10
Shi byùq bê yànghkung pé gi, namngón jung lé bùp nàm nhang é su,ngòk é hkyô zo gi, hpàqchyî byéng-yá eq xânghpoq nge wó hkyô lé lhoqhpoî pyâm ri.
2 Hpàqchyî bò su é i-myìt nhiklhum gi, lòqyò hkyam shut nghut ri;
nghut kôlhang, byù ngok é i-myìt nhiklhum gi, lòqpaî hkyam shut nghut ri.
3 Byù ngok gi, hkyô má sô nyi le lháng,
nhik gyîng é hkyô langhpyùt mù,
yùq hkangmó lé, yhang go é hkyô tûn shit ri.
4 Zau hpó gi, nang lé nhikjum yo jáng,
náng é jowò lé hkâtô pyâm to;
wó jân é myìt gi, yubàk mara mó lé wó lhoqzîm pyâm lhê.
5 Zau hpó lhoqshut pyâm é yánmai,
buì ô má agè ashop hkyô rahkat jòq é lé ngò myang ri.
6 Ngòk é bang gi, myhang é jowò pé myo myo má zung bùm luî,
sùtzè wó bang gi, nyhum é jowò má zung bum akô.
7 Jùn pé gi, myang ji jî bùm mù,
zau wuî gi, jùn pé dông hkyô so sô bùm kô é lé, ngò myang ri.
8 Dong dû é sû gi, yhang yhang haû má byìt gyó wâng sê lhê;
wàhkûm lhoqhpyoq é sû gi, lhângmui èq htê é hui zo sê lhê.
9 Lùqgòk lé htòt é sû gi, hau èq bàt chap é hui zo sê lhê;
sikhtung lé jìk é sû gi, dàm dap é hui zo sê lhê.
10 Wazung dûm byùq jáng,
a suî htoq é nghut le gi,
wum je kat ra râ nghut lhê;
nghut kôlhang, lòqmú bò jáng gi, wó ûngmyuq râ nghut lhê.
11 Lhângmuì lé a lhoqmhuî pyám shi-má, lhângmui èq htê é nghut jáng,
lhângmuì lé lhoqmhuî é sû gi, hai a-kyû bò râ lhú?
12 Hpàqchyî bò su é dang gi, jeju dang nghut ri;
nghut kôlhang, ngòk su é nhutwuî gi, yhang lé lhoqhtûm pyâm ri.
13 Yhang dang-hi hpông é gi, ngòk é dang nghut mù,
yhang danghtâng sat é gi, agè ashop é mena dang chyat nghut ri.
14 Ngòk sû gi, dang myo myo taî ri.
Dùt lò râ hkyô lé ó yùq le a sé nghut ri.
Yhâng chyáng htâng má dùt lô râ hkyô, yhang lé ó yùq wó taî kyo râ lhú?
15 Ngòk é bang zui saî shi-kùt é gi, yhángmòq lé ngú nhang ri;
yhángmòq gi, wà hkyô lé lháng a sé kó nghut ri.
16 Mîngdán ê, náng é hkóhkâm hpó tiq tô ashî nghut mù,
náng é zaugun wuì nàpsûn noq le zoshuq poî kut kô é yánmai, nàng dingnyé wó ri.
17 Mîngdán ê, náng é hkóhkâm hpó gi, zau zo nghut mù,
náng é zaugun wuì gi, zô myo shuq myo a kut é za,
wum-o bò râ matú, yhâng é ahkyíng má zo shuq kô é yánmai, nàng hkungsô wó nyi ri.
18 Lagôn é yánmai, yhûmhkûng wôm byùq ri;
lòq a kâm dui é yánmai, yhûm mauyuî yui ri.
19 Poî kut é gi, gabú nhâng râ matú nghut luî,
tsibyiq wing gi, myìt nguì myìt ngón nhang ri;
ngùn gi, jung hkangmó lé wó ûngmyuq nhang ri.
20 Náng é i-myìt mai lháng hkóhkâm hpó lé danggang hkâtaí;
náng é yhup wàp má sùtzè wó sû lé hkâ-nhing;
hkâsu mù gâ le, maulat nghoqzo gi, dang haú lé taî pyô mù,
dùng dap é nghoqzo gi, dang haú lé lhoqbyông htoq byi sê lhê.