Egutuq Ming Lé Htuqhtîng É Myìqhtoi Dang
19
Egutuq ming lé htuqhtîng é myìqhtoi dang gi, a-ô mâ é eq rajung za nghut lhê.Wú keq, haû Yhûmsîng Garai gi, hân hân dâng é mhut ji mù,
Egutuq ming má jé lé ri.
Egutuq mâ é hparà hpôlhô pé gi, yhâng é hí má gyùq nán luî,
Egutuq byu pê é i-myìt nhiklhum gi, gyùq luî ròp ròp gâ bùm bekô nghut ri.
2 “Ngò gi, Egutuq byù yhangchang htîm lhum râ i-myìt lhoqtoq byi râ nghut mù,
gu-mang yhangchang,
yhûmkyo yhangchang,
rawà eq rawà,
mîngdán ra-ming eq ra-ming, htîm lhum kôrâ nghut lhê.
3 Egutuq byu pé gi, myìt wum gyuî byùq kôrâ nghut mù,
Ngò gi, yhángmòq hen tô é hkyô pé lé lhoqhtên pyám râ nghut lhê;
haú hkûn, yhángmòq gi, hparà hpôlhô pé eq nàt wang júng sé bang lé le,
sôbyô dàt ji é bang eq bùt hpyit bang lé le hô kôrâ nghut lhê.
4 Ngò gi, Egutuq byu pé lé,
byù jum nghut é zau hpô é lòq má àp pyám râ nghut mù,
ladu lai shoq ashop é hkóhkâm gi, yhángmòq lé ùp râ nghut lhê.” ga,
haû Wum-o a-tsam dìk shoq bò Sû Yhûmsîng Garai nghut é, Yhûmsîng taî pyo ri.
5 Haû wuimau mâ é wuì gi, kân byùq râ nghut mù,
wuìlàng mó mâ é wuì gi, kyuq huî byùq râ nghut lhê.
6 Wuì zo làng pé gi, nam byùq râ nghut lhê;
Egutuq ming mâ é wuìhkyo pé kân huî byùq râ nghut mù,
jàm gàm pé eq mhan hpup pé gi, nyhuî kyuq byùq râ nghut lhê.
7 Hau htoq agó, Nile Wuìlàng wui mùn cháng luî yùq é agàm pé le nyhuî kyuq byùq râ nghut lhê.
Nile Wuìlàng cháng luî hô é yò hkangmó le,
kyuq hkong byùq mù, mùt tâng ló byùq luî, htâng má a jòq lo râ nghut lhê.
8 Haû mù, ngo-kóng kóng bang gi, yón ngau bùm luî,
Nile Wuìlàng má ngo-nhe nhê é bang bànshoq gi, ngaùhkyang sâng kôrâ nghut lhê;
wuì má gùn dú é bang gi,
myìt htûm byùq kôrâ nghut lhê.
9 Saî ge tô é jihkyîng mú zui bang gi, hoq hpu râ nghut mù,
mèbu hpyû wòq é bang gi, myòqbyù jang a jòq dùt byùq râ nghut lhê.
10 Mau sîng pyîlàt zìng dông nghut é bang gi, lhoqhkyop pyâm é hui râ nghut mù,
langchyáng hpau zô é bànshoq bang gi, i-myìt tiq bûm kôrâ nghut lhê.
11 Zo-an wà zau wuî gi, ngha byùq bekô nghut ri.
Hpara-uq é hpàqchyî dàt byi bang gi, ngha é hpàqchyî byî akô nghut ri.
“Ngò gi, a-nham lhê é hkóhkam pê é awùt ashín nghut lhê mù,
hpàqchyî bò sû rayùq nghut lhê.” nghû,
Hpara-uq lé núngmòq hkâsu ge wó taí kôrâ lhú?
12 Ahkuî, náng é hpàqchyî bò bang gi, hká má kó lhú?
Yhángmòq gi, nang lé, haû Wum-o a-tsam dìk shoq bò Sû Yhûmsîng Garai mai,
Egutuq ming lé htuqhtíng râ matú hen tô é hkyô,
tûn shit mù, sé nhang wú kó sháng gàq.
13 Zo-an wà zau wuî gi, ngha byùq bekô;
Memhpi wà mâ é ushuq pé gi, mhaú zô é hui bekô;
Egutuq byu pê é htúngchyûn lùqgòk pé nghut bang gi,
Egutuq ming lé hkyô shuî nghoq bekô nghut ri.
