Htêyung ushuq kut su é matú. Dawiq é jidang.
Mâgum Yù Râ Matú Kyûdûng É Dang
140
Yhûmsîng Garai ê, ngo lé,agè ashop bâng chyáng mai,
hkyi xe yù àq;
byù wui byù hkê pê chyáng mai le,
mâgum yù àq;
2 haú bang gi, yhángmòq é i‑myìt má,
agè ashop é hpàqchyî haq htûng mù,
nyí hkangmó,
majan lhoqhtoq é bang nghut akô.
3 Yhángmòq gi, yhángmòq é shô lé,
lhângmui é shô sû chún nhang ri;
dùq htân lhângmui mó é dùq gi,
yhángmòq é nhutwuî má,
dàp tô é nghut ri. Sela
4 Yhûmsîng Garai ê,
agè ashop bâng é lòq mai,
ngo lé wú zúng yû mù,
ngo lé lèqbàt nhâng râ haq htung é,
byù wui byù hkê pê chyáng mai,
ngo lé mâgum yù laq.
5 Nghutbûn é bang gi,
ngá é matú tui haq hkyô tô akô;
yhángmòq gi, ngò e ló é hkyô má,
gùn le hkâng to, lhaí le htung to,
kut akô nghut ri. Sela
6 Yhûmsîng Garai ê,
“Nàng gi, ngá é Garai Gasang nghut lhê.” nghû,
ngò, Nang lé taî é nghut lhê.
Yhûmsîng Garai ê,
shogyo nhikmyîn yù râ matú,
ngò wùt dûng ngau é htê lé,
gyo byi aq.
7 Ahko Ahkáng lhúnglháng wó Sû Yhûmsîng Garai,
wum-o mó bo é ngá é hkyi yù Sû ê,
Nàng gi, majan htoq é buìnyì má,
ngá é ulhum lé gò byî é
gòlong nghut ri.
8 Yhûmsîng Garai ê,
agè ashop bang myìt ô nau é hkyô lé, hkâgyo byi;
yhángmòq hen tô é hkyô pé lé,
hkâ ûngmyuq nhâng,
haû a nghut jáng,
yhángmòq nghutbûn lò kôrâ nghut lhê. Sela
9 Ngá é lhînghkyùq má lóm to bâng é
nhutwuî mai htoq é agè ashop dang gi,
yhángmòq é ulhum má yhang jé sháng gàq.
10 Yhángmòq é ahtoq má,
gyúng é myigye gyó ke sháng gàq;
yhángmòq gi, myi má le,
hkâ-nhám le a wó htoq lô râ nghut é
ga-po htum mó má le,
dú hkyô pyâm é hui kó sháng gàq.
11 Lùmù gànsang é bang gi,
maumyî haú má,
a wó gîng nyì kó sháng gàq;
wuîhke jamjau mó gi,
haû byù wui byù hkê pé lé,
lhoqhtên pyám sháng gàq.
12 Haû Yhûmsîng Garai gi,
hpuzô nyi é bang lé,
târâ ràp-rá hkyô byi mù,
asho awuî é bang lé,
wùn wàq nyi é hkyô lé,
ngo sê lhê.
13 Gè gè yhang, díngmán bang gi,
Náng é myìng lé hkya-on mù,
myìt díng bang gi, Náng é hí má,
chyungxe dui nyì kôrâ nghut lhê.