Egutuq Eq Hkusha Lé Htuqhtîng É Myìqhtoi Dang
20
Asuri hkóhkâm Saragon nhang kat é gyèzau móa, Ashidot wà mó má lé jé mù, haû lé htîm sat ung yu é zàn má, 2 haû Yhûmsîng Garai gi, Amozi é yhang zo Esai-a dông dáng nyo ri; Yhang gi, Esai-a lé, “Náng gûng mâ é ji mèbu eq náng é hkyî-tsung lé hkyut pyám aq.” ga taî ri. Haû mù, Esai-a gi, haú dông kut mù, hkyîchîn gùngchîn so lhing wún ri.3 Hau htâng, haû Yhûmsîng Garai gi, “Ngá é duìnhâng zoshâng Esai-a gi, Egutuq ming eq Hkusha ming lé lhoq-ang luî, alhô agàn eq maúhpo hkyô dùt râ matú, sum zân yhang hkyîchîn gùngchîn sô wún é eq rajung za, 4 Egutuq byu pé lé hoq lhoqhpu râ matú, Asuri hkóhkâm gi, chyup yû huî é Egutuq byu pé eq shúm byû dùt é Hkusha byu pé tiq é kô é lé, hkyîchîn gùngchîn chûchîn dùt é shuî ló byùq kôrâ nghut lhê. 5 Haû Hkusha lé lum é eq Egutuq lé xânghpoq nge wó hkyô dông yu é bang gi, gyùq kyûm gyùq hoq byùq kôrâ nghut lhê. 6 Haú buìnyì má, wuimau yàm cháng luî nyi é bang gi, ‘Wú keq, Asuri hkóhkam chyáng mai hkyi yù râ eq garúm yû râ matú, ngá-nhúng hpang e é eq lùmhkau é bang gi, îsu dùt to bu-nhung! Ahkuî, ngá-nhúng hkâsu wó hpang lùt lo râ lhú?’ ga taí kôrâ nghut lhê.” ga taî ri.