Dawiq é jidang.
Myín É Kyûdung Dang
141
Yhûmsîng Garai ê,ngò gi, Nang lé wùt dûng nyi lhê;
ngá chyáng hân lé lô àq.
Ngò, Nang lé wùt dûng é hkûn,
ngá é htê lé gyo byi aq.
2 Ngá é kyûdung dang gi,
Náng é hí má, namngón shôm su,
ngò lòq tû kyûdûng é hkyô gi,
myín lé nhong é hkungga su,
nghut nyî sháng gàq.
3 Yhûmsîng Garai ê,
ngá é nhut lé ùpzúng byi mù,
ngá é nhuthkum lé wú zúng byi aq.
4 Ngá é i‑myìt nhiklhum gi,
agè ashop hkyô kut bang eq rahá,
agè ashop é múzó má,
a bo wang lòm sháng gàq,
agè ashop é hkyô má,
hkâ-myùp ló nhâng;
yhángmòq é nghâm é zoshuq lé,
ngo lé hkâzo nhâng.
5 Díngmán sû gi,
ngo lé nhuq sháng gàq;
haû gi, jeju nghut ri;
ngo lé tân mhoqshit sháng gàq;
haû gi, ngá é ulhum mâ é,
namngón xû nghut ri.
Ngò gi, haú lé he-ngìk pyám râ a nghut.
Nghut kôlhang, agè ashop hkyô kut bâng é,
múzó lé htuqhtíng râ matú kúm,
kyûdûng é nghut lhê.
6 Yhángmòq é ùphkâng bang gi,
gampyoq mai,
dú hkyô pyâm é hui râ nghut mù,
haû agè ashop é bang gi,
ngò taî é dang pé têng é lé,
wó mhoq yû kôrâ nghut lhê.
7 Yhángmòq gi, “Byù rayùq,
myigùng lé hpuq mù, bàt nú pyâm é su,
ngá-nhûng é showui showang pé gi,
mosumhkûng é nhut hkun má,
lhoqmyhîn pyâm é huî nyi ri.” ga,
taí kôrâ nghut lhê.
8 Nghut kôlhang, Ahko Ahkáng lhúnglháng wó Sû
Yhûmsîng Garai ê,
ngá é myòqjí gi,
Nang lé za wú tsuq nyi lhê;
ngò gi, Nang lé,
nghêhkau nyi é nghut mù,
ngo lé hkâshî nhâng ô.
9 Ngá é matú hkyô tô é tuihkyó mai le,
agè ashop hkyô kut bang
htung tô é lhaí mai le,
ngo lé lhoqlhut yû àq.
10 Ngò, ngón za wó laî ló é hkûn,
haû agè ashop bang gi,
yhángmòq htung tô é lhaí má,
myí kó sháng gàq.