Kora é yhang zô pê é jidang. Htêyung ushuq kut su é matú. Mahalat le‑annohti htê má cháng mù. Masiki tíng bàt luî taî é, Ezirahi byù Heman é hpàqchyî dang.
Garúm Yû Râ Matú Wùt Dûng É Dang
88
Ngo lé hkyi yù Sû Garai Gasang,Yhûmsîng Garai ê,
ngò gi, Náng é hí má,
nyí myín wùt dûng ngau nyi é nghut lhê.
2 Ngá é kyûdung dang gi,
Náng é hí má hkyang ròt sháng gàq;
ngò wùt dûng ngau é dang lé gyo byi laq.
3 Hkâsu mù gâ le,
myìt myo myìt chiq hkyô gi,
ngá é i‑myìt nhiklhum má byíng zan tô mù,
ngá é chyungxe gi, mosumhkung shut,
chyâng e ló nyî bê nghut ri.
4 Ngò gi, nìk é dong má gyo ló bâng chyáng, nghap lhôm é hui mù,
wum-o yom byùq é byù su dùt bê nghut ri.
5 Ngò gi, shi byùq bê bâng chyáng,
tô pyâm é hui mù, sat hui luî lùp má lheq tô é
byù su dùt byùq bê nghut ri.
Hau bang gi, Nang èq he-ngìk pyám é hui luî,
Nang èq hkâ-nhám le a bun lô é bang nghut akô.
6 Nàng gi, ngo lé,
tuq tuq chut luî, nìk dik é dong achuq má,
nyhi to bê nghut ri.
7 Nàng nhikmó-yô é hkyô gi,
ngo lé gyai yhang nhê zìk to mù,
Náng é wuìlhêng pé bànshoq gi,
ngo lé bàt ûm to bê nghut ri. Sela
8 Nàng gi, ngò chyit dik é luzúm wuî lé,
shuî yu pyám mù, ngo lé, yhángmòq èq
chaq pyâm é byù dùt nhâng bê nghut ri.
Ngò gi, lhûng tô é hui mù,
a wó hpang lùt lo nghut ri.
9 Ngá é myòqjí gi, iyon yon luî,
myhám myhám dùt byùq bê nghut ri.
Yhûmsîng Garai ê, ngò gi,
nyí wuî Nang lé wùt dûng nyi lhê;
Náng é hí má ngá lòq lhâm nyi lhê.
10 Nàng gi, shi byùq bê bang lé,
Náng é maúhpo múzó tûn shit râ lhú?
Shi byùq bê bang gi,
Nang lé toq hkya-on kôrâ lhú? Sela
11 Náng é chyitdàp myìt lé,
lùpdùng má taí kôrâ lhú?
Náng é jujúm hkyô lé,
htên byòq hkyô jowò má,
taí kôrâ lhú?
12 Náng é maúhpo hkyô lé,
mauchut tuq dùt é jowò má wó sé râ lhú?
Nàng kut é díngmán hkyô lé,
tô-myhî pyám sê é jowò má wó sé râ lhú?
13 Nghut kôlhang, Yhûmsîng Garai ê,
ngò gi, Nang lé garúm wùt dûng lhê;
nàpsûn lé, ngá é kyûdung dang gi,
Náng é hí má jé hkyang nyi ri.
14 Yhûmsîng Garai ê,
Nàng gi, haî mù,
ngo lé he-ngìk pyám luî,
Náng é myòqdong,
ngá chyáng mai haq pyâm lhê lhú?
15 Ngò gi, tiq ashî hkûn mai,
hpuzô nyì luî, shi byùq râ í dùt é nghut lhê.
Ngò gi, Nàng kyuq é hui zô nyì luî,
myìt htûm byùq é nghut lhê.
16 Náng é nhikmó-yo hkyô gi,
ngo lé nhê kyop luî,
Nàng kyuq é hkyô gi,
ngo lé lhoqhtên pyám bê nghut ri.
17 Haû gi, ngo lé,
wuìwúm su ûm lhîng to luî,
ngo lé hup yhang nghop to bê nghut ri.
18 Nàng gi, ngá é byìnzùm wuì eq,
ngá é luzúm wuî lé,
ngá chyáng mai shuî yu pyám byi mù,
mauchut za, ngá é luzúm gê dùt nyì bê nghut ri.