Hpàqchyî Byéng-yá Wùt Taî É Dang
8
Hpàqchyî byéng-yá gi,a wùt taî é nghut lhê lhú?
Sê gyô é u-nuq gi, yhâng é htê lé,
a lhoqmyhang é nghut lhê lhú?
2 Yhang gi, hkyô mó yâm mâ é,
myhang é jang má le,
hkyô kang yàm pé má le,
yàp tô é nghut lhê.
3 Wà wàng hkum yâm,
hkum hí, hkúmdong má le,
yhang htê mó èq wùt taî é gi,
4 “Xângzo byu pé ê,
ngò gi, núngmòq lé wùt nyi lhê;
xângzo byu pé lhúnglhâng bang ê,
ngò gi, htê mó èq wùt nyì lhê ô.
5 Ngòk é bang ê,
nhik gying hkyô mhoq yû keq;
ngha é bang ê,
sê gyô é u-nuq wó yû keq.
6 Gyô yù keq, hkâsu mù gâ le,
ngò dang gê taí râ nghut lhê;
ngá é nhutwuî mai,
jô é dang taí râ nghut lhê.
7 Ngá é nhutshô gi,
têng é hkyô lé taî é nghut lhê;
hkâsu mù gâ le, ngá é nhutwuî gi,
agè ashop hkyô lé chaq é yánmai nghut lhê.
8 Ngá é nhut mai htoq é dang
bànshoq gi, tengmán é chyat nghut mù,
myìt goí é eq hpuq lô lhik lo é hkyô,
haî le a bo é nghut lhê.
9 Sê gyô é u-nuq bò bâng é matú,
haú pé bànshoq gi,
têng é chyat nghut mù,
hpàqchyî bò bâng é matú,
haú pé gi, shut é hkyô a bò nghut ri.
10 Ngùn htung lé hkyin yù râ htoq,
ngò mhoqshit é hkyô lé hkyin yù àq;
hîng gyíng lé hkyin yù râ malaî,
hpàqchyî lé hkyin yù àq;
11 hkâsu mù gâ le, hpàqchyî byéng-yá gi,
ne jung lungsêng htoq je hpaudap é nghut mù,
nàng myìt ô nau é hkyô haî lháng,
haú lé wó whuí râ a nghut.
12 Ngò, hpàqchyî byéng-yá gi,
nhik gying hkyô eq rahá nghut nyi mù,
hpàqchyî eq myìt hpyit sê é u-nuq lé,
ngò sing é nghut lhê.
13 Haû Yhûmsîng Garai lé,
gyùq hkúnggâ é hkyô gi,
agè ashop hkyô lé a ngui é nghut mù,
ngò gi,
nghutbûn é eq myìt myhang é hkyô lé le,
agè ashop é nyì yàp hkyô eq,
hpuq lô lhik lô dang taî é hkyô lé le,
a ngui é nghut lhê.
14 Hpàqchyî htoq hkyô eq,
ge e dông târâ hpyit hkyô gi,
ngò eq sêng lhê;
ngò gi, sê gyô é u-nuq eq,
hpungwup a-tsam wó é sû nghut lhê.
15 Hkóhkâm pé gi, ngá é yánmai,
wó ùp nyi é nghut mù,
ùphkâng bang gi, ngá é yánmai,
díngmán é târâ lé,
wó hkyô to bekô nghut ri.
16 Hkóhkâm zô pé eq
myìdàm htoq má ùp é
zaugun sûwún wuî gi,
ngá é yánmai, ùp nyi akô nghut ri.
17 Ngo lé chyitdàp é bang lé gi,
ngò chyitdàp lhê;
ngo lé ho é bang gi,
ngo lé myang hô kôrâ nghut lhê.
18 Sùtzè wó hkyô eq xânghpoq nge wó hkyô le,
gîng nyi é sùtzè eq díngmán hkyô le,
ngò eq rahá nghut nyi lhê.
19 Ngò zuî é ashi gi,
hîng gyíng htoq je ge é nghut mù,
ngò lhoqhtoq é a-myàt gi,
ngùnhtung htoq je ge é nghut lhê.
20 Ngò gi, díngmán é hkyô má so mù,
târâ ràp-rá é hkyô má châng é nghut luî,
21 ngo lé chyitdàp é bang lé,
sùtzè hkyó byi mù,
yhángmòq é sùtdò pé lé,
lhoqpyíng byî é nghut lhê.
22 Haû Yhûmsîng Garai gi, a‑nham sânghi,
Yhâng é mû lháng a hî shi-má,
ngo lé hpan to bê nghut ri.
23 A-nham sânghi, myìdàm lháng a hî shi lé,
ahtum abyùq mai yhang,
Yhang gi, ngo lé,
hkyin masàt to bê nghut ri.
24 Nìk é wuimau lé a hpân shî é hkûn,
wuìbúm pé wuìlàng a dùt shî é hkûn,
Yhang gi, ngo lé hku kat bê nghut ri.
25-26 Bùm pé eq kong pé lháng,
yhâng é yhang a jòq shi-má,
myìdàm eq hau é dam ngón jang pé lé le,
mingkan mâ é hpuílhup haî lé le,
Yhang a hpân shi-má,
ngo lé hku kat bê nghut ri.
27 Ngò nyi tô é gi,
Yhang mauhkûng lé hpan tô é hkûn mai le,
nìk é wuiming má kyo dum kat é hkûn mai le,
28 ahtoq má mhut lé hpan tô é hkûn mai le,
nìk é myìdàm má wuìbúm pé lé
jòq nhang tô é hkûn mai le,
29 haû wuì pé gi, Yhâng é hkunmó lé
a lu lai râ matú, wuimau má wuìkyo tô é hkûn mai le,
myìdàm é a-pûn awang lé,
Yhang xuq é hkûn mai le nghut bê.
30 Haû hkûn, ngò gi, Yhâng é nàm má,
lòqmú zui sû rayùq dông nghut nyi bê;
ngò gi, Yhâng é myòq hí má,
ayang gabú byam chyu nyi luî,
ra-nyí htâng ra-nyí, gabú myìt nguì hkyô byíng mui nyi é nghut lhê.
31 Yháng hpan tô é mingkan gón má le,
ngò myang gabú byam chyu nyì mù,
xângzo byu pê chyáng,
gabú myìt nguì hkyô
ngò wó yu nyi é nghut lhê.
32 Haû mù, ngá zô pé ê,
ngá dang lé gyo keq;
ngá é hkyô pé cháng bang gi,
hkungsô wó nyi ri.
33 Ngò mhoqshit é dang lé gyô yù mù,
hpàqchyî bò keq;
haú lé haî su a ngàm hkâkut kó.
34 Ngá é dang lé gyô yù mù,
ngá é hkum má nyí wuî zúng nyî luî,
ngá é hkum yâm má láng nyi é sû gi,
hkungsô wó nyi ri.
35 Hkâsu mù gâ lé, ngo lé myang hô sû gi,
chyungxe lé myang ho é nghut luî,
haû Yhûmsîng Garaî chyáng mâ é
jeju myang hàp yu é sû nghut ri.
36 Nghut kôlhang, ngo lé a myang hô sû gi,
yhûmsing gùng lé hpuzo nhang é sû nghut ri;
ngo lé a ngui é bang bànshoq gi,
shî‑nò hkyô lé chyitdàp é bang nghut ri.” gâ ri.