Damasikuq Lé Htuqhtîng É Myìqhtoi Dang
17
Damasikuq wà mó lé htuqhtîng é myìqhtoi dang gi,“Wú keq, Damasikuq gi, wà mó dùt nyì lo râ a nghut lô é za,
htên byòq byùq é a-pyâng bùm dùt byùq râ nghut lhê.
2 Aro-era mâ é wà mó pé gi, chamchyuîyuì dùt byùq râ nghut mù,
sau hpúng pé gi, haú má up to kôrâ nghut mù,
ó yùq le, sau hpúng haú pé lé kyuq kôrâ a nghut.
3 Ehprim mâ é gingtíng jowò wà mó pé eq
Damasikuq mâ é ùphkâng hkyô gi, byùq byùq râ nghut lhê;
Arama mâ é nyi myìt gyó tô é bang gi,
Isira-elaq byu pê é hpungwup shingkang su yom byùq râ nghut lhê.” ga,
haû Wum-o a-tsam dìk shoq bò Sû Yhûmsîng Garai taî pyo ri.
4 Hau htoq agó, “Haú buìnyì má, Yakup é hpungwup shingkang gi, yom ló byùq mù,
yhâng é xu myum é gùngdu gi, gyí ló byùq râ nghut lhê.
5 Kyô shu bâng èq yùq tô é kyogâm lé yam mù,
yhángmòq é lòq má tsîng yu é su dùt râ nghut lhê;
gè gè yhang, Rehpim Langhkaû mâ é gùqgyó châng gùq é su dùt râ nghut lhê.
6 Nghut kôlhang, tsanlun shi lé bàt shoq é hkûn,
je ló myhang é akoq pé má ra í cham dàp tô é su le,
yín bê akoq má myî ngo cham dàp tô é su le,
nyi myìt to râ nghut lhê.” ga,
Isira-elaq é Garai Gasang, haû Yhûmsîng Garai taî pyo ri.
7 Haú buìnyì má, byu pé gi, yhángmòq é Hpân Yhûmsîng lé tu wú kômù,
haû Isira-elaq é Chyoiyúng Su shut, yhángmòq é myòqjí lhîng kôrâ nghut lhê.
8 Yhángmòq gi, yhángmòq é lòq èq saî tô é,
hkungga gyàp pé lé wú kôrâ a nghut é htoq agó,
yhángmòq é lòqnyhuî èq saî tô é,
Ashera zìng pé eq namngón jung nyhé hkungga gyàp pé lé, haî su a ngàm kut kôrâ nghut lhê.
9 Haú buìnyì má, Isira-elaq byu pê é yánmai yhángmòq tô pyâm tô é, yhángmòq é gingtîng é wà mó pé gi, sik mó yô eq bùm gùng pé má tô pyâm tô é jowò pé su dùt byùq râ nghut lhê. Maumyî haû gi, chamchyuîyuì dùt to râ nghut lhê.
10 Hkâsu mù gâ le, nàng gi, náng é Hkyi yù Sû Garai Gasang lé tô-myhî pyám bê nghut ri;
nàng gi, náng é gingtíng jowò, haû Lungmó Zîng lé a myìtbûn pyám nghut ri.
Haû mù, nàng gi, réng dik é agàm pé lé ho mù,
gó wô mai tsibyiq gâm lé yu ho kôle,
11 nàng, haú pé lé hô é nyí má, haú pé lé yùq ko nhâng mù,
nàpsûn má haú pé lé ho mù, abó bó nhâng kôle,
myìt nò yón kuq é eq a wó lhoqge yu jung nò huî é buìnyì má,
kyô zo haî le myang shû yù râ a nghut.
12 Haû wuimau wuìlhêng toq htê su ga,
garu garín htê lhoqhtoq é a-myû wuì myo myo gi, dingnyé wó ri!
Haû wuì pé mying hûm é htê su ga,
htê mó o mó garû myhîng é byu pé gi, dingnyé wó ri!
13 Byù myo myo gi, wui mó pé mying hûm é su ga, htê mó o mó garû myhíng kôle,
Yhang, yhángmòq lé tân é hkûn, yhángmòq gi, we we má hpâng kôrâ nghut lhê;
yhángmòq gi, bùm htoq má lai èq mùt tâng é hpuichyap eq
laì mó má lom ló byùq é hpuílhup su, byùq byùq râ nghut lhê.
14 Myín lé, byò dàn tung gyùq chiq hpo jé luî,
nàpsûn myòq a myàng shi-má, haú pé byùq byùq bu-nhung!
Haû gi, ngá-mòq lé lhoqhten lhoqhpyoq bâng é gàmbùm nghut luî,
ngá-mòq lé hpyoq zo hpyoq shuq bâng é hpuzo hkyô nghut ri.