Hpàqchyî Byéng-yá Eq Gòsoq Htoq Hkyô
9
Hpàqchyî byéng-yá gi,pyîlàt zing nyhit hkat kyûng yù mù,
yhang, yhûm saî yù bê nghut ri.
2 Yhang gi, yhâng é gaunyhaû pé lé,
sat mù, yhâng é tsibyiq wing lé nyhó luî,
zangbó htung to bê nghut ri.
3 Yhang gi, yhâng é myiwe duìnhâng zoshâng wuì lé,
nhang htoq kat é htâng,
wà mâ é je myhang é jowò mai,
4 “Ngòk é bang bànshoq lé,
shî má lé nhâng keq!” ga wùt taí mù,
haû hpàqchyî a bò bang lé dum taî é gi,
5 “Ngá é zoshuq lé, lé zo mù,
ngò nyhô to bê tsibyiq wing lé,
lé shuq keq.
6 Núngmòq ngòk é hkyô pé lé,
tô pyám keq; haû jáng, núngmòq gi,
chyungxe wó duî kôrâ nghut lhê;
sê gyô é u-nuq hpàqchyî mai,
sô nyì keq.
7 Byù rhoi é sû lé,
lhoqpun lhoqkyîng é sû gi,
rhoi é hui zô é nghut mù,
agè ashop sû lé tân é sû gi,
agè alhô é hui zo râ nghut lhê.
8 Byù rhoî sû lé hkâtan,
tan jáng, yhang,
nang lé a nguì kut râ nghut lhê;
hpàqchyî bò sû lé tan aq,
haû jáng, yhang,
nang lé chyitdàp râ nghut lhê.
9 Hpàqchyî bò sû lé mhoq kyo aq;
haû jáng, yhang,
je zên lò râ nghut lhê;
díngmán sû lé mhoqshit àq,
haû jáng, yhang,
je sê jàt lò râ nghut lhê.
10 Haû Yhûmsîng Garai lé
gyùq hkúnggâ é hkyô gi,
hpàqchyî byéng-yá é a-pûn awang nghut mù,
Chyoiyúng Su é hpàqchyî gi,
sê gyô é u-nuq nghut nyi ri.
11 Hkâsu mù gâ le, ngá é yánmai,
náng é chyungxe buìnyì myo râ nghut mù,
náng é chyungxe zànwut hing jàt râ nghut lhê.
12 Nàng, hpàqchyî bo é nghut jáng,
náng é hpàqchyî byéng-yá gi,
nang lé a-kyû byi râ nghut lhê;
nàng, byù rhoi é nghut jáng,
nàng baú jamjau râ nghut lhê.” gâ ri.
13 Gòsoq htoq é myiwe gi,
htêlé htêgyâng nghut ri;
yhang gi, mhoqshit é a huî é eq,
hpàqchyî a bo é sû nghut ri.
14 Yhang gi, wà mâ é
je myhang é jowò mâ é zùng jang nghut é,
yhâng é yhûm hkúmdong hí má,
zung to mù,
15 o le ô é hkyô má
nyâng za e ló é bang lé,
16 “Ngòk é bang bànshoq lé,
shî má lé nhâng keq!” ga wùt taí mù,
haû hpàqchyî a bò bang lé dum taî é gi,
17 “Hkaû lo é wuì gi,
chuî nghâm lhê;
haq zô é zoshuq gi,
màn bo lhê!” gâ ri.
18 Nghut kôlhang, haú bang gi,
haú má shî‑nò hkyô jòq é lé le,
myiwe hau é bíng pé gi,
mosumhkûng é nìk jang má,
nyi bum kô é lé le,
a sé kó nghut ri.