Yerusalem Wà Mó Eq Sêng É Myìqhtoi Dang
22
Shing-rán Langhkaûa eq sêng é myìqhtoi dang gi, a-ô mâ é eq rajung za nghut ri.Náng é rawà gón bang gi,
haî dùt mù luî, yhûmhkûng htoq pé má dòq nyi bum akô lhú?
2 Garu garín htê byíng to mù,
gabyông nyi bùm luî, hkye kún ye ngón nyi é wà mó ê,
náng chyáng sat huî é bang gi, sham èq sat huî é le a nghut,
majan má shî kô é le a nghut.
3 Náng é zau wuî bànshoq bang gi, rahá hpâng bekô;
yhángmòq gi, lai lháng a chûng râ é za chyup yu é hui bekô nghut ri.
Chyup yû huî é, náng é byu pé bànshoq bang gi,
gye pé eq we shoq hpâng bekô nghut kôlhang, rahá tuî kyop é hui bekô nghut ri.
4 Haû mù, ngò gi, “Ngo lé hkâlhing wú kó;
ngò wum kat ngaù râ nghut lhê.
Ngá é byu pé htên byòq nyi bùm kô é yánmai,
ngo lé nhiktîng é hkyô hkâ shi-kùt kó.” nghû taî é nghut lhê.
5 Hkâsu mù gâ le, Wum-o a-tsam dìk shoq bò Sû Yhûmsîng Garai nghut é, haû Yhûmsîng gi,
Shing-rán Langhkaû haú má,
garu garín ga gabyông é, nâng pyeq pyâm é eq gyùq chiq mó htoq é buìnyì tô tô ri;
haú nyí má, wàhkûm hpyoq hpyi pyâm é eq
bùm pé shut ngau htoq e ló bum é dùt râ nghut lhê.
6 Elam byu pé gi, myoshi htuq yu chûng mù,
yhángmòq é gyèlhêng ji bang eq myang ji ji bang le mù, lé lo ri;
Kira wà byu pé gi, gòlong lé chung htoq shit akô nghut ri.
7 Náng é ngón dik é langhkaû pé má gi, gyèlhêng pé byíng zan to mù,
myang ji ji bang gi, wà hkum pé má jowò hkyô tô akô nghut ri.
8 Yhûmsîng gi, Yudaq lé mâgum é hkyô lé huî sêng pyám bê nghut ri.
Nàng gi, haú nyí má,
Yòso Mhanpúng mâ é Yhûm má jòq é shâm lhâm lé tu wú bê nghut ri.
9 Dawiq Wà mó mâ é wàhkûm myo myo but dông tô é lé,
núngmòq myàng bê nghut mù,
A-ô Wuìhtum má wuì tîng pyîng to bekô nghut ri.
10 Núngmòq gi, Yerusalem wà mó mâ é yhûm pé lé nghap wú mù,
wàhkûm lé lhoq gingtíng râ matú yhûm pé lé hpyoq hpyi pyám bekô nghut ri.
11 Núngmòq gi, Wuìhtum Xau mâ é wuì lé pê yù râ matú,
wàhkûm í lhûm é gyoro má wuì tíng dong saî akô;
nghut kôlhang, núngmòq gi, haú hkyô dùt nhâng Sû lé a tu wú é htoq agó,
góhkûn mai haú hkyô hen to Sû lé, haî su a ngàm kut bekô nghut ri.
12 Haú buìnyì má, Wum-o a-tsam dìk shoq bò Sû Yhûmsîng Garai nghut é, haû Yhûmsîng gi, núngmòq lé,
ngaù byi ngaù nhap htoq é, ngaùhkyûng ngaùyang kut é,
xâm nyhâm pyâm é eq jimê tû wùt é kut keq ga taí bê nghut ri.
13 Nghut kôlhang, wú keq, gabú hkyô eq hkye kún ye ngón nyi é hkyô,
no sat sau sat mù, sho zô é eq tsibyiq wing shuq nyi ashi kô myhî-nhung!