14 Haû Yhûmsîng Garai gi, Egutuq byu pê chyáng,
nhúngnháng nhang é sô hut hkyô kat é nghut mù,
yhángmòq gi, î shuq wùt sû, yhûmsing hpat tô é má lhoqlhû yu é su,
yhángmòq Egutuq byu pé kut é hkyô hkangmó lé shuî nghoq pyâm akô nghut ri.
15 Egutuq má gi, ulhum eq sho-myî é matú nghut nghut, byùm koq eq jàm gam é matú nghut nghut,
haî le a wó kut lo nghut ri.
16 Haú nyí má, Egutuq byu pé gi, myiwe su ròp ròp yhang wum nyhôm byùq râ nghut lhê. Yhángmòq gi, haû Wum-o a-tsam dìk shoq bò Sû Yhûmsîng Garai mai yhángmòq lé htuqhtíng râ lòq tu tô é yánmai, gyùq nán bûm kôrâ nghut lhê. 17 Haû Wum-o a-tsam dìk shoq bò Sû Yhûmsîng Garai gi, Egutuq byu pé lé htuqhtíng râ hen tô é yánmai, Yudaq mau gi, Egutuq byu pê é matú gyùq chiq mó jowò dùt râ nghut lhê; “Yudaq mau” ga za taî htoq le lháng, yhángmòq gyùq nán bûm kôrâ nghut lhê.
18 Haú buìnyì má, Egutuq ming mâ é wà mó ngo wâ gi, Hkanan myíng mù kôluî, haû Wum-o a-tsam dìk shoq bò Sû Yhûmsîng Garaî é dang gyo râ matú dakâm kôrâ nghut lhê. Haú mâ é rawà lé gi, Buì Wà Móa ga kôrâ nghut lhê.
19 Haú buìnyì má, haû Yhûmsîng Garaî é matú, Egutuq ming gûng má hkungga gyàp ralhum jòq râ nghut é htoq agó, maukyo má le Yhûmsîng Garaî é masàt zìng xuq râ nghut lhê. 20 Haû gi, Egutuq ming má, Wum-o a-tsam dìk shoq bò Sû Yhûmsîng Garaî é matú alhô agàn eq sàksé dùt râ nghut lhê. Egutuq byu pé gi, yhángmòq lé zìk zo bâng é yánmai, haû Yhûmsîng Garai lé wùt dung kôjáng, Yhang gi, yhángmòq chyáng, hkyi yù râ eq mâgum yù râ sû nhâng byi luî, yhángmòq lé hkyi xe yù râ nghut lhê. 21 Haû mù, Yhûmsîng Garai gi, Egutuq byu pé lé, Yhânggùng yhang shit râ nghut luî, haú nyí má, Egutuq byu pé gi, haû Yhûmsîng Garai lé wó sé kôrâ nghut lhê. Yhángmòq gi, shigu gaunyhaú hkungga pé eq gùqzò hkungga pé nhông byi luî, Yhûmsîng Garai lé noqkuq mù, Yhang lé dakâm luî, châng kut kôrâ nghut lhê. 22 Haû Yhûmsîng Garai gi, Egutuq ming lé wúm èq bàt râ nghut lhê; Yhang gi, yhángmòq lé bàt mù, lhoqge yù râ nghut lhê. Yhángmòq gi, haû Yhûmsîng Garaî chyáng lhing lò kôrâ nghut mù, Yhang gi, yhángmòq dûng é lé gyo byi mù, lhoqgê byi râ nghut lhê.
23 Haú buìnyì má, Egutuq ming mai Asuri ming jé shoq hkyô mó dong râ nghut mù, Asuri byu pé gi, Egutuq ming má gyó ê luî, Egutuq byu pé gi, Asuri ming má dòq ló râ nghut lhê. Egutuq byu pé eq Asuri byu pé gi, rahá noqkuq kôrâ nghut lhê. 24 Haú buìnyì má, Isira-elaq gi, Egutuq eq Asuri le mù, sûm mîng é, myìdàm htoq má shimân jeju shuî háng kôrâ nghut lhê. 25 Haû Wum-o a-tsam dìk shoq bò Sû Yhûmsîng Garai gi, “Ngá é byù Egutuq, Ngá é lòqmú Asuri eq Ngá é silî wunlî Isira-elaq gi, hkungsô wó nyi ri.” ga yhángmòq lé shimân byi râ nghut lhê.