Dawiq lùqhkyûng má nyi tô é hkûn, Masiki tíng bàt luî, hkon é jidang eq kyûdung dang.
Garúm Yû Râ Matú Kyûdûng É Dang
142
Ngò gi, htê mó èq,Yhûmsîng Garai lé,
wùt dûng é nghut lhê.
Ngò gi, hkyunghtê lhoqmyhâng mù,
shogyo nhikmyîn yù râ matú,
Yhûmsîng Garai lé kyûdûng é nghut lhê.
2 Ngò gi, Yhâng é hí má,
nhik a dìk dang pé hut bum shit mù,
ngá é wuîhke jamjau hkyô pé lé,
taî kyô é nghut lhê.
3 Ngá é ahkaû má,
ngá é i‑myìt sô,
chut ló byùq é hkûn,
Nàng za ngá é hkyô lé,
sé byî é nghut lhê.
Byu pé gi, ngò sô e ló é hkyô má,
ngá é matú,
tuihkyó haq hkyô to bekô nghut ri.
4 Ngá é lòqyo hkyam shut wú aq;
ngá é matú ó le a bo myìt byi nghut ri.
Ngò gi, nghêhkaû jowò a wó;
ngá é chyungxe lé bo myìt chiq byî é sû,
ó le a nyì nghut ri.
5 Yhûmsîng Garai ê, ngò gi,
Nang lé wùt dûng é nghut lhê;
“Nàng gi, ngá é nghêhkaû jowò eq,
myìdàm má ngò chyungxe dui nyi é u,
ngá é gàmbùm nghut nyi ri.” nghû,
ngo taî é nghut lhê.
6 Ngò gi, asho awui yhang dùt nyi é yánmai,
ngò wùt ngau é dang lé gyo byi aq;
ngo lé châng hkat é bang gi,
wum lûm bò kô é yánmai,
yhángmòq chyáng mai,
ngo lé hkyi yù àq.
7 Ngò gi, Náng é myìng lé,
wó hkya-on sháng gàq,
ngo lé htóng mai lhoqlhut yû àq.
Haú hkûn, Nàng ge é hkyô,
ngo lé shit é yánmai,
haû díngmán bang gi, ngá chyáng,
lé zîng bùm kôrâ nghut lhê.