Núngmòq gi, “Nàpmá ngá-nhúng shî berâ nghut é yánmai,
zo sháng shuq sháng!” ga taî akô nghut ri.
14 Haû Wum-o a-tsam dìk shoq bò Sû Yhûmsîng Garai gi, ngo lé, “Núngmòq shi é buìnyì jé shoq, yubàk mara shí lé hkyut pyám byi râ a nghut.” ga taî htoq kyô ri. Haû gi, Wum-o a-tsam dìk shoq bò Sû Yhûmsîng Garai nghut é, haû Yhûmsîng taî é nghut bê.
15 Wum-o a-tsam dìk shoq bò Sû Yhûmsîng Garai nghut é, haû Yhûmsîng taî le,
“Ê mù, hkóhkam yhûm lé wú zúng é sùt zum sû Shebina lé,
16 ‘Nàng gi, shî má haî kut lhê lhú?
Shî má, náng é matú lùp kyung râ ahkáng ó byî é lhú?
Náng é lùp lé, myhang é jang má kyûng nyi lhê lhú?
Nàng bánno râ jowò lé, lungmó zîng má kyûng nyi lhê lhú?
17 Wum-o mó bò sû byù nàng ê, sidìq àq;
haû Yhûmsîng Garai gi, nang lé kyaq zing yù mù, dú tâng htoq pyám râ nghut lhê.
18 Yhang gi, nang lé dûn rhîn líng yû mù,
gyaí lam é mau má dú hâng kat râ nghut lhê.
Náng é yhûmsîng hpô é yhûm má hoq lhoqhtoq é sû ê,
nàng gi, haú mau má shî râ nghut lhê;
náng é hpúng bo é gyèlhêng pé gi, haú mau má jòq gyó to râ nghut lhê.
19 Ngò gi, náng é ayá hkyô pyám byi râ nghut mù,
nàng gi, náng é ayá mai lâng hkyô pyâm é hui râ nghut lhê.
20 Haú nyí má, Ngò gi, Hiliki-a é yhang zo, ngá é duìnhâng zoshâng Eli-akim lé ji yù mù, 21 yhang lé náng é buhîng hut luî, náng é hpyihit hit byi mù, nàng ùp é ahkáng àp byi râ nghut lhê. Yhang gi, Yerusalem wà mó má nyi é bang eq Yudaq maû é îwa dùt râ nghut lhê. 22 Ngò gi, yhâng é gòqsân má, Dawiq é yhûm mâ é zòqshi ke byi râ nghut mù, yhang hpóng bê é lé gi, ó yùq le a wó myhi, yhang myhi bê é le gi, ó yùq le a wó hpóng râ nghut lhê. 23 Ngò gi, yhang lé, jòqtoq zu bàt tsuq tô é su, gingtîng é jowò má nyhi to râ nghut mù, yhang gi, yhâng wâ é yhûmbyù wui é matú, xânghpoq nge wó é tángmyhâng dùt nyì râ nghut lhê. 24 Yhâng é yhûmbyù wui é hpungwup shingkang nghut é, zodù wuì eq awùt ashín pé, tiq é auhkoq zê bànshoq eq yambú htuqtúm pé bànshoq gi, yhâng chyáng nui dàp to râ nghut lhê.’ nghû ê taí aq.” gâ ri.
25 Haû Wum-o a-tsam dìk shoq bò Sû Yhûmsîng Garai gi, “Haú buìnyì má, gingtîng é jowò má bàt tsuq tô é jòqtoq zu gi, bùt htoq lô luî, bàt hkyop pyâm é hui mù, byìt gyó byùq râ nghut lhê; haú má lhâng tô é wòlai gi, zân hpyit pyâm é hui râ nghut lhê.” ga taî pyo ri. Haú hkyô lé gi, haû Yhûmsîng Garai taî to bê nghut lhê.