Ngá-mòq Lé Ùpzúng Sû Garai Gasang
91
Myhang htáng Su é gaû é jowò má nyi é sû gi,Wum-o a-tsam dìk shoq bò Su é wùpzo hkaû má,
myang nô nyì râ nghut lhê.
2 Ngò gi, Yhûmsîng Garai lé,
“Yhang gi, ngá é nghêhkaû jang eq
ngá é gaû é gingtíng jowò,
Ngò lùmhkau é Garai Gasang nghut lhê.”
nghû taí râ nghut lhê.
3 Gè gè yhang, Yhang gi, nang lé,
nghoq lhaí htûng bâng é lhaí mai le,
shi é jung nò wúm mai le,
hkyi yù râ nghut lhê.
4 Yhang gi, nang lé,
Yhâng é dung èq nghop byi mù,
nàng gi, Yhâng é dùng ô má,
myang nghêhkaû râ nghut lhê;
Yhâng é jujúm hkyô gi,
náng é gòlong eq
gyè bu dùt byi râ nghut lhê.
5 Nàng gi, myín é gyùq chiq hpo lé,
a gyùq râ nghut é htoq agó,
nyí lé dâng lo é myoshi lé le,
gyùq râ a nghut.
6 Mauchut má dùt htoq lo é nò wúm lé le,
nyí-káng lé lhoqhpyoq lhoqhtên é
wúm pé lé le,
nàng a gyùq ra râ nghut lhê.
7 Náng é nàm má byù rahkyîng,
náng é lòqyo hkyam má byù ra-mun,
lêng shi lèq ló kôlhang,
haû gi, nang lé wó záng râ a nghut.
8 Nàng gi, náng é myòq èq byu wú mù,
agè ashop bang lé dam byî é hkyô lé,
wó myâng râ nghut lhê.
9 Nàng gi, Myhang htáng Sû lé,
náng é nyì jowò kut mù,
ngá é nghêhkaû jowò nghut Sû,
haû Yhûmsîng Garai lé lháng,
náng é nyì jowò kut é nghut jáng,
10 wuîhke jamjau hkyô gi,
náng chyáng jé râ a nghut é htoq agó, náng é zúm má le,
byò dàn byò sho jé râ a nghut.
11 Hkâsu mù gâ le, Yhang gi,
náng é hkyô hkangmó má zúng byi râ matú,
nàng eq séng luî, Yhâng é maumang lagyo pé lé,
hkunmó hkyô to râ nghut lhê.
12 Yhángmòq gi, lùqgòk má
náng é hkyî a ló htung sháng gàq ga,
yhángmòq é lòq èq
nang lé wàq toq to râ nghut lhê.
13 Nàng gi, hkanghkyi eq lhângmuì lé,
wó dòq nâng lai mù,
hkanghkyi zo eq dùq htân lhângmuì mó lé,
nâng pyeq pyám râ nghut lhê.
14 Haû Yhûmsîng Garai taî é gi,
“Yhang gi, Ngo lé chyitdàp é yánmai,
Ngò gi, yhang lé hkyi xe yù râ nghut lhê;
Yhang gi, ngá é myìng lé rago sê é yánmai,
ngò gi, yhang lé ùpzúng râ nghut lhê.
15 Yhang gi, Ngo lé wùt dung râ nghut mù,
Ngò gi, yhang lé tu byi râ nghut lhê;
Ngò gi, yhang wuîhke hui jáng,
yhang eq rahá nghut nyî mù,
yhang lé hkyi yù luî,
yhang lé xânghpoq nge wó nhâng râ nghut lhê.
16 Ngò gi, yhang lé,
chyungxe hîng nhang é dông nhik dìk nhâng mù, yhang lé,
Ngá é hkyi yù hkyô shit râ nghut lhê.” gâ ri.