Hkya-on Kúngton É Dang
149
Haû Yhûmsîng Garai lé,hkya-on keq.
Haû Yhûmsîng Garai lé,
mahkôn sik èq mahkôn hkôn keq;
Yhâng é sân-yúng bang zùp zîng é má,
Yhang lé hkya-on keq.
2 Isira-elaq byu pé gi,
yhángmòq lé hpân Su chyáng,
gabú byam chyu kó sháng gàq;
Zi-un mâ é byu pé gi,
yhángmòq é Hkóhkam chyáng,
gabú bûm kó sháng gàq.
3 Yhángmòq gi, mahkôn gó uchyang,
Yhâng é myìng lé hkya-on mù,
tíng eq chapchéng bàt luî,
Yhang lé mahkôn hkôn kó sháng gàq.
4 Hkâsu mù gâ le, Yhûmsîng Garai gi,
Yhâng é byu pé lé myìt ngui nyi lhê;
Yhang gi, i‑myìt lhoqnyhûm sû lé,
jánmaú dông hkyi yù hkyô byî é nghut lhê.
5 Haû sân-yúng bang gi,
xânghpoq nge wó hkyô haú má gabú byam chyu mù,
yhángmòq é yhuphpyang má,
gabú mahkôn hkôn kó sháng gàq.
6 Yhángmòq é nhut má gi,
Garai Gasang lé hkya-on dang bo nyì mù, yhángmòq é lòq má gi,
shámsó í shut htoq é shâm,
chûng kó sháng gàq.
7 Haû gi, gótû a-myû wuì lé,
lató hpuq mù, byù myû wuì lé,
dam byi râ matú nghut lhê.
8-9 Yhángmòq gi, yhángmòq é hkóhkâm lé tuî kîng to mù,
yhángmòq é zaugun sûwún wuî lé,
shâmtoq kyum hut to luî,
haû kâ tô é eq rajung za,
yhángmòq lé târâ jéyáng kôrâ nghut lhê.
Haû gi, sân-yúng bang bànshoq é
hpungwup shingkang nghut lhê.
Haû Yhûmsîng Garai lé,
hkya-on keq.