Ajung Jung Má Shi-kùt Chyam Wú Râ Hkyô
11
Náng é zoshuq lé wuì htoq má sân hkyô kat àq;buìnyì myáng jáng nàng haú lé dum myang yù râ nghut lhê.
2 Nyhit yùq, a nghut jáng, shit yùq lé, nàng wó é gàm byi aq;
hkâsu mù gâ le, myìdàm htoq má byò dàn byò sho hkyô haî htoq lô râ lé, nàng a sé nghut ri.
3 Mhut nòq byùq é nghut jáng,
myìdàm htoq má maú wo chyûn gyó lo ri.
Sikgâm gi, maupyî shut leng kôlhang, mautsûng shut leng kôlhang,
lêng ló é shut lèq to râ nghut lhê.
4 Laì lé wú sû gi, kyôshi wó hkyó râ a nghut;
mhut lé wú sû gi, kyôshi wó shu râ a nghut.
5 Laì hká shut ló é eq
înû ûnghkaû má zogûng hká dông dùt lo é lé, nàng a sê é su,
lhúnglháng lé hpân Sû Garai Gasâng é múzó lé,
nàng a wó sê gyô é nghut lhê.
6 Nàpsûn noq le kyó hkyó aq;
myínhtâng lé le a hkyô é hkâ-nyî;
hkâsu mù gâ le, hká cham shèq yùq râ lùq,
í châm é shèq yùq râ lùq,
nàng a sê é nghut lhê.
Chyungxe Zànwut Rám Ashî Hkûn Náng É Hpân Sû Lé Myìt Bun Râ Hkyô
7 Maubó gi, xân yúng ri;
myòqjí gi, buì lé myàng jáng gyai ngón ri.
8 Byù gi, zànwut myo myo nyì jáng,
zànwut haú pé bànshoq má gabú nguì ngón nyî sháng gàq.
Nghut kôlhang, jé lô râ nghut é mauchut é buìnyì pé lé myìtbun sháng gàq;
hkâsu mù gâ le, buìnyì haú pé gyai myo râ nghut lhê.
Jé lô râ hkyô pé lhúnglháng gi, akôm za nghut byùq ri.
9 Zorâm ê, nàng chyungxe zànwut rám tô é u lé gabú nyî àq;
nàng chyungxe zànwut rám tô é buìnyì pé má, náng é i-myìt lé nguì ngón nhâng àq;
nàng myìt ngui é hkyô eq
náng é myòqjí èq myang é hkyô má cháng aq;
nghut kôlhang, haú hkyô pé bànshoq é matú,
Garai Gasang èq nang lé târâ jéyáng râ nghut é lé sê to aq.
10 Haû mù, náng é myìt hkaû mai myìt myo myìt chiq é hkyô lé lhoqhkyô pyám mù,
náng é gùngdu mai wuîhke jamjau hkyô lé huî séng pyám aq;
hkâsu mù gâ le, chyungxe zànwut rám é u eq wum-o a-tsam gi, akôm za nghut byùq ri.