Lhúnglháng Bâng Chyáng Rajung Za Dùt Htoq Râ Hkyô
9
Haû mù, ngò gi, haú pé bànshoq lé myìt tû wú le, shî su nghû dangchyûng wó hpyit ri; díngmán sû eq hpàqchyî bò sû le, yhángnhik kut é múzó le, Garai Gasâng é lòq má za nghut nyi ri; nghut kôlhang, yhángmòq hí má jòq to láng râ gi, chyitdàp myìt nghut lhê lùq, a ngui é hkyô nghut lhê lùq, ó yùq le a sé kó nghut ri. 2 Lhúnglháng bâng chyáng rajung za dùt htoq râ nghut lhê; díngmán sû eq agè ashop sû, ge é eq a ge é hkyô, sansêng é eq a sansêng é hkyô, shigu hkungga pé nhông byi bang eq a nhông byi bâng é matú, rajung za dùt htoq râ nghut lhê.Gè su chyáng dùt é su,
yubàk mara bò su chyáng le dùt ri;
dakâm naù su chyáng dùt é su,
a kâm dakâm nau su chyáng le dùt ri.
3 Lhúnglháng bâng chyáng rajung za dùt htoq é gi, buì ô má dùt htoq é jung hkangmó má agè ashop é hkyô nghut ri. Waxâng zo wuî gi, chyungxe dui nyi é u, agè ashop hkyô eq nâ é hkyô myìt má byíng zan tô akô; ló htáng má gi, shi byùq bê bâng chyáng ló akô nghut ri. 4 Kângsoq dui nyì bâng chyáng bo nyi to sû gi, myìt myòqbyù jang jòq ashî nghut ri; kângsoq dui nyi é hkui gi, shi byùq bê é hkanghkyî htoq je ge ashî nghut ri!
5 Hkâsu mù gâ le, chyungxe dui nyi é bang gi, yhángmòq shî râ nghut é hkyô lé sê ri;
nghut kôlhang, shi byùq bê bang gi, haî le a sé kó nghut ri;
yhángmòq gi, hkya-on chyûnghuq wó râ a nghut é htoq agó,
yhángmòq é myìng lé le tô-myhî pyám byi kôrâ nghut lhê.
6 Yhángmòq é chyitdàp myìt, a ngui é hkyô eq mânon é hkyô gi,
góhkûn mai byùq byùq bê nghut ri;
buì ô má dùt htoq é hkyô jung hkangmó má,
yhángmòq hkâ-nhám le bo myang lòm kôrâ a nghut.
7 Ê aq; Garai Gasang gi, nàng kut é lé hàp yù byi bê nghut é yánmai, gabú myìt mai náng é zoshuq zo mù, nguì ngón é myìt mai náng é tsibyiq wing lé shuq àq hkoi. 8 Náng é mèbu ayang hpyu yúng nyì sháng gàq; náng é ulhum ayang uxû myang but nyì sháng gàq. 9 Buì ô má Garai Gasâng èq nang lé byî tô é akôm za nghut é i-pyàt buìnyì pé má, nàng chyitdàp é yhûmsîng myhí eq rahá, náng é i-pyàt htum shoq ngón za nyi laî yù àq; hkâsu mù gâ le, haû gi, nàng chyungxe dui nyi é u, buì ô má nàng zui saî shi-kùt é gàmbùm nghut ri. 10 Nàng kut âng é múzó lé, wum-o a-tsam bànshoq èq kut àq; hkâsu mù gâ le, nàng gyó ló é mosumhkung má gi, mú le a zui, múzó le a htûng, sê gyô é eq hpàqchyî byéng-yá le a jòq é nghut lhê.
11 Dum, ngò gi, buì ô má gótû rajung lé wó myang ri.
Wó dîn luî za, wó din ung é a nghut;
wum bô luî za, majan ung é a nghut;
hpàqchyî byéng-yá é yánmai za, zoshuq wó é a nghut;
gyai sé gyai kung luî za, sùtzè wó é a nghut;
gyai wó mhoq sê yù luî za, myòqdong wó é a nghut;
nghut kôlhang, ahkyíng eq ahko ahkáng gi, yhángmòq bànshoq bâng chyáng dùt htoq lo é nghut ri.
12 Nghut kôle, ó yùq lháng yhûmsing é ahkyíng hkâ-nhám jé lô râ lé a sé nghut ri;
ngozo gi, ashop é gùn má myí é eq
nghoqzo gi, lhaí má myí é su,
waxâng zo wuî gi, agè ashop é ahkyîng èq myhî yù é hui zo luî,
a bûn nùng má byìt gyó wang akô nghut ri.
Ngòk É Hkyô Htoq Hpàqchyî Byéng-yá Ge É Hkyô
13 Ngò gi, buì ô má, ngá é matú gyai yhang hkìk bûn é, hpàqchyî byéng-yá rahkat lé le myang ri. 14 Byù a myô é wà rawà jòq ri; hkóhkâm mó rayùq gi, wà haú lé lé lóm to mù, wàhkûm lhînghkyùq zùmhtâng mó saî tap ri. 15 Wà haú má, asho awui dùt kôlhang hpàqchyî bo é byù rayùq nyì mù, yhang gi, wà haú lé yhâng é hpàqchyi èq hkyi yu ri; nghut kôlhang, asho awuî é sû haú yùq lé, ó le a bun kó nghut ri. 16 Haû mù, “Hpàqchyî byéng-yá gi, wum-o a-tsâm htoq je ge ri.” nghû ngò taî é nghut lhê. Nghut kôlhang, asho awuî é sû haú yùq é hpàqchyî byéng-yá lé wú tiq pyám byi kômù, yhâng é dang lé le a gyo byi kó nghut ri.
17 Byù ngok pé lé ùp su é garu htê lé gyo râ htoq,
hpàqchyî bò sû zim za taî é dang lé gyô le je ge ri.
18 Hpàqchyî byéng-yá gi, gyè zan shâm lhâm htoq je ge ri;
nghut kôlhang, yubàk dàp sû gi, ge é hkyô myo myo lé lhoqhtên pyâm ri.