Turuq Wà Eq Sêng É Myìqhtoi Dang
23
Turuq wà eq sêng é myìqhtoi dang gi, a-ô mâ é eq rajung za nghut ri.Tarishi é wuìsanghpo ê, ngaùhkyûng ngaùyang kut àq!
Hkâsu mù gâ le, Turuq wà gi, lhoqhtên pyâm é hui bê nghut luî,
yhûm le, guhkan le a jòq byùq lo nghut ri.
Lùdang shî gi, Kuprua zinlóng mai jé é nghut ri.
2 Wuìshuq lung-aû mâ é wuìsanghpo hkâng bâng èq wó sut nhang é,
Sidon wà mâ é wuìloq kut bang nghut é,
zinlóng byu pé ê, zim za nyì keq.
3 Shihora langhkaû mâ é kyôshi myuishi eq Nile Wuìlàng yàm mâ é kyozo muilhum gi,
Turuq wa é matú, wuì mó mai lo é a-myàt nghut mù,
yhang gi, a-myû wui é wuìloq kut achyûng dùt bê nghut ri.
4 Wuìshuq lung-aû mâ é gingtíng jowò nghut é,
Sidon wà ê, hoq hpû nyì àq;
hkâsu mù gâ le, haû wuìshuq lung-aû gi,
“Ngò gi, zo hkû nò le a nò, zo le a hkû;
ngò gi, yùqzo byìzo lé le a hku kô é nghut lhê.” ga taí bê nghut ri.
5 Lùdang haû Egutuq ming má jé é hkûn,
haú ming bang gi, Turuq wà má dùt é hkyô eq séng luî, yón hpuzo kôrâ nghut lhê.
6 Tarishi wà shut laî dàp ê keq;
zinlóng mâ é byu pé ê, ngaùhkyûng ngaùyang kut keq.
7 Shî gi, wà xau wà myí nghut é eq,
shî mâ é byu pé gi, mau we má ê nyi byùq é,
hkye kún ye ngón laî lo é núngmòq é wà mó nghut lhê, a nghut kó lhí?
8 Turuq wá mó gi, hkóhkâm jánmaú byî é nghut mù,
yhâng é wuìloq kut bang gi, zau wuî nghut luî,
yhâng é wuìloq kut bang gi, myìdàm htoq má myìng hu bang nghut lhê wá,
yhang lé htuqhtîng é hkyô shî gi, ó yùq hen é lhú?
9 Haû Wum-o a-tsam dìk shoq bò Sû Yhûmsîng Garai kut é nghut ri.
Haû gi, nghutbûn é xânghpoq nge wó hkyô bànshoq lé agòt a-û kut pyám râ eq,
myìdàm htoq má myìng hû é bang bànshoq lé lhoqhpoî pyám râ matú nghut ri.
10 Tarishi mâ é byìzo ê,
Nile Wuìlàng su náng é mau gón má sô lhîng àq;
ó yùq le nàng lé hkûm zìng râ hkyô a jòq lo nghut ri.
11 Haû Yhûmsîng Garai gi, wuìshuq lung-aû htoq má Yhâng é lòq lhâm kat mù,
mîngdán pé lé lhoqkyuq nhán bê nghut ri.
Yhang gi, Hkananb mau mâ é gingtíng jowò pé lé lhoqhtên pyám râ matú,
hkunmó hkyó bê nghut ri.
12 Hau htoq agó, Yhang gi, “Sidon mâ é zo-myi gyíng ê, ahkuî nàng htên gyòp bê nghut mù,
htâng má myang gabú râ a nghut lo.
Toq mù, Kupru má dàp ê àq;
haú má lháng, nàng, bánno hkyô myang hô râ a nghut.” ga taî ri.
13 Babelon byu pê é maumyî lé wú wú keq;
byù haú bang gi, ahkuî a nyi byùq lo nhung!
Asuri byu pé gi, haú mau lé, yòsô zè pê é nyì jang kut pyám luî,
haú mau bâng é mâchya pé lé saî toq mù,
haú mau mâ é gingtíng jowò pé lé lhoqhpyoq hpyi pyám luî,
hau mau lé lhoqhten lhoqhpyoq pyám bê nghut ri.
14 Tarishi mâ é wuìsanghpo pé ê, ngaùhkyûng ngaùyang kut keq;
núngmòq é gingtíng jowò gi, lhoqhtên pyâm é hui bê nghut ri!
15-16 Haú ahkyíng jé jáng, hkóhkâm rayùq é i-pyàt myhó nyhit xê zàn yhang, Turuq wà mó lé tô-myhî pyám kôrâ nghut lhê. Nghut kôlhang, haû nyhit xê zàn htáng jáng, Turuq gi,
“Ô èq le tô-myhî pyâm é shiwa myhí ê,
tíng yu wàq luî, wà mó má sô ròt àq;
nàng lé dum bun kó sháng gàq,
ngón shoq tíng bàt luî, mahkôn myo myo hkôn aq.” ga shiwa myhí jihkyang sang é eq rajung za dùt râ nghut lhê.
17 Nyhit xê zàn haû laî é htâng má, haû Yhûmsîng Garai gi, Turuq lé lé kum râ nghut lhê. Yhang gi, shiwa myhí kut é shut dum taû lhing ló mù, myìdàm htoq mâ é mîngdán bànshoq èq yhâng é wuìloq kut râ nghut lhê. 18 Nghut kôlhang, yhâng é a-myàt eq yhang wó ho yu é pé gi, haû Yhûmsîng Garaî é matú gótû san dùt byùq râ nghut lhê; haú pé lé hkong to râ le a nghut, myì má myhup to râ le a nghut. Yhâng é a-myàt gi, haû Yhûmsîng Garaî é hí má nyi nyì bang, gyi gyi dau dau myàng zo râ eq gè réng é mèbu myang wùt râ matú dùt byùq râ nghut lhê.