Su-myi Sulàng Lú Hkyô Mai Wó Mâgum Yu É Hpàqchyî Byéng-yá
7
Ngá zo ê,ngá é dang lé cháng mù,
ngá é hkunmó pé lé,
náng chyáng yhûm to aq.
2 Ngá é hkunmó pé lé cháng jáng,
nàng, chyungxe duì râ nghut lhê;
náng é myòqlhumjí lé chun é su,
ngò mhoqshit é dang pé lé,
wú zúng nyî àq.
3 Haú pé lé, náng é lòqnyhui pé má,
tuî tap to mù,
náng é i‑myìt lùqlong má,
kâ tap to aq.
4 Hpàqchyî byéng-yá lé gi,
ngá é nhammó nghû,
sê gyo é u-nuq lé gi,
ngá é gu-mang nhiktâng nghû taí aq;
5 haú hkûn, haú pé gi, nang lé,
shiwa myhî chyáng mai le,
nhut gyai chyut é su-myî chyáng mai le,
mâgum yù râ nghut lhê.
Nhut Chyut É Myiwe Myhí Eq Ngha É Zorâm Zo
6 Ngò gi, ngá yhûm mâ é hkohot mai,
pán-gyang gyoro dông wú kat le,
7 nghâ bâng chyáng mâ é rayùq lé,
myang kat luî, zorâm wuì mâ é,
u-nuq a bò sû rayùq lé,
rago myang kat ri.
8-9 Yhang gi,
myiwe hau é yhûm hkyô chyûn shut,
sô gyó e ló mù, chutshúm zó,
myín mauchut u,
gùnggàm tîng tîng nòq é hkûn,
myiwe hau é yhûm shut,
sô wang e ló bê nghut ri.
10 Haú hkûn, shiwa myhí su kut
mèbu wùt chûng mù,
a ge é i‑myìt wun é myiwe rayùq,
yhang lé lhom te yu ri.
11 (Myiwe haû gi, htêlé htêgyâng dùt mù,
târâ a châng é sû nghut luî,
yhûm má, yhâng é hkyî
hkâ-nhám le a no sû nghut ri;
12 razùp má gi, gaì hkyô shut,
razùp má gi, lam é shiwa jowò shut kut,
hkyô chyûn hkangmó má,
haq juí wú wún ri.)
13 Yhang gi, zorâm haú lé zuî zing to mù,
bo-puq puq byi luî, hoq a sê é myòqdông èq,
14 “Ngá yhûm má,
zùmhkaû hkungga sho jòq lhê;
ngò dangshikaq tô tô é hkyô lé,
hkû-nyí lhoqdìk bê nghut lhê.
15 Haû mù, ngò gi, nang lé,
lé huî é nghut lhê; ho shi-kùt luî,
nang lé wó myang hô bê nghut ri!
16 Ngò gi, Egutuq ming mâ é,
isâm bo é nú nhâm é pán lé,
ngá é yhuphpyang má,
hkâng tô bê nghut lhê.
17 Ngò gi, ngá é yhuphpyang má,
namngón jung nghut é,
mura, achyo eq muza gàm a-mùn lé,
hpyûn nhâm to bê nghut lhê.
18 Lé aq, nàpsûn myòq myàng shoq,
ngón kún ye kún gòq;
rayùq eq rayùq chyitdàp lhûm kún gòq!
19 Ngá é yhûmsîng hpó gi,
wê é gyung hkyô htoq ló byùq bê nghut mù,
yhûm má a nyì nghut ri.
20 Yhang gi, yhâng é ngùnhtûng má,
ngùn byíng shoq kat wun chûng bê nghut mù,
lhôgûng za a jé le, taû lò râ a nghut.” ga taî ri.
Yháng Htung Tô É Lhaí Má Zorâm Zo Myí É Hkyô
21 Yhang gi, dang ngón dang nguî dông mai,
zorâm haú lé hkyô shuî nghoq mù,
yhang, dang dàt taî é yánmai,
zorâm haú lé lângnghoq yû bê nghut ri.
22-23 Zorâm zo haû gi,
yhâng é nhiklhum má,
myoshi htaû kyâng kat é su gâ é
hui zo shoq,
tuî lhûng to huî é byù nghâ su le,
sat huî râ matú e ló é nohtó su le,
radá dâm yhâng htâng châng e ló ri;
yhang gi, yhûmsing chyungxe sum râ nghut é
nghoqlhaí lé a sê é za
din wang ló é nghoq zo su nghut nyi ri.
Nhut Chyut É Myiwe Myhí Lé Koi Pyám Râ Hkyô
24 Haû mù, ngá zô pé ê, ahkuî,
ngò taî é dang lé gyô yù keq;
ngò haî taî é lé,
myìt lòm tung gyô yù keq.
25 Myiwe myhí haú yùq é hkyô shut,
náng myìt hkâlhing ló;
yhang sô é hkyô má le,
hkâsô nghoq wang ló.
26 Yhang gi, myo myo lé,
asho awui yhang
hpuzo nhâng bê nghut é htoq agó,
ajùm ayò lé le sat pyâm bê nghut ri.
27 Yhâng é yhûm gi,
mosumhkung shuî jé é hkyô mó nghut mù,
shî zaû é wàp má shuî jé é jang nghut ri.