjong hpó gi, mâyû byù su,
yhûmsîng hpó gi, duìnhâng zoshâng su,
yhûmsîng myhí gi, duìnhâng zoshâng myhí su,
ung zo sû gi, zè wuì sû su,
ngho sû gi, chyi sû su,
chyîn dap sû gi, chyîn yhûmsîng su dùt râ nghut lhê.
3 Haû myìdàm htoq gi, bànshoq yhang hâm pyâm byùq mù,
lhúnglháng chamchyuîyuì dùt byùq râ nghut lhê.
Hkâsu mù gâ le, dang haû gi, Yhûmsîng Garai taî tô é nghut ri.
4 Myìdàm htoq gi, kyuq huí mù, nyhuî ló ri;
mingkan htoq gi, wum nyhóm mù, nyhuî ló ri;
myìdàm htoq má wàq toq huî é byù gi, wum nyhôm ló bê nghut ri.
5 Myìdàm htoq lé gi, haú má nyi é byu pê èq agòt a-û kut pyám bê nghut ri;
yhángmòq gi, târâ pé lé a cháng kô é htoq agó,
cháng ra târâ lé lhoqshut kômù,
ahtum abyùq é dangshikaq lé lhoqhpyoq pyám bekô nghut ri.
6 Haû mù, myìdàm htoq gi, nhinghkûn èq lhoqjôm pyám ri;
haú má nyi é bang gi, yhángmòq é mara wò yù ra kôrâ nghut lhê.
Haû mù, myìdàm htoq má nyi é bang gi, nyé gyó pyám mù,
myìt gyó tô é bang gi, shaû byùq ri.
7 Tsibyiq wing asik gi, kyuq huî byùq é htoq agó, tsibyiq nuî gi, nyhuî ló ri;
gabú myìt bo é bang bànshoq gi, myìt nò-kying kyîng bum ri.
8 Mying ngón chapchéng htê zîm byùq bê nghut ri;
hkye kún ye ngón bâng é garu garín htê gi, nô byùq mù,
gabú é tíng htê gi, htê a htoq byùq lo nghut ri.
9 Yhángmòq gi, mahkôn hte èq tsibyiq wing shuq lo kôrâ a nghut;
îhpe gi, shuq bâng é matú hkô byùq râ nghut lhê.
10 Htên byòq byùq bê wà mó gi, chamchyuîyuì dùt tô ri;
yhûm hkangmó mâ é hkum gi, ó a wó wâng loshoq myhî tô ri.
11 Yhángmòq gi, tsibyiq wîng é yánmai, wà hkyô pé má wùt ngau nyi bum akô;
gabú byam chyu hkyô bànshoq gi, mauchut tuq dùt byùq mù,
nguì ngón hkyô bànshoq gi, myìdàm htoq mai byùq ló byùq bê nghut ri.
12 Haû wà mó gi, htên byòq bum to bê nghut mù,
hau é hkum pé lé gi, ajàp azo bàt hpyi bum to bê nghut ri.
13 Haû mù, haû gi, tsanlun gàm lé bàt nhuq pyâm é hkûn su le,
tsibyiq shi hpyoq yu é htâng má agyó jòq tô é hkûn su le,
myìdàm htoq mâ é a-myû wui chyáng dùt to râ nghut lhê.
14 Nyi myìt gyó to bang gi, yhûmsing é htê lhoqmyhâng mù, gabú garu kôrâ nghut lhê.
Yhángmòq gi, buìwàng hkyama mai, haû Yhûmsîng Garaî é kô làm hkyô lé taî pyô kôrâ nghut lhê.
15 Haû mù, buìhtoq hkyam mâ é bang gi, haû Yhûmsîng Garai lé hkya-on kúngtôn keq;
wuìshuq lung-aû mâ é zinlóng pé má nyi é bang gi,
Isira-elaq é Garai Gasang, haû Yhûmsîng Garaî é myìng lé hkya-on wàq toq keq.
16 Ngá-mòq gi, “Díngmán Su chyáng hpungwup shingkang bo nyì sháng gàq.” ga,
myìdàm htoq ló htâng é mai hkon myhíng kô é lé wó gyô ri.
Nghut kôlhang, ngò gi, “Ngò myung kyuq ri; ngò myung kyuq ri!
Ngò dingnyé wó râ nghut lhê!
Myìt goí bang gi, myìt goí nyi ri nhung!
Myìt goí bang gi, myìt goí é hkyô kut nyi bum ri nhung!” nghû taî é nghut lhê.
17 Myìdàm htoq mâ é byu pé ê,
gyùq chiq hkyô, donghkong eq dumzo pé gi, nang lé láng nyi ri.
18 Haû gyùq chiq é htê mó mai hpang é sû gi,
donghkong má byìt gyó wâng râ nghut lhê;
haû donghkong mai wó dô dòq hpang é sû gi,
dumzo má myí râ nghut lhê.
Hkâsu mù gâ le, mauhkûng mâ é wuìwúm hkohot pé hpóng bê nghut mù,
myìdàm htoq é a-pûn awang pé gi, nún bê nghut ri.
19 Haû myìdàm htoq gi, byòq byùq bê;
myìdàm htoq gi, gòq hâ byùq bê;
myìdàm htoq gi, gyai yhang nún byùq bê nghut ri.
20 Myìdàm htoq gi, î shuq wùt sû su a-pyî abàt dùt luî,
lai èq mùt tâng nyi é zúm su lhoi lhoi dùt nyi ri;
haú mâ é shut é mara gi, hau é ahtoq má lûm lai mù,
haû gi, lèqbàt to luî, hkâ-nhám le dum wó toq lô râ a nghut lo.
21 Haú buìnyì má, haû Yhûmsîng Garai gi,
mauhkûng htoq mâ é wum-o a-tsam pé lé, myhang é jowò má,
myìdàm htoq mâ é hkóhkam pé lé, myìdàm htoq má, mara dam byi râ nghut lhê.
22 Yhángmòq gi, htóng byu pé lé htóng má lhûng tô é su,
rahá tsîng yu é hui luî,
htóng hkaû má lhûng pyâm é hui mù,
buìnyì myo myo lai jáng,
mara dam byî é hui kôrâ nghut lhê.
23 Haú hkûn, lha-mó gi, gùng-yui é hui luî, buì gi, hoq hpu râ nghut lhê;
hkâsu mù gâ le, haû Wum-o a-tsam dìk shoq bò Sû Yhûmsîng Garai gi,
Zi-un Bùm htoq, Yerusalem wà mó má ùp mù,
haú mâ é sûwún wui é hí má hpungwup shingkang bo nyì râ nghut lhê.