8
Hpàqchyî byéng-yá bò sû gi, ó yùq nghut lhê lhú?Nìk é múzó pê é hkyô lé wó taî sân kyô é sû gi, ó yùq nghut lhê lhú?
Byù rayùq é hpàqchyî byéng-yá gi, yhâng é myòqdong lé bó yúng nhang é nghut mù,
yhâng é myòqdong isâm lé htaî pyám byí nhang ri.
Hkóhkam É Jì-no Gyo Râ Hkyô
2 Garai Gasâng é hí má dâkam to bê nghut é lé tê byi mù, hkóhkâm hpó hkyô é hkunmó lé châng kut àq. 3 Hkóhkam é myòq hí mai hân hkâhtoq ló. Ashop é hkyô hkâkut; hkâsu mù gâ le, yhang gi, yhûmsîng myìt ngui é dông kut râ nghut lhê. 4 Hkóhkam é dang gi, hpungwup a-tsam bo é nghut mù, “Nàng haî kut lhê lhú?” nghû, yhang lé ó yùq wó taí râ lhú?
5 Yhâng é hkunmó lé châng é sû gi, mara dàm byî é hui zo râ a nghut;
myìt má hpàqchyî bo é sû gi, htuk é ahkyíng eq kut e ló râ hkyô lé wó sê gam hkoq ri.
6 Hkâsu mù gâ le, byù gi, myìt myo ûng wom hkyô mó hui zo kôlhang,
múzó hkangmó é matú htuk é ahkyíng jòq mù, kut e ló râ hkyô dông ri.
7 Htângnùng lhê é hkyô lé ó yùq le a sê é nghut mù,
góyùq chyáng haî dùt lô râ hkyô ó yùq wó taî kyo râ lhú?
8 Ó yùq le, kângsoq lé a wó ùp é htoq agó, haú lé a wó hkûm zing tô é eq rajung za,
shî nò hkyo é buìnyì lé le, ó yùq a wó ùp é nghut lhê.
Majan mai ó yùq le a wó hpang lùt é eq rajung za,
agè ashop hkyô gi, agè ashop hkyô kut é sû lé wó lhoqlhut kat é a nghut.
9 Buì ô má kut é hkyô lhúnglháng lé ngò myìt lhîng hkyùq wú é hkûn, shí hkyô pé bànshoq lé ngò myàng bê nghut lhê. Byù gi, rayùq eq rayùq lhoqnho lhum râ matú zìk zô lhûm é ahkyíng wó lhê. 10 Haû mù, agè ashop sû myhup yhûm pyâm é huî é lé ngò myang ri; yhángmòq gi, chyoiyúng jowò mai htoq htoq wàng wàng kut kô é nghut mù, wà hkaû mâ é yhángmòq ashop hkyô kut é jang má hkya-ôn é hui kô é bang nghut bum akô. Haû le, akôm za nghut byùq ri.
11 A târa é hkyô lé hân za mara a hpyit pyâm é nghut jáng, mingbyû wui é i-myìt gi, agè ashop é hkyô kut râ myìt je bo lo bum akô nghut ri. 12 Agè ashop sû gi, a târa é hkyô rashô dàm kut luî, chyungxe hing nyì kôlhang, Garai Gasâng é hí má Yhang lé gyùq hkúnggâ é bang shèq, ge é hkyô lé htûng hui kôrâ nghut é lé, ngò sê lhê. 13 Nghut kôlhang, agè ashop sû gi, Garai Gasang lé a gyùq hkúngga kut é yánmai, ge é hkyô langhpyùt râ nghut lhê; yhâng é chyungxe buìnyì pé gi, wùpzo su a hîng râ nghut lhê.
14 Myìdàm htoq má akôm za nghut é hkyô gótû rahkat dùt htoq ri; haû gi, díngmán é bang ra-am, agè ashop bang hui zô é mara dam lé hui zô akô; agè ashop bang ra-am, díngmán bang myang hkam yù râ nghut é jeju lé myang hkam yu bum akô nghut ri. Ngò taí bá; haû le, akôm za nghut byùq ri. 15 Haû mù, ngò gi, ngón hkyô cháng keq nghû nau ri; hkâsu mù gâ le, waxâng zo wuî gi, buì ô má zo zo shuq shuq kut mù, ngón ngón nyi é mai lai luî, je ge é hkyô haî a jòq nghut ri. Haû gi, Garai Gasâng èq buì ô má yhángmòq lé byî tô é chyungxe buìnyì pé bànshoq má zui saî shi-kùt é gabú hpo a-kyû nghut ri.
16 Hpàqchyî byéng-yá haî nghut é hkyô eq myìdàm htoq má zui saî shi-kùt luî, byù myo myo nyí myín a wó yhup kô é hkyô lé, ngo myìt lhînghkyùq wú é hkûn, 17 haú pé bànshoq gi, Garai Gasang kut é chyat nghut é lé, ngò myang ri. Buì ô má dùt nyi é hkyô lé ó yùq le a ung sê gyo nghut ri. Haú lé wó sê gyo shoq ga yhûmsing é a-tsam htum shoq ho gôn wú kôlhang, hau é lichyúm lé a ung sé kó nghut ri. Hpàqchyî bò sû gi, ngò sê lhê ga taí kôle, gè gè ga jáng, yhang haú lé a ung sê gyo nghut ri.