Hpàqchyî Byéng-yá
7
Myìng gè wó é gi, je réng é namngón shôm htoq je ge ri;shi byùq é buìnyì gi, hku lé é buìnyì htoq je ge ri.
2 Ngón poî kut é yhûm má ê râ htoq,
byù shî iyon yôn nyi é yhûm má e le je ge ri;
hkâsu mù gâ le, haû gi, yùq hkangmó é jihtûm nghut luî,
chyungxe dui nyi é bang haú hkyô lé myìt má kat to ra râ dùt lhê.
3 Yón é gi, wui hâ é htoq je ge ri;
hkâsu mù gâ le, yón é myòqdong gi, i-myìt é matú ge ri.
4 Hpàqchyî bò su é i-myìt gi, byù shî iyon yôn é yhûm má jòq nyi ri;
nghut kôlhang, byù ngok é i-myìt gi, ngón kûn é yhûm má jòq nyi ri.
5 Byù ngok é mahkôn lé gyo râ htoq,
hpàqchyî bò sû tân é dang lé gyô yu le je ge ri.
6 Hkâsu mù gâ le, byù ngòk sû wui é gi,
au ô má zu htang nyé bùq myhîng é eq du ri.
Haû le, akôm za nghut byùq ri.
7 Zìk zó nau é myìt gi, hpàqchyî bò sû lé ngòk pyám nhang ri;
lòqhkaû lang zè gi, i-myìt lé htên byòq pyám nhang ri.
8 Mú htâng sat é gi, kut hi é htoq je ge ri;
myìt hing é gi, nghutbûn é myìt htoq je ge ri.
9 Nhik-yo naû shoq i-myìt hkâtot;
nhik-yó nau é hkyô gi, byù ngòk é myìt hkaû má lúng tô é nghut ri.
10 “Laî ló bê i-pyàt pé gi, ahkuî lhê é i-pyàt pê htoq haî mù je ge lhê lhú?” nghû hkâ-myi kó;
hkâsu mù gâ le, dangmyi haû gi, hpàqchyî bo é dông myî é a nghut.
11 Hpàqchyî byéng-yá gi, silî wunlî su gè lhô é nghut mù,
buì lé myàng bâng é matú a-kyû bo ri.
12 Hkâsu mù gâ le, ngùn gi, magûm byi sê é su,
hpàqchyî byéng-yá le magûm byi sê lhê;
nghut kôlhang, sê gyô é hkyô èq byî é a-kyû haî nghut lhê lhú gâ le,
hpàqchyî byéng-yá bò sû lé gi, hpàqchyî byéng-yá èq ùpzúng byî nyi lhê.
13 Garai Gasang kut é hkyô lé myìt tû wú aq;
Yhâng èq goí shoq hpan tô é zè lé,
ó yùq wó lhoqnyhâng râ lhú?
14 Nyì ngón yùqyo é hkûn, gabú nyî àq;
nghut kôlhang, wuîhke jamjau huî é hkûn, shí hkyô lé myìt wú aq;
Garai Gasang gi, haû í hkat é lé
dùt htoq to nhang é nghut lhê.
Haû mù, ó yùq le, htângnùng má yhûmsing chyáng
hkâsu dùt lò râ nghut é hkyô lé, a wó sê to nghut ri.
15 Akôm má za ngò chyungxe dui nyi é u má, shî í hkat lé ngò wó myang ri;
díngmán é sû gi, yhûmsing é díngmán hkyô má htûm ló byùq mù,
agè ashop é sû gi, yhûmsing é agè ashop hkyô má chyungxe hing nyi é hkyô nghut ri.
16 Lai shoq hkâ díngmán;
lai shoq hpàqchyî hkâbô;
haî mù yhûmsing gùng yhûmsîng lhoqhtên pyám râ lhú?
17 Lai shoq agè ashop hkâdùt nyì;
byù ngok hkâdùt nyì;
haî mù ahkyíng a jé shi-má shi byùq râ lhú?
18 Hî hkat lé zuî gîng to mù,
htang hkat lé le hkâ-nhang pyám.
Garai Gasang lé gyùq hkúnggâ é sû gi, shî í hkat lé wó cháng râ dùt lhê.
19 Hpàqchyî byéng-yá gi, hpàqchyî bò sû lé,
wà má nyi é zau raxê yùq htoq wum-o a-tsam je wó bò nhang ri.
20 Gè gè yhang, myìdàm htoq má díngmán é byù rayùq le a nyì;
jô é hkyô kut luî, mara hkâ-nhám le a kut shut é byù le a nyì nghut ri.
21 Byu pé taî é danghkun hkangmó lé i-myìt má hkâkat to;
kat to jáng, náng é duìnhâng zoshâng mai nang lé nhîng é dang wó gyo râ nghut lhê.
22 Hkâsu mù gâ le, nàng yhang le, góbang lé myo myo adàm dàm nhîng pyám bê nghut é hkyô lé,
náng é myìt má sê nyi lhê.
23 Ngò gi, haú pé bànshoq lé hpàqchyî byéng-yá èq chyam lìk wú bê nghut luî,
“Ngò gi, hpàqchyî bò sû dùt sháng gàq.” nghû taî é nghut lhê;
nghut kôlhang, haû gi, ngò eq wê gâng nyi ri.
24 We we má jòq é eq nìk dik é hkyô lé,
ó yùq wó gôn htoq râ lhú?
25 Haû mù, ngò, myìt lhîng luî,
hpàqchyî byéng-yá eq azíng zê pê é a-pûn awang lé le,
agè ashop hkyô gi, go é hkyô nghut é lé le,
ngòk é hkyô gi, nâ é hkyô nghut é lé le,
ngò wó sé râ matú ho gôn wú é nghut lhê.
26 Haû mù, lhaí nghut luî, yhâng é i-myìt dumzo nghut mù,
yhâng é lòq toqjâng tui nghut é myiwe gi,
shî nò hkyo htoq je wuîhkê é lé, ngò myang ri.
Garai Gasang lé myìt ngón nhang é sû gi,
myiwe haú yùq chyáng mai wó hpang lùt râ nghut lhê;
nghut kôlhang, yubàk dàp sû lé gi,
yhang myhî yù râ nghut lhê.
27 Târâ hkô Sû taî le, “Wú aq; shí hkyô lé ngò wó myang gôn htoq é nghut lhê;
azíng zê pê é a-pûn awang lé wó ho htoq râ matú, rajûng htâng rajung lé gôn wú é hkûn,
28 a myang gôn htoq shi kôlhang,
yùqgè rahkyîng yùq má i-myìt díng é rayùq lé myang ri;
myiwe rahkyîng yùq má kúm gi,
i-myìt díng é rayùq le a myàng nghut ri.
29 Ngò myang é hkyô gi, rahkat za nghut ri;
Garai Gasang gi, waxâng zo wuî lé i-myìt díng shoq hpan to bê nghut kôlhang,
yhángmòq gi, i-myìt goí é dông ajung jung lé ho nyi bum akô nghut ri.” gâ ri.