Dawiq é jidang.
Garúm Yû Râ Matú Kyûdûng É Dang
143
Yhûmsîng Garai ê,ngá é kyûdung dang lé gyo byi mù,
shogyo nhikmyîn yù râ matú,
ngo wùt dûng ngau é lé,
gyô yù byi aq;
Náng é jujúm hkyô eq,
díngmán hkyô má cháng mù,
ngo lé gyo byi aq.
2 Náng é duìnhâng zoshâng ngò lé,
târâ hkâ jéyáng;
hkâsu mù gâ le,
chyungxe dui nyi é bang ó yùq le,
Náng é hí má a díngmán kó nghut ri.
3 Haû gyè hpó gi,
ngo lé châng hkat mù,
myigùng jé shoq,
ngo lé lhoqhkyop pyâm ri;
yhang gi, myáng myáng mai,
shi byùq bê bang lé su, ngo lé,
mauchut hkaû má nyì nhang tô ri.
4 Haû mù, ngá é i‑myìt sô gi,
ngá é ahkaû má chut ló byùq mù,
ngá é i‑myìt gi, ngá ahkaû má
gyùq chiq byùq bê nghut ri.
5 Ngò gi, a‑nham lhê é buìnyì pé lé,
myìtbun mù, Náng é múzó bànshoq lé, myìt tû wú luî,
Náng é lòq èq kut é pé lé,
myìt wú nyi é nghut lhê.
6 Ngò gi, Náng chyáng,
lòq lhâm kat lhê;
ngá é i‑myìt sô gi,
kyuq byùq bê maumyî su,
Nang lé mùt shit ô nau nyi ri. Sela
7 Yhûmsîng Garai ê,
ngo lé han gyo byi aq;
ngá é sô htûm ló bê.
Ngá chyáng mai,
Náng é myòqdong hkâhaq pyám;
haû nghut jáng,
ngò gi, donghkong mó má,
gyó wang é bang su dùt râ nghut lhê.
8 Ngò gi, Nang lé lùmhkau nyi é yánmai,
Náng é ru gîng nyi é chyitdàp dang,
nàpkyó lé, ngo lé shit kyo aq.
Ngá é i‑myìt sô gi,
Nang lé tu wú nyi é yánmai,
ngò hká shut e ló râ hkyô lé,
tûn shit àq.
9 Yhûmsîng Garai ê,
ngò gi, Náng chyáng hpang lo é nghut mù,
ngá é gye pê chyáng mai,
ngo lé hkyi xe yù laq.
10 Nàng gi,
ngá é Garai Gasang nghut é yánmai,
Nàng ô nau é hkyô kut râ matú,
ngo lé mhoq byi aq;
Náng é ge é Sô gi,
ngo lé, nguì ngón é jowò má,
shuî ló sháng gàq.
11 Yhûmsîng Garai ê,
Náng mying é matú,
ngá chyungxe lé mâgum to aq;
Náng é díngmán hkyô má cháng mù,
wuîhke hkyô mai,
ngo lé lhoqlhut yû àq.
12 Náng é ru gîng nyi é chyitdàp myìt mai, ngá é gye pé lé
lhoqhtên pyám byi aq;
ngò gi, Náng é
duìnhâng zoshâng nghut é yánmai,
ngá é gye pé bànshoq lé,
lhoqhtên pyám byi aq.