Babelon Lé Htuqhtîng É Myìqhtoi Dang
21
Wuimau yàm mâ é Yòsoa eq sêng é myìqhtoi dang gi, a-ô mâ é eq rajung za nghut lhê.Mau chyin gyè gi, maupyî mai mùt lo é htan é laìdun su,
gyai yhang gyùq chiq râ dùt é mau nghut é, yòso mai lé ri.
2 Gyùq chiq hpo shing-rán lé ngò myang ri; haû gi,
myìt goí bò sû gi, myìt goí bo é dông kut nyi ri; lhoqhten lhoqhpyoq sû gi, lhoqhten lhoqhpyoq nyi ri.
Elam byu pé ê, htim keq! Medi byu pé ê, lóm to keq!
Ngò gi, wà shi é yánmai yón ngau é pé bànshoq lé lhoqzîm pyám râ gâ é nghut lhê.
3 Haû mù, ngò gi, hpyidum no dik luî,
zo hkû nò no é myiwe myhí su no hpû nyì bê nghut lhê.
Ngò gi, a wó gyo loshoq no hpu mù,
a myàng loshoq gyùq nán byùq bê nghut lhê.
4 Ngá é sing guq htûng nyì mù,
gyùq myìt gi, ngo lé kòk kòk nán nhang ri;
ngò myìt tuî nyi é chutshúm zó gi,
ngá é matú gyùq chiq hpo mó dùt bê nghut ri.
5 Yhángmòq gi, zohpoq htung to kômù,
taphkang htû lé hkângb to kôluî,
zô kún shuq kún bekô nhung!
Zaugun wuì ê, núngmòq toq keq;
gòlong pé má xû but keq!
6 Haû Yhûmsîng Garai mai ngo lé taî é gi,
“Ê mù, wú zúng sû rayùq nyhi to luî,
yhang myang é lé hkyang lo shit nhâng àq.
7 Yhang gi, myang í du lâng é gyèlhêng ji bang,
loze ji bang eq gola-uk ji bang lé myàng jáng,
rago yhang machyâ sháng gàq.” gâ ri.
8 Haú hkûn, wú zúng sû gi,
“Ngá é yhûmsîng ê, ngò gi, nyí nyí buì buì mâchya má yàp wú nyi é htoq agó,
ngò zúng é jowò má myìn wuì nyi tô é nghut lhê.
9 Wú keq, myang razúm èq she é gyèlhêng jî é byu rayùq jé lé ri.
Yhang gi, ‘Babelon lêng gyòp bê, lêng gyòp bê!
Yhâng é hparà pê é alhô pé bànshoq gi,
myigùng htoq má gyòp lèq to bu-nhung!’ ga tû taî ri.” ga wùt garû taî ri.
10 Chyârâng má su batnhuq huî é, ngá é byu pé ê,
ngò gi, Isira-elaq é Garai Gasang,
haû Wum-o a-tsam dìk shoq bò Sû Yhûmsîng Garaî chyáng mai wó gyô é lé,
núngmòq lé taî kyo bê nghut lhê.
Edom Lé Htuqhtîng É Myìqhtoi Dang
11 Dumac eq sêng é myìqhtoi dang gi, a-ô mâ é eq rajung za nghut ri.
Byù rayùq gi, ngo lé, Se-ira mai,
“Wú zúng sû ê, myín ahkyíng a lai shi lhú?
Wú zúng sû ê, myín ahkyíng a lai shi lhú?” ga wùt myî ri.
12 Haú hkûn, wú zúng sû gi,
“Nàpkyó nàpsûn jé lô bê; myín le dum jé lô bê nghut ri;
núngmòq myi naû jáng myi keq;
dum taû lò keq.” ga tû taî ri.
Arabi-a Lé Htuqhtîng É Myìqhtoi Dang
13 Arabi-a eq sêng é myìqhtoi dang gi, a-ô mâ é rajung za nghut ri.
Arabi-a mau mâ é yòso mhanpúng má wàp xuq mù nyi é,
Dedan wà byù wuì mâ é wuìloq kut bang ê,
14 núngmòq gi, wuìshit huî é bang lé wuì yu lé byi keq;
Tema mau má nyi é bang ê,
núngmòq gi, wó hpang lùt lò bâng é matú zoshuq yu lé byi keq.
15 Haú bang gi, shámsó mai le,
she tô é shâm mai le,
lâng htung tô é lai mai le,
wuî dik é majan pá mai le, hpang lo é bang nghut akô nghut ri.
16 Haû Yhûmsîng, ngo lé taî é gi, “Zui hpau yù sû ahkyíng lé hkyak nghap é eq rajung za, razàn gyoro má, Kedara é xânghpoq nge wó hkyô bànshoq byùq byùq râ nghut lhê. 17 Nyi myìt tô é lai bik bang, haû Kedara é sarhê pé gi, shaû byùq râ nghut lhê.” ga, Isira-elaq é Garai Gasang, haû Yhûmsîng Garai taí bê nghut lhê.