Dawiq é hkya-on kúngtôn dang.
Hkya-on Kúngtôn Dang
145
Ngá é Garai Gasang nghut é,hkóhkâm ê, ngò gi,
Nang lé hkya-on wàq toq râ;
ngò gi, Náng é myìng lé,
ahtum abyùq hkya-on râ nghut lhê.
2 Ngò gi, nyí wuî Nang lé hkya-on mù,
ahtum abyùq, Náng é myìng lé,
hkya-on wàq toq râ nghut lhê.
3 Haû Yhûmsîng Garai gi,
gyaú Sû nghut mù,
gyai yhang hkya-on gíng Sû nghut ri.
Yhâng é kô làm hkyô lé gi,
ó le ung kê é a nghut.
4 Pyàt bán rabán mai rabán lé,
Náng é múzó hkyô,
taî kyô lhum râ nghut lhê;
Yhángmòq gi,
Nàng kut é múzó mó lé,
taî kyo kôrâ nghut lhê.
5 Yhángmòq gi, hkìkhkâm luî,
hpungwup shingkang bo é,
Náng é kô làm hkyô lé taí kôrâ;
ngò gi, Náng é maúhpo múzó hkyô lé,
myìt lhîng hkyùq wú râ nghut lhê.
6 Yhángmòq gi, Náng é gyùq mau nhô zâ é,
múzó pê é a-tsam lé taî kyo kôrâ;
ngò gi, Nàng kut é,
lòqmú mó pé lé taî pyô râ nghut lhê.
7 Yhángmòq gi, Náng é,
gyaí ge é hkyô lé,
chôm gabú kômù,
Náng é díngmán hkyô lé,
gabú mahkôn hkôn kôrâ nghut lhê.
8 Haû Yhûmsîng Garai gi, jeju byî é eq
shogyo nhikmyîn é Sû nghut mù,
luì za nhikjum a yô é za,
chyitdàp myìt kô dik Sû nghut ri.
9 Haû Yhûmsîng Garai gi,
bànshoq bang lé ge é hkyô shit mù,
Yhang hpan tô é lhúnglháng lé,
shogyo nhikmyîn nyì Sû nghut ri.
10 Yhûmsîng Garai ê,
Nàng hpan tô é lhúnglháng gi,
Nang lé hkya-on râ nghut mù,
Náng é sân-yúng bang gi,
Nang lé hkya-on wàq toq kôrâ nghut lhê.
11 Yhángmòq gi, Náng é mîngdán mâ é,
hpungwup shingkang lé,
taî kyo mù, Náng é a-tsam mó lé,
taî htoq kôrâ nghut lhê.
12 Haú hkûn, byù bànshoq bang gi,
Náng é a-tsam mó bo é lòqmú pé eq,
hkìkhkâm luî hpungwup shingkang bo é,
Náng é mîngdán hkyô lé,
wó sé kôrâ nghut lhê.
13 Náng é mîngdán gi,
ahtum abyùq é mîngdán nghut luî,
Náng é ùp sîng hkyô gi,
pyàt bán hkangmó ru gîng nyi é nghut ri.
Haû Yhûmsîng Garai gi,
Yhang danghtum htûm tô é pé bànshoq lé,
jujúm é nghut mù,
Yhang hpan tô é lhúnglháng lé,
chyitdàp myìt shit é nghut ri.
14 Haû Yhûmsîng Garai gi,
lèqbàt bang bànshoq lé,
tu toq yû mù,
lhoqnyhum huî é bang bànshoq lé,
lhoqtoq yu é nghut ri.
15 Myòqjí dàp é bang bànshoq gi,
Nang lé chyat tu wú kômù,
Nàng gi, ahkyíng hkyak má yhang,
yhángmòq lé zoshuq byî é nghut ri.
16 Nàng gi, Náng é lòq lham luî,
duì mîduî ô nau é lé,
nhik lhoqdìk byî é nghut ri.
17 Haû Yhûmsîng Garai gi,
Yhâng é hkyô hkangmó má,
díngmán é nghut mù,
Yhang hpan tô é lhúnglháng lé,
chyitdàp myìt shit é nghut ri.
18 Haû Yhûmsîng Garai gi,
Yhang lé wùt dûng é bang bànshoq eq le,
haû tengmán é dông,
wùt dûng é bang bànshoq eq le,
chyâng htèp nyi é nghut lhê.
19 Yhang gi, Yhang lé
gyùq hkúngga bang ô nau é hkyô lé,
lhoqdìk byî ri;
Yhang gi, yhángmòq wùt dûng ngau é lé,
gyo byi mù, yhángmòq lé hkyi yu ri.
20 Haû Yhûmsîng Garai gi,
Yhang lé chyitdàp é bang bànshoq lé, wú zúng byî ri;
nghut kôlhang, agè ashop é bang
bànshoq lé gi, lhoqhtên pyám râ nghut lhê.
21 Ngá é nhut gi,
haû Yhûmsîng Garai lé,
hkya-ôn é dang taí râ nghut lhê;
duì mîduî gi,
Yhâng é chyoiyúng myîng lé,
ahtum abyùq hkya-on kó sháng gàq.