4 BUK
Hkya-on Kúngtôn Laiká 90-106
Garai Gasâng é byù Mosheq é kyûdung dang.
Ahtum Abyùq É Garai Gasang Eq Xângzo Byu É hkyô
90
Yhûmsîng ê,Nàng gi, pyàt bán hkangmó má,
ngá-mòq é nyì jowò nghut nyi ri.
2 Nàng gi, bùm pé lháng,
a jòq shi mai le,
myìdàm htoq eq mingkan lé lháng,
a hpân shi mai le,
pyàt dedu ahtum abyùq yhang,
Garai Gasang nghut nyi ri.
3 Nàng gi, xângzo byù lé,
“Byu yhang zô pé ê, taû ló keq.”
ga taí luî, hpuílhup shut taû dé kat bê nghut ri.
4 Hkâsu mù gâ lé, Náng é hí má,
zànwut rahkyîng zàn gi,
laî ló byùq bê buìnyì ra-nyí su le,
myín lhê é rayòq abun zo su le,
nghut nyi ri.
5 Nàng gi, byu pé lé,
wuìhkyut su hkyut she ló mù,
yhupmòq su yu pyám byi luî,
yhángmòq gi,
nàpsun lhê é wàhu mhan asik su,
nghut nyi bum akô.
6 Wahu mhan gi, nàpsûn lé,
asik nyún htoq lô kôlhang,
myínhtâng jé jáng,
nyhuî kyuq shi byùq é nghut ri.
7 Ngá-mòq gi,
Nàng nhikjum yô é yánmai,
jôm ló nyî mù,
Nàng nhik‑ûm bùq é yánmai,
gyùq nán nyi bùm bê nghut lhê.
8 Nàng gi, ngá-mòq é a târa é hkyô pé lé, Náng é hí má tô to mù,
ngá-mòq haq shut é mara pé lé,
Náng myòq hí mâ é maubó má,
tô to bê nghut ri.
9 Ngá-mòq é buìnyì pé gi,
Nàng nhikjum yô é hui luî,
laî ló bê nghut mù,
ngá-mòq é zànwut pé gi,
i‑myìt nò-kying htê mai,
lhoqlhai bê nghut lhê.
10 Ngá-mòq é buìnyì i-pyàt gi,
nyhit xê zàn nghut ri;
wum-o bo é nghut jáng gi,
shit xê zàn wó nyi jé é nghut ri.
Nghut kôlhang, yhángmòq é buìnyì haú pé gi,
wuîhke jamjau hkyô eq
myìt myo myìt chiq hkyô chyat nghut nyi ri;
hkâsu mù gâ le, haú pé gi,
hân za laî ló byùq râ nghut mù,
ngá-nhúng gi, dâng ló byùq râ nghut lhê.
11 Nàng nhikjum yô é a-tsam lé,
ó yùq wá wó sé râ lhú?
Nang lé gyùq hkúngga gíng é í,
Náng é nhikmó-yo hkyô lé,
ó yùq wá gyùq hkúngga râ lhú?
12 Ngá-mòq gi, i‑myìt hpàqchyî byéng-yá wó yû sháng gàq,
ngá-mòq é buìnyì pé lé,
sê nghap râ matú, ngá-mòq lé mhoq byi aq.
13 Yhûmsîng Garai ê,
hkâ-myháng jé shoq láng râ lhú?
Lhing lò àq, Náng é duìnhâng zoshâng wuì lé,
shogyo nhikmyîn yù àq.
14 Nàpsûn lé, Náng é ru gîng nyi é
chyitdàp myìt èq,
ngá-mòq lé nhik dìk nhâng laq;
haú hkûn, ngá-mòq gi,
ngá-mòq é buìnyì pé bànshoq má,
wó nguî ngón luî,
gabú mahkôn wó hkôn râ nghut lhê.
15 Nàng, ngá-mòq lé,
hpuzo nhang é buìnyì pé myhó le,
ngá-mòq wuîhke jamjau huî é
zànwut pé myhó le,
ngá-mòq lé gabú nhâng àq.
16 Náng é múzó pé gi,
Náng é duìnhâng zoshâng wuì lé shit mù,
Náng é hpungwup shingkang gi,
yhángmòq é zoshâng wuì lé,
wó shit sháng gàq.
17 Ngá-mòq é Garai Gasang,
haû Yhûmsing é shogyo myìt gi,
ngá-mòq é ahtoq má jòq nyì sháng gàq;
ngá-mòq lòq mai zui saî é múzó,
ngá-mòq é matú lhoqging byi sháng gàq;
nghut bê, ngá-mòq lòq mai zui saî é múzó lé,
lhoqging byi sháng gàq.