Hkusha Lé Htuqhtîng É Myìqhtoi Dang
18
Hkushaa mâ é wuìlàng pé cháng luî,shông shông ga dùng htê mying é maumyî gi, dingnyé wó ri.
2 Haû mai, jàm tsaí gâm lé saî é lhaî dông,
wuimau mai lagyô pé lé nhang kat ri.
Xé xé tsang tsang dùt é lagyô pé ê, ê keq;
gùnghkyâng myhâng luî, showa chyut chyut za dùt é byu pé,
ra-mîng é gyùq kyûm râ dùt é byu pé,
wum-o mó bò luî, byu pé lé nâng pyeq pyám sê é,
maumyî lé wuìlàng pê èq gam hkoq pyâm é byu pê chyáng, ê keq.
3 Myìdàm htoq má nyi é,
mingkan mâ é byù lhúnglhâng bang ê,
bùm htoq pé má donghkón tu xuq é hkûn,
núngmòq myàng kôrâ nghut lhê;
tut htê mying é hkûn,
núngmòq wó gyo kôrâ nghut lhê.
4 Haû Yhûmsîng Garai gi, ngo lé,
“Ngò gi, Ngò nyi é jowò mai,
buìloq hkaû má lúm lúm za gâ é su le,
kyô shu yòq má nyé é hkaû mâ é nghân soq su le,
zim za nyì mù, wú to râ nghut lhê.” ga taî ri.
5 Yhang gi, kyô shu yòq a jé shi-má, achyu pé byùq ló byùq mù,
abó pé myhîng é tsibyiq shi dùt lo é hkûn,
sik chu sham èq a-nyùq pé lé chû pyám mù,
hkyâm lam ló é akoq pé lé zân hpyit pyám râ nghut lhê.
6 Haú pê é gùngsho gi, bùm mâ é nghoq pé eq
tân jung yòsô zè pê é matú dùt byùq râ nghut mù,
nyé nám bànshoq má gi, nghoq pê èq hpyoq zo mù,
gyòq nám bànshoq má gi, tân jung yòsô zè pê èq hpyoq zô pyám râ nghut lhê.
7 Haú ahkyíng má, gùnghkyâng myhâng luî, showa chyut chyut za dùt é byu pé,
ra-ming gón é gyùq kyûm râ dùt é byu pé,
wum-o mó bò luî, byu pé lé nâng pyeq pyám sê é,
maumyî lé wuìlàng pê èq gam hkoq pyâm é byu pê chyáng mai,
Wum-o a-tsam dìk shoq bò Sû Yhûmsîng Garaî é matú chyûnghuq pé yu lé kôrâ nghut lhê.
Haû gi, Wum-o a-tsam dìk shoq bò Sû Yhûmsîng Garaî é Myìng jòq é jowò Zi-un Bùm má chyûnghuq pé yu lé kôrâ nghut lhê.