Nyì Mî‑nyî, Jòq Mîjòq, Yhûmsîng Garai Lé Hkya-on Sháng
148
Haû Yhûmsîng Garai lé,hkya-on keq.
Mauhkûng mai,
haû Yhûmsîng Garai lé hkya-on keq,
myhang é jowò mai,
Yhang lé hkya-on keq.
2 Yhâng é maumang bànshoq ê,
Yhang lé hkya-on keq;
mauhkûng mâ é bang bànshoq ê,
Yhang lé hkya-on keq.
3 Buì eq lha-mó ê,
Yhang lé hkya-on keq;
dùq bó é kyî pé bànshoq ê,
Yhang lé hkya-on keq.
4 Myhang htâng é mauhkûng nàng ê,
Yhang lé hkya-on aq;
maulat htoq mâ é wuì núngmòq ê,
Yhang lé hkya-on keq.
5 Yhángmòq gi,
haû Yhûmsîng Garaî é myìng lé,
hkya-on kó sháng gàq;
hkâsu mù gâ le, Yhang gi,
haú pé lé, Yhâng é hkunmó èq,
hpan tô é nghut ri.
6 Yhang gi, haú pé lé, yhâng é yhang,
ahtum abyùq jòq nhang to bê nghut ri;
Yhang gi, hkâ-nhám le,
a laî byùq râ nghut é târâ wàng hkunmó lé,
byî to bê nghut ri.
7 Myìdàm htoq mai,
haû Yhûmsîng Garai lé hkya-on keq;
wuimau má nyi é gaunyhaú mó pé eq,
wuiming nìk jang mâ é bànshoq,
8 maulhap eq lìkwò,
gyo eq mhut pé,
Yhâng é hkunmó châng é laìdun mó,
9 bùm pé núngmòq eq kong pé bànshoq,
shigâm eq kyám gâm pé bànshoq,
10 tân jung gaunyhaú pé eq no myang bànshoq,
tiq é kângsoq bo é dui jung pé eq maulat nghoqzô pé,
11 myìdàm htoq mâ é hkóhkam pé eq,
a-myû wuì bànshoq,
zaugun wuì núngmòq eq,
myìdàm htoq mâ é ùphkâng bang bànshoq,
12 zo-myi zorâm wuì,
mangzo zoshâng wuì bànshoq,
Yhang lé hkya-on keq.
13 Haû Yhûmsîng Garaî é myìng za,
hkya-on wàq toq huî é nghut mù,
Yhâng é myìng lé hkya-on kó sháng gàq;
Yhâng é dùq wìk hkyô gi,
mauhkûng eq myigùng ahtoq má,
jòq nyi ri.
14 Yhang gi, Yhâng é byu pê é matú,
hkyuî lhoqtoq lhoqmyhang tô ri;
haû gi, Yhang nhik htûng é,
Isira-elaq byu pé eq,
Yhâng é sân-yúng bâng é matú,
hkya-on hkyô htoq é nghut ri.
Haû Yhûmsîng Garai lé,
hkya-on keq.