Dawiq é jidang.
Ûngmyuq Hkyô Wó Luî Jeju Hkya-ôn É Dang
144
Haû Yhûmsîng Garai,ngá é Lungmó Zîng gi,
hkungsô wó nyî sháng gàq;
Yhang gi, ngá é lòq lé gyè hpàqchyî mhoq byi mù,
ngá é lòqnyhui lé majan hpàqchyî
mhoq byî é nghut ri.
2 Yhang gi, ngá é chyitdàp Garai Gasang,
ngá é gingtíng jowò, ngá é langchyi,
ngo lé hkyi yù Sû, ngá é gòlong eq,
ngò nghêhkau nyì Sû nghut lhê.
Yhang gi, byu pé lé,
ngá é a‑ô má to byî é nghut lhê.
3 Yhûmsîng Garai ê,
byù gi, haî wá nghut mù,
Nàng, yhang lé wú gôn nyi lhê lhú?
Xângzo byù gi, haî wá nghut mù,
Nàng, yhang lé bûn nyi lhê lhú?
4 Byù gi, soq rashê su za nghut mù,
yhâng é buìnyì pé gi,
hân za laî ló byùq é wùpzo su za nghut ri.
5 Yhûmsîng Garai ê,
Náng é mauhkûng lé lhoqnyhûm mù,
gyó lé lô àq; bùm pé lé lé záng aq;
haú hkûn, yhángmòq,
myihkau htoq kôrâ nghut lhê.
6 Maulhap hpyat nhâng mù,
gye pé lé lhoqpyo pyám aq;
Náng é myoshi lé bìk kat mù,
yhángmòq lé lhoqshuk pyám aq.
7 Myhang é jowò mai,
Náng é lòq lé lhâm hkyô kat àq;
wuì mó mai le, byù bíng pê é lòq mai le,
ngo lé hkyi xe yù àq;
8 Yhángmòq é nhut gi,
mhaû é dang chyat taí kômù,
yhángmòq é lòqyo lòq pé gi,
mhaû dâkam akô nghut ri.
9 Garai Gasang ê, ngò gi,
Náng lé, mahkôn sik ralhum hkôn râ;
tíng tui raxê hkat dàp é tîng èq,
ngo, Nang lé bàt kyo râ nghut lhê.
10 Nàng gi, hkóhkam pé lé,
ûngmyuq hkyô byi Sû nghut mù,
Náng é duìnhâng zoshâng Dawiq lé,
shámsó mai hkyi yu é nghut ri.
11 Byù bíng pê é lòq mai,
ngo lé hkyi xe yù àq;
yhángmòq é nhut gi,
mhaû é dang chyat taí kômù,
yhángmòq é lòqyo lòq pé gi,
mhaû dâkam akô nghut ri.
12 Haû mù, ngá-mòq é yhang zo yùqzô pé gi,
zorâm pyàt mai,
yùq kô lo é agàm pé su dùt mù,
ngá-mòq é byìzo pé gi,
hkóhkâm wâng lé mhón râ matú,
kyûng mhôn tô é pyîlàt zìng pé su,
dùt kôrâ nghut lhê.
13 Ngá-mòq é chyî pé gi,
ajung jung byíng zan to mù,
ngá-mòq é sau pé gi,
ngá-mòq é yò pé má, mun mun sen sen
myo luq jebe lò râ nghut lhê.
14 Ngá-mòq é nohtô pé gi,
zè myo myo wó hto râ nghut lhê.
Wàhkûm lé,
wó lhoqhput râ a nghut lo;
shúm zung é le jòq râ a nghut lo;
wà hkyô pé má le,
iyon yon htê wó gyo râ a nghut lo.
15 Haû su nyi laî é byu pé gi,
hkungsô wó nyi ri;
haû Yhûmsîng Garai lé,
yhángmòq é Garai Gasang gâ é
byu pé gi, hkungsô wó nyi ri.