Dawiq é kyûdung dang.
Garúm Yû Râ Matú Kyûdûng É Dang
86
Yhûmsîng Garai ê,ngò gi, myùng sû eq
asho awuî é sû nghut é yánmai,
ngá dang lé gyo mù, tu byi aq.
2 Ngò gi, Nang lé gyùq hkúnggâ nyi é nghut mù,
ngá é chyungxe lé ùpzúng yû laq.
Nàng gi, ngá é Garai Gasang nghut mù, Nang lé lùmhkau nyi é,
Náng é duìnhâng zoshâng ngo lé,
hkyi yù laq.
3 Yhûmsîng ê, ngò gi, Náng lé,
nyí nyí buì buì wùt dûng nyi é nghut mù,
ngo lé shogyo nhikmyîn yù laq.
4 Yhûmsîng ê,
ngá é myìt nhiklhum gi,
Nang lé myìt tuî nyi é nghut mù,
Náng é duìnhâng zoshâng lé,
gabú hkyô byi aq.
5 Yhûmsîng ê, Nàng gi,
gè Sû nghut mù,
mara hkyut byî ri;
Nang lé wùt dung bang bànshoq lé,
Nàng, jeju mó byî nyi é nghut ri.
6 Yhûmsîng Garai ê,
ngá é kyûdung dang lé gyô yù byi laq;
shogyo nhikmyîn yù râ matú,
ngò wùt dûng ngau é dang lé,
gyo byi laq.
7 Nàng gi, ngo lé tu byi râ nghut é yánmai,
ngò wuîhke huî é buìnyì má,
Nang lé ngò wùt dung râ nghut lhê.
8 Yhûmsîng ê, garaî pé má
Nang lé wó whuî é a nyì;
Nàng kut é múzó lé,
wó whuî é múzó pé le a jòq nghut ri.
9 Yhûmsîng ê,
Nàng hpan tô é byù myû bànshoq gi,
Náng é hí má lé mù,
Nang lé noqkuq kôrâ nghut lhê;
yhángmòq gi, Náng é myìng lé,
hkya-on wàq toq kôrâ nghut lhê.
10 Hkâsu mù gâ le, Nàng gi,
hkìkhkâm Sû nghut mù,
maúhpo múzó pé kut Sû nghut ri;
Nàng za Garai Gasang nghut ri.
11 Yhûmsîng Garai ê,
ngo lé Náng hkyô mhoq byi laq;
haú hkûn, ngò gi,
Náng é tengmán hkyô dông,
nyì yàp râ nghut lhê;
ngò gi, Náng é myìng lé,
sê gyùq hkúngga sháng gàq,
Nang lé za myìt zìng zùq nhâng laq.
12 Ngá é Garai Gasang nghut é haû Yhûmsîng Garai ê,
ngò gi, ngá é i‑myìt nhiklhum bànshoq èq
Nang lé hkya-on mù,
Náng é myìng lé, ahtum abyùq,
hkya-on wàq toq nyî râ nghut lhê.
13 Hkâsu mù gâ le,
Náng é chyitdàp myìt mó gi,
ngá chyáng jé bê nghut mù,
Nàng gi, nìk é mosumhkung mai,
ngo lé hkyi yù bê nghut ri.
14 Garai Gasang ê,
nghutbûn é bang ngo lé htim kômù,
Nang lé haî su a ngam é
awu ahtûn é bang gi,
ngá é chyungxe lé ho nyi akô nghut ri.
15 Nghut kôlhang, Yhûmsîng ê,
Nàng gi, shogyo nhikmyîn é eq,
jeju byî é Garai Gasang nghut luî,
luì za nhikjum a yô é za,
chyitdàp myìt byíng é eq,
jujúm é Sû nghut ri.
16 Ngá chyáng lhing tau mù,
ngo lé shogyo nhikmyîn yù laq;
Náng é duìnhâng zoshâng lé wum-o byi mù,
Náng é duìnhâng zoshâng myiwê é
yùqzo ngo lé hkyi yù laq.
17 Ngá é gye pé wó myâng mù,
hoq hpû bùm kó sháng gàq,
Nàng ge é alhô agàn ngo lé shit àq;
hkâsu mù gâ le, Yhûmsîng Garai ê,
Nàng gi, ngo lé garúm yû mù,
nhiktíng byî é nghut ri.