Htêyung ushuq kut su é matú. Kora é yhang zô pê é jidang.
Mîngdán Nguì Ngón Râ Matú Kyûdûng É Dang
85
Yhûmsîng Garai ê,Nàng gi, Náng é maumyî lé,
shogyo nhikmyin myìt shit mù,
Yakup up mâ é shúm zûng bang lé,
dum taû hkyi yù bê nghut ri.
2 Nàng gi, Náng é byu pé lé,
mara hkyut byi luî,
Yhángmòq é yubàk mara bànshoq lé,
nghop pyám byi bê nghut ri. Sela
3 Nàng gi, Náng é nhikmó-yo hkyô bànshoq lé, tô pyám mù,
Nàng nhikjum mó yô é lé,
lhoqyom pyám bê nghut ri.
4 Ngá-mòq lé hkyi yù Sû Garai Gasang ê,
ngá-mòq lé hí lhê su dum dùt nhâng luî,
Nàng, ngá-mòq lé a ngui é i‑myìt