Bánno Buìnyi é jidang.
Hkya-on Kúngtôn Dang
92
Yhûmsîng Garai ê,Nang lé hkya-ôn le ge ri;
Myhang htáng Sû ê,
Náng é myìng lé
hkya-on mahkôn hkon le ge ri.
2 Nàpsûn lé,
Náng é ru gîng nyi é chyitdàp myìt lé taî pyô mù, myín lé,
Náng é jujúm myìt lé taî pyô luî,
3 tui raxê hkat dàp é tíng htê eq
htê ngón é tíng pé mai hkya-ôn le ge ri.
4 Hkâsu mù gâ le, Yhûmsîng Garai ê,
Náng é múzó gi,
ngo lé gabú nhâng mù,
ngò gi, Náng é lòqmú lé,
gabú hkya-on mahkôn hkôn râ nghut lhê.
5 Yhûmsîng Garai ê,
Náng é múzó gi, hkâ-í yhang kô rî-nhung!
Nàng myìt é hkyô gi, hkâ-í yhang nìk rî-nhung!
6-7 Haû agè ashop bang,
wàhu su yùq kô lò mù,
agè ashop hkyô kut é bànshoq bang,
kô lò myhang lò kô é nghut kôlhang,
yhángmòq gi, ahtum abyùq htên byòq byùq râ nghut é lé,
haû byù ngòk pé gi, a sé kó;
byù nâ pê le, a sê gyo kó nghut ri.
8 Nghut kôlhang, Yhûmsîng Garai ê,
Nàng kúm gi,
ahtum abyùq hkya-on wàq toq hui Sû nghut ri.
9 Hkâsu mù gâ le, Yhûmsîng Garai ê,
gè gè yhang, Náng é gye pé gi,
gè gè yhang ô, Náng é gye pé gi,
htûm byùq râ nghut luî,
agè ashop kut é bànshoq bang gi,
lhoqpyo pyâm é hui râ nghut lhê.
10 Nàng gi, nolám hkyuî lé su,
wum-o nghut é ngá é hkyuî lé,
wàq toq to mù,
réng é xû lé, ngá é ulhum má,
hut gyun byi bê nghut ri.
11 Ngá é gumlau gye pé sûm byùq é hkyô lé,
ngá é myòqjí èq myàng mù,
ngá é agè ashop é gye pé hpang gyùt é htê lé,
ngá é nohkyap èq wó gyo bê nghut lhê.
12 Haû díngmán bang gi,
byùm gàm su kô lò mù,
Lebanon mâ é kyám gâm su,
kô myhang lò kôrâ nghut lhê.
13 Yhángmòq gi,
Yhûmsîng Garaî é yhûm má,
hô tô é hui bê nghut mù,
ngá-nhûng é Garai Gasâng é wânghkaû má,
kô myhang lò kôrâ nghut lhê.
14 Yhángmòq gi, chyungxe zànwut kô é hkûn nghut kôle,
ashi ru zuî nyì shirâ nghut mù,
jum jum za nyui yúng nyî luî,
15 “Yhûmsîng Garai gi,
díngmán Sû nghut ri;
Yhang gi, ngá é Lungmó Zîng nghut mù,
Yhâng chyáng agè ashop é hkyô,
haî lháng a bò nghut ri.” ga,
taî pyô kôrâ nghut lhê.