A-tsam Dìk Shoq Bò Sû Lé Hkya-ôn É Dang
147
Haû Yhûmsîng Garai lé,hkya-on keq.
Ngá-nhûng é Garai Gasang lé,
mahkôn hkya-ôn é gi,
hkâ-í yhang ge ri myhî-nhung!
Yhang lé hkya-ôn é gi,
hkâ-í yhang gabú hkyô eq,
kut gíng é hkyô nghut ri myhî-nhung!
2 Haû Yhûmsîng Garai gi,
Yerusalem wà mó lé dum xuq tô é nghut mù,
shúm zung é Isira-elaq byu pé lé,
shuî tsîng yu é nghut ri.
3 Yhang gi, gyòp byùq bê
i‑myìt nhiklhum lé,
lhoqgê lhoqyô byi mù,
yhángmòq é dàm lé,
htup byî é nghut ri.
4 Yhang gi, kyî pé lé nghap cham tap byi mù,
myìng du htau luî, yhángmòq lé wùt é nghut ri.
5 Ngá-nhûng é Yhûmsîng Garai gi,
gyaú Sû nghut mù,
a-tsam dìk shoq bò Sû nghut ri;
Yhâng é sê gyô é u-nuq gi,
htum nghu é a jòq.
6 Haû Yhûmsîng Garai gi,
myìt lhoqnyhûm bang lé,
wùn wàq nyì mù,
agè ashop bang lé kúm gi,
myigùng shut hkyô pyâm é nghut ri.
7 Haû Yhûmsîng Garai lé,
jeju hkya-on mahkôn hkôn keq;
ngá-nhûng é Garai Gasang lé,
tíng pé bàt luî hkya-on keq.
8 Yhang gi, maulat lé,
mhut èq nghop pyám luî,
myigùng má maú wo gyun nhâng mù,
kong pé má wàhu mhan yùq nhang é nghut ri.
9 Yhang gi, no myang lé le,
mying nyi é nghoqnòq zô pé lé le,
zoshuq lajang byî ri.
10 Yhang gi, myâng é wum-o lé,
gabú é a nghut;
byu é hkyî wum pé lé le,
myìt ngui é a nghut.
11 Haû Yhûmsîng Garai gi,
Yhang lé gyùq hkúngga mù,
Yhâng é ru gîng nyi é chyitdàp myìt má,
myìt myòqbyu nyi é bang lé,
myìt nguì ô nau ri.
12 Yerusalem wà mó ê,
Yhûmsîng Garai lé,
hkya-on wàq toq keq;
Zi-un ê,
náng é Garai Gasang lé,
hkya-on kúngtôn keq.
13 Hkâsu mù gâ le, Yhang gi,
náng é wà hkumkyáng lé,
wum lhoqhtân byi mù,
náng chyáng mâ é náng é byu pé lé,
shimân byî é nghut ri.
14 Yhang gi, náng é maukyo pé lé,
nguì ngón nhâng mù,
ge dik é súngsô pê èq,
nang lé nhik lhoqdìk nhang é nghut ri.
15 Yhang gi, myìdàm htoq má,
hkunmó hkyó mù,
Yhâng é dang gi,
han dik é dông htoq lo ri.
16 Yhang gi, sau hpyû maú lé su,
gyo lé hkyô kat mù,
myiwap lé su, nghânhpyû pé lé sân kat ri.
17 Yhang gi, lùqjàp pé lé su,
Yhâng é lìkwò lé dú hkyô kat ri.
Yhâng é gyòq ngám é hkyô lé,
ó yùq wá wó jan râ lhú?
18 Yhang gi, Yhâng é dang taî kat jáng,
haú pé nyé yui byùq ri;
Yhang gi, Yhâng é laì zo lé mùt nhâng jáng,
wuì pé yui lo ri.
19 Yhang gi, Yhâng é dang lé,
Yakup chyáng tûn shit mù,
Yhâng é târâ eq târâ wàng hkunmó lé,
Isira-elaq chyáng tûn shit bê nghut ri.
20 Yhang gi, haú hkyô lé,
gótû a-myû wui chyáng,
a kut byi nghut ri.
Haú bang gi, Yhâng é târâ pé lé,
a sé kó nghut ri.
Haû Yhûmsîng Garai lé,
hkya-on keq.