Htêyung ushuq kut su é matú. Dawiq é jidang.
Lhúnglháng Lé Sê É Eq Wú Ùpzúng Nyi É Yhûmsîng Garai
139
Yhûmsîng Garai ê,Nàng gi, ngo lé,
chyam wú luî, sé bê nghut ri.
2 Nàng gi, ngò,
zung tô é eq toq ló é lé,
sê nyi ri;
ngò myìt é hkyô pé lé,
Nàng gyai we mai sé byî nyi ri.
3 Ngò htoq ló é eq lèq nyi é lé,
Nàng chyam lìk wú mù,
ngá é hkyô bànshoq lé,
rago sê nyi ri.
4 Yhûmsîng Garai ê,
ngá é nhutshô mâ é dang a taî htoq shi lé lháng,
Nàng bànshoq sê nyi ri.
5 Nàng gi, ngá é hî hkûn nùng htáng, hkông lhîng to mù,
ngá é ahtoq má,
Náng lòq kê to bê nghut ri.
6 Shí sû é hpàqchyî gi,
ngá é matú maúhpo mó yhang nghut mù,
lûm nìk é nghut luî,
a ung hkyit sé nghut ri.
7 Náng é Sô mai,
ngò hká shut ge ê râ lhú?
Náng é myòq hí mai,
ngò hká shut ge hpâng râ lhú?
8 Ngò mauhkûng má dòq ló é nghut kôle,
Nàng haú má nyì râ nghut lhê;
mosumhkung má yhuphpyang saí kôle,
Nàng haú má nyì râ nghut lhê.
9 Ngò gi, nàpsûn maubó zó lé toq mù,
wê é wuimau yàm má,
ê nyî râ nghut kôlhang,
10 Nàng gi, haú má lháng,
Náng é lòq èq ngo lé shuî-u mù,
Náng é lòqyo lòq gi,
ngo lé zuî gîng to râ nghut lhê.
11 “Gè gè yhang, mauchut gi,
ngo lé haq pyám râ nghut mù,
haû maubó gi, ngá é lhînghkyùq má,
myín dùt byùq râ nghut lhê.” nghû,
ngò taî kôle,
12 mauchut gi, Náng é hí má,
mau a chut nghut ri;
Náng é matú, mauchut gi,
maubó su nghut nyi é yánmai,
myín gi, nyí su myòq myàng râ nghut lhê.
13 Hkâsu mù gâ le, Nàng gi,
ngá é akáng mâ é pé lé hpan to mù,
ngá nû é ûnghkaû má,
ngá é byù gùng zòng saî kat to byi bê nghut ri.
14 Nàng gi, gyùq chiq hkyô eq,
maúhpo hkyô dông mai,
ngo lé hpan to bê nghut luî,
ngò gi, Nang lé hkya-ôn nyi lhê.
Náng é múzó gi,
maúhpo yhang nghut nyî mù,
ngò gi, haû lhúnglháng lé rago sê nyi lhê.
15 De de a nghut é jowò má ngo lé hpân mù,
myìdàm htoq nìk é jang má,
ngo lé saî é hkûn, ngá é azòng gi,
Náng é hí má de de nghut nyi ri.
16 Ngá é gùngdu azòng a htoq shi-má,
Náng é myòqjí gi,
ngo lé myàng bê nghut ri.
Ngá é matú tô to byî é,
buìnyì pé bànshoq mâ é,
ra-nyí lé lháng ngò a myàng shi-má,
Náng é laiká bùk má,
bànshoq kâ to bê nghut ri.
17 Garai Gasang ê,
Nàng myìt é hkyô pé gi, ngá é matú,
hkâ-í yhang hpaudap ri myhî-nhung!
Haú pé gi, hkâ-í yhang,
myoluq jebê é nghut ri myhî-nhung!
18 Haú pé lé ngò ru nghap wú le gi,
se-muî jàng mâ é se-muî htoq myo râ nghut lhê.
Ngò gi, bûn lo é hkun,
Nàng eq rahá ru nghut nyi lhê.
19 Garai Gasang ê,
haû agè ashop bang lé,
Nàng sat pyám aq ô!
Byu sui lhoqhtoq naû bang ê,
ngá chyáng mai wê gâng ló byùq keq!
20 Yhángmòq gi, Nang lé,
agè ashop é dâng èq htung kômù,
Náng é gye pé gi,
Náng é myìng lé, a nghut é dông,
chung jai nyi akô nghut ri.
21 Yhûmsîng Garai ê,
Nàng a ngui é bang lé,
ngò le a nguì kut lhê, a nghut lhî?
Nang lé toq htuqhtîng é bang lé,
ngò chaq pyâm lhê, a nghut lhî?
22 Ngò gi, haú bang lé,
a naù a wôm é myìt za bo ri;
ngò gi, yhángmòq lé,
ngá é gye pé nghû za,
sôn pyâm é nghut lhê.
23 Garai Gasang ê,
ngo lé jep gôn wú mù,
ngá é i‑myìt nhiklhum lé sé byi aq;
ngo lé chyam lìk wú mù,
ngò myìt myo myìt chiq é pé lé sé byi aq.
24 Ngá é ahkaû má,
a ge é hkyô bo a bo é lé wú mù,
ahtum abyùq é hkyô shut,
ngo lé shuî-û yù àq.