Sholumon É Jihkyang Dang
10
Sholumon é jihkyang dang gi,a‑ô mâ é eq rajung za nghut lhê.
Hpàqchyî bo é zoshâng gi,
yhâng wa lé gabú nhang ri;
nghut kôlhang, ngha é zoshâng gi,
yhâng nu lé yón nhang ri.
2 A târa é dông wó é sùtzè gi,
hai a-kyû a bò nghut ri;
nghut kôlhang, díngmán hkyô gi,
shi é mai hkyi xe yu nyi ri.
3 Haû Yhûmsîng Garai gi,
díngmán bang lé,
zò-mut huí nhang é a nghut;
nghut kôlhang,
agè ashop bang yùt yùt ô nau é hkyô lé gi,
hkûm tang pyâm ri.
4 Lagôn é lòq gi,
myùng nhang ri;
nghut kôlhang, shi-kùt é lòq gi,
sùtzè wó nhang ri.
5 Buì lúm nám lé,
kyôshi myuishi shû tsîng to sû gi,
hpàqchyî bo é zoshâng nghut ri;
nghut kôlhang,
kyô shu nám lé yhup nyi é su gi,
hoq hpu huî é zoshâng nghut ri.
6 Díngmán su é ulhum má gi,
shimân jeju byíng nyi ri;
nghut kôlhang,
agè ashop su é nhut má gi,
lú lhum bàt zìk dang byíng mui tô ri.
7 Díngmán sû lé myìtbûn é hkyô gi,
shimân jeju dùt râ nghut lhê;
nghut kôlhang,
agè ashop su é myìng gi,
bùp byùq râ nghut lhê.
8 Hpàqchyî bò sû gi,
yhâng é i‑myìt má hkunmó pé lé,
hàp yu tô ri;
nghut kôlhang,
nghâ dang taî é byù gi,
htên byòq byùq râ nghut lhê.
9 Jô é têng é hkyô châng é sû gi,
haî a râ é za wó sô ri;
nghut kôlhang,
agoí agùq hkyô châng é sû gi,
ze htoq lô râ nghut lhê.
10 A ge é dông myòq làp alhô agàn shit sû gi,
yón hkyô lhoqhtoq é nghut mù,
nghâ dang taî é byù gi,
htên byòq byùq râ nghut lhê.
11 Díngmán su é nhut gi,
chyungxe wuìbúm nghut ri;
nghut kôlhang,
agè ashop su é nhut má gi,
lú lhum bàt zìk dang byíng mui tô ri.
12 A naù a wôm é myìt gi,
mabyòq jishûm lhoqhtoq ri;
chyitdàp myìt kúm gi,
shut é hkyô bànshoq lé,
nghop pyám byî ri.
13 Sê gyô é u-nuq bò su é nhutwuî gi,
hpàqchyî dang taî nyi ri;
nghut kôlhang,
sê gyô é u-nuq a bò su é nùnghkûng gi,
dumbáng hui zo râ nghut lhê.
14 Hpàqchyî bò bang gi,
hpàqchyî lé yu tsîng tô ri;
nghut kôlhang,
nghâ su é nhut gi,
htên byòq hkyô lé ji hâng yu nyi ri.
15 Wó bâng é sùtzè gi,
yhángmòq é gingtíng wà mó nghut ri;
nghut kôlhang,
asho awui dùt é hkyô gi,
myùng bâng é htên byòq hkyô nghut ri.
16 Díngmán bâng é zuihpau gi,
yhángmòq é chyungxe duì hkyô nghut ri;
nghut kôlhang,
agè ashop bâng é a-myàt gi,
mara dàm byî é hui hkyô nghut ri.
17 Mhoqshit dang lé gyô é sû gi,
chyungxe duì hkyô má sô nyi é sû nghut ri;
nghut kôlhang,
lhoqpun lhoqkyîng é lé,
haî su a ngam é sû gi,
góbang lé hkyô shuî nghoq é sû nghut ri.
18 Yhûmsîng a naù a wôm é hkyô lé,
haq zaú to sû gi,
mhaû é nhutshô dàp sû nghut ri;
lùmù gànsang é hkyô lé,
lhoqpyo é sû gi,
nghâ sû nghut ri.
19 Dang myo myo taí é má,
mara bo lò sê lhê;
nghut kôlhang,
yhûmsing nhutshô lé,
wó hkûm zing é sû gi,
hpàqchyî bò sû nghut ri.
20 Díngmán su é shô gi,
ngùnhtung gyíng eq pung ri;
nghut kôlhang,
agè ashop su é i‑myìt nhiklhum gi,
a-kyû a bò nghut ri.
21 Díngmán su é nhutshô gi,
byù myo myo lé hku baú ri;
nghut kôlhang,
byù ngha pé gi,
u-nuq a bò kô é nghut mù,
shi byùq akô nghut ri.
22 Haû Yhûmsîng Garaî é shimân jeju gi,
nyì ngón yùqyò nhang ri;
haú má, myìt myo myìt chiq hkyô
haî lé a bò nghut ri.
23 Byù nghâ rayùq gi,
agè ashop hkyô kut é má,
ngón nyi ri;
nghut kôlhang,
sê gyô é u-nuq bò sû gi,
hpàqchyî byéng-yá lé,
myìt nguì ô nau nyi ri.
24 Agè ashop sû myìt gyùq é hkyô gi,
yhûmsing chyáng yhang jé râ nghut lhê;
díngmán sû myìt ô nau é hkyô kúm gi, wó yû râ nghut lhê.
25 Agè ashop sû gi,
laìdun wò yup dùt é hkûn,
byùq ló byùq râ nghut lhê;
nghut kôlhang,
díngmán sû gi, ahtum abyùq,
wó yàp gîng nyì râ nghut lhê.
26 Chyînwing gi, zui eq a htuk é su le,
myihkau gi, myòqjí eq a htuk é su le, lagon sû gi,
yhang lé duìnhâng sû eq
a htuk nghut nyi ri.
27 Haû Yhûmsîng Garai lé
gyùq hkúnggâ é hkyô gi,
chyungxe hîng nhang ri;
nghut kôlhang,
haû agè ashop bâng é zànwut gi,
tot byùq râ nghut lhê.
28 Díngmán bâng é myòqbyù hkyô gi,
gabú hkyô nghut ri;
nghut kôlhang,
agè ashop bâng é myòqbyù hkyô gi,
byùq byùq râ nghut lhê.
29 Haû Yhûmsîng Garaî é hkyô gi,
díngmán su é matú,
nghêhkaû jang nghut ri;
nghut kôlhang,
agè ashop hkyô kut bâng é matú gi,
htên byòq hkyô nghut ri.
30 Díngmán bang gi, hkâ-nhám le
lhoqdui nhûn é hui râ a nghut;
nghut kôlhang,
agè ashop bang gi,
mîngdán haú má wó gîng nyì râ a nghut.
31 Haû díngmán su é nhut gi,
hpàqchyî byéng-yá dang lhoqhtoq ri; nghut kôlhang,
mhaú lô lhik lo é nhutshô gi,
hpyit pyâm é hui râ nghut lhê.
32 Haû díngmán su é nhutwuî gi,
no gyo yó é dang sê taî ri;
nghut kôlhang,
agè ashop bâng é nhut gi,
dang goí chyat taî ri.