Ezirahi byù Ehtan, masiki tíng bàt luî kat é jihkyang.
Wuîhke Huî Hkun Lhê É Jihkyang
89
Ngò gi, Yhûmsîng Garaî é chyitdàp myìt mó lé,ahtum abyùq mahkôn hkôn râ nghut lhê;
ngò gi, Náng é jujúm hkyô lé,
ngá é nhut mai,
pyàt bán bànshoq lé taî kyo râ nghut lhê.
2 Ngò gi, Náng é chyitdàp myìt,
ahtum abyùq gîng nyi é hkyô lé le,
Náng é jujúm hkyô,
mauhkûng má lhoqgîng tô ê hkyô lé le,
taî pyô râ nghut lhê.
3 Nàng taî le, “Ngò gi, Ngò hkyin yu é sû eq, dangshikaq tô to bê;
Ngá é duìnhâng zoshâng Dawiq lé,
dâkam tô é gi,
4 ‘Ngò gi, náng é awùt ashín lé,
ahtum abyùq xuq to mù,
náng é hkóhkâm tángmyhâng lé,
pyàt bán hkangmó lhoqgîng to râ nghut lhê.’ nghu é nghut lhê.” gâ ri. Sela
5 Yhûmsîng Garai ê,
mauhkûng gi,
Náng é maúhpo múzó lé hkya-on mù,
chyoiyúng bang zîng é jang má,
Náng é jujúm hkyô lé hkya-ôn akô nghut ri.
6 Hkâsu mù gâ le,
maulat htoq má nyi é ó yùq wá,
Yhûmsîng Garai lé wó whuí râ lhú?
Mauhkûng bâng pé ó yùq wá,
Yhûmsîng Garai su wó dùt râ lhú?
7 Garai Gasang gi, chyoiyúng bâng é hpong má,
chôm gyùq hkúnggâ é huî mù,
Yhâng é lhînghkyùq má nyi é bànshoq htoq má,
je gyùq kyûm hui râ é Sû nghut ri.
8 Wum-o a-tsam dìk shoq bò Sû,
Yhûmsîng Garai Gasang ê,
Nàng su dùt é ó wá nyi ri lhú?
Yhûmsîng Garai ê,
Nàng gi, a-tsam mó bò Sû nghut mù,
Náng é jujúm hkyô gi,
Náng é lhînghkyùq má jòq nyi ri.
9 Nàng gi, nghutbûn é wuimau lé,
ùp é nghut mù, toq lo é wuìlhêng pé lé,
lhoqzîm pyâm é nghut ri.
10 Nàng gi, sat hui bê byù lé su,
Rahapa lé lhoqhkyop pyám luî,
Náng é gye pé lé, Náng é wúm bo é lòq èq,
lhoqpyo pyám bê nghut ri.
11 Mauhkûng myìdàm htoq gi, Náng é nghut ri.
Mingkan eq haú má jòq é lhúnglháng lé,
Nàng hpan to bê nghut ri.
12 Maupyî mautsûng lé Nàng hpan tô é nghut luî,
Tabora bùm eq Herimon bùm gi,
Náng é myìng lé gabú luî,
mahkôn hkon akô nghut ri.
13 Náng é lòqbú gi, a-tsam mó bo ri;
Náng é lòq gi, wum mó bò mù,
Náng é lòqyo lòq gi, tu toq to bê nghut ri.
14 Díngmán hkyô eq târâ ràp-rá hkyô gi,
Náng é hkóhkâm tángmyhang é,
a-pûn awang nghut ri;
chyitdàp myìt eq jujúm hkyô gi,
Náng é hí má e ló byî é nghut ri.
15 Yhûmsîng Garai ê,
Nàng eq séng luî taî pyô râ matú
sê gyô é bang eq,
Náng é myòq hí mâ é maubó má sô é bang gi,
hkungsô wó nyi ri.
16 Yhángmòq gi, Náng mying é yánmai,
nyí nyí buì buì gabú luî,
Náng é díngmán hkyo é yánmai,
hkya-on wàq toq bum akô nghut ri.
17 Hkâsu mù gâ le,
Nàng gi, yhángmòq é hpungwup shingkang eq,
wum-o a-tsam nghut mù,
Náng é jeju mai,
ûngmyuq hkyô nghut é,
ngá-mòq é hkyuî lé lhoqtoq byî é nghut ri.
18 Gè gè yhang, ngá-mòq wó é gòlong gi,
Yhûmsîng Garaî chyáng mâ é nghut luî,
ngá-mòq é hkóhkâm gi,
Isira-elaq é Chyoiyúng Su chyáng mâ é nghut ri.
19 Radàm lé, Nàng, shing-rán dông,
Náng é jujúm bang lé taî é gi,
“Sarhê rayùq lé, Ngò wum-o byi bê nghut luî,
byù haú bang mâ é zorâm rayùq lé,
Ngò wàq toq to bê nghut lhê.
20 Ngò gi, Ngá é duìnhâng zoshâng,
Dawiq lé myang hô bê nghut luî,
yhang lé, Ngá é chyoiyúng namngón xû,
bùt byi bê nghut lhê.
21 Ngá é lòq mai yhang lé wùn wàq râ nghut mù,
gè gè yhang, Ngá é lòqbú èq,
yhang lé wum-o byi râ nghut lhê.
22 Gyè gi, hkâ-nhám le,
yhang lé wó ûng râ a nghut;
agè ashop bang le,
yhang lé wó zìk zo kôrâ a nghut.
23 Ngò gi, yhâng é gye pé lé,
yhâng é hí má bàt hkyop pyám mù,
yhang lé a nguì bang lé,
bàt kyop pyám râ nghut lhê.
24 Ngá é jujúm chyitdàp myìt gi,
yhâng eq rahá nghut nyî mù,
Ngá é myìng mai,
yhâng é hkyuî wàq toq é hui nhâng râ nghut lhê.
25 Ngò gi, yhâng é lòq lé,
wuimau htoq má ùp nhâng mù,
yhâng é lòqyo lòq lé,
wuìlàng pê htoq má kê to râ nghut lhê.
26 ‘Nàng gi, ngá Wa, ngá é Garai Gasang,
ngá é hkyi yù sû Lungmó Zîng nghut lhê.’
ga, yhang wùt taí râ nghut lhê.
27 Ngò gi, yhang lé,
zo-mún jowò má tô to mù,
myìdàm htoq mâ é hkóhkam pê htoq,
gyaú é sû dùt nhâng râ nghut lhê.
28 Ngò gi, yhang lé,
ahtum abyùq chyitdàp nyì mù,
yhang eq tô tô é Ngá dangshikaq gi,
hkâ-nhám le byòq râ a nghut.
29 Ngò gi, yhâng é awùt ashín lé,
ahtum abyùq nyhi to râ nghut mù,
yhâng é hkóhkâm tángmyhâng gi,
mauhkûng jòq gîng nyi é myháng,
jòq nyì râ nghut lhê.
30 Yhâng é zodù wuì gi,
Ngá é târâ lé tô pyám kômù,
Ngá é cháng ra târâ lé a cháng kô é nghut jáng,
31 Ngá é cháng ra târâ lé,
agòt a-û kut pyám kômù,
Ngá é hkunmó lé,
a cháng kó kut jáng,
32 Ngò gi, yhángmòq shut é marâ é yánmai,
yhángmòq lé dumbáng mó èq nhuq bàt luî,
yhángmòq shut é hkyô lé,
dam byi râ nghut lhê;
33 nghut kôlhang, Ngò gi,
Ngá é chyitdàp myìt lé,
yhâng chyáng mai wùp yu pyám râ a nghut;
Ngá é jujúm hkyô lé,
hkâ-nhám le mhaû pyám râ a nghut.
34 Ngò gi, Ngá é dangshikaq lé,
a lhoqhpyoq é htoq agó,
Ngá nhutwuî mai htoq é dang lé le,
htaî pyám râ a nghut.
35 Ngò gi, Ngá é chyoiyúng hkyô dông mai,
bànshoq radàm za dakâm bê nghut luî,
Dawiq lé mhaú râ a nghut.
36 Yhâng é awùt ashín pé gi,
ahtum abyùq nyi nyì râ nghut mù,
yhâng é hkóhkâm tángmyhâng gi,
Ngá é hí má buì su gîng nyì mù,
37 maulat mâ é jujúm é sàksé lha-mó su,
ahtum abyùq jòq nyì râ nghut lhê.” gâ ri. Sela
Hkóhkâm Sûm Byùq Luî Iyon Yôn É Mahkôn Dang
38 Nghut kôlhang, Nàng gi,
Náng é xû bùt hui sû lé,
gyai yhang nhikjum yo mù,
a hàp yù naù lo luî,
he-ngìk pyám bê nghut ri.
39 Nàng gi, Náng é duìnhâng zoshâng eq,
tô tô é dangshikaq lé tô pyám luî,
yhâng é jánmaú lé,
hpuílhaû yô má lhoqlhû pyám byi bê nghut ri.
40 Nàng gi, yhâng é wàhkûm bànshoq lé,
lhoqhpyoq pyám mù,
yhâng é gingtíng jowò pé lé,
lhoqhtên pyám bê nghut ri.
41 Laî ló é bang bànshoq gi,
yhâng é zè lé lú yu pyám byi kômù,
yhang gi, yhûmkyochâng èq,
rhoi pyâm é hui sû dùt bê nghut ri.
42 Nàng gi, yhâng é gumlau gye pê é lòqyo lòq lé,
lhoqmyhang toq to mù,
yhâng é gye pé bànshoq lé,
gabú nhâng bê nghut ri.
43 Nàng gi, yhâng é shámsó lé,
lhing pyám byi mù, majan má,
yhang lé a htuqbáng yû nghut ri.
44 Nàng gi, yhâng é hpungwup shingkang lé,
lhoqhpoî pyám byi mù,
yhâng é hkóhkâm tángmyhâng lé,
myigùng má dú hkyô pyám bê nghut ri.
45 Nàng gi, yhâng é zorâm pyàt buìnyì pé lé,
lhoqtot pyám byi mù, hoq hpu hkyo èq
yhang lé nghop pyám bê nghut ri. Sela
Lhoqlhut Yû Râ Matú A-kyû Dûng É Hkyô
46 Yhûmsîng Garai ê, Nàng gi,
hkâ-myháng jé shoq haq nyî râ lhú?
Ahtum abyùq lhú?
Náng é nhikmó-yo hkyô gi,
hkâ-myháng jé shoq myi su nyé nyî râ lhú?
47 Ngá é chyungxe gi,
hkâ-í tot é lé bun byi aq.
Nàng gi, xângzo byù bànshoq lé,
haî mù akôm má hpan tô é lhú?
48 Ó yùq wá, a shî loshoq chyungxe wó dui nyì râ lhú?
Ó yùq wá, mosumhkûng é a-tsam mai,
yhûmsing gùng lé wó hkyi yù râ lhú? Sela
49 Yhûmsîng ê,
Náng é jujúm myìt mai Dawiq lé dâkam tô é,
hí lhê é Náng é chyitdàp myìt mó gi,
hká shut nghut bê lhú?
50 Yhûmsîng ê,
Náng é duìnhâng zoshâng,
hkâsu kut rhoî huî é hkyô lé le,
a-myû bànshoq bang,
ngo lé lùmù gànsâng luî,
ngá é i‑myìt má hkâm zô nyi é lé le, myìtbun byi aq.
51 Yhûmsîng Garai ê,
Náng é gye pé gi, rhoî luî lùmù gànsâng kômù,
Náng é xû bùt byi huí su é,
hkyîbyè hkangmó lé rhoî dang taî akô nghut ri.
52 Hkya-on kúngtôn hkyô gi,
Yhûmsîng Garaî chyáng,
ahtum abyùq jòq nyì sháng gàq!
Amen! Amen!