Dawiq é jidang.
Jeju Hkya-ôn É Kyûdung Dang
138
Yhûmsîng Garai ê, ngò gi,ngá é myìt nhiklhum bànshoq èq,
Náng lé hkya-on râ nghut lhê;
ngò gi, hparà pê é hí má,
Nang lé hkya-on mahkôn
hkôn râ nghut lhê.
2 Ngò gi, Náng é chyoiyúng noqkuq yhûm shut, ngóm gòp mù,
Náng é chyitdàp myìt eq,
Náng é jujúm hkyo é yánmai,
Náng é myìng lé hkya-on râ;
hkâsu mù gâ le, Nàng gi,
Náng é myìng eq Náng é mungdang lé,
bànshoq htoq má wàq toq to bê nghut ri.
3 Ngò, Nang lé wùt dûng é hkûn,
Nàng, ngo lé gyo byî ri;
Nàng gi, ngo lé wum byi mù,
myìt wum htân nhang é nghut ri.
4 Yhûmsîng Garai ê,
myìdàm htoq mâ é,
hkóhkam pé bànshoq gi,
Náng nhut mâ é dang lé wó gyo kôjáng,
Nang lé hkya-on kó sháng gàq.
5 Haû Yhûmsîng Garaî é hpungwup shingkang gi,
kô myang é nghut mù,
yhángmòq gi, Yhûmsîng Garaî é hkyô lé,
mahkôn hkôn kó sháng gàq.
6 Haû Yhûmsîng Garai gi,
myhang é má nyì Sû nghut kôle,
myìt nyhum é bang lé wú mâgum nyi ri;
nghut kôlhang, nghutbun sû lé gi,
we we mai wú sê nyi ri.
7 Ngò gi, wuîhke jamjau hui zô nyì kôlhang,
Nàng gi, ngá é chyungxe lé magûm byi ri;
Nàng gi, Náng é lòq lé lhâm kat mù,
ngá é gye pé nhikjum yô é lé,
htuqhtíng byi mù,
Náng é lòqyo lòq èq,
ngo lé hkyi yu é nghut ri.
8 Haû Yhûmsîng Garai gi,
ngá é matú, Yhang myìt sôn tô é hkyô, lhoqdìk râ nghut lhê;
Yhûmsîng Garai ê,
Náng é chyitdàp myìt gi,
ahtum abyùq ru gîng nyi ri;
Náng é lòqmú pé lé hkâtô pyâm to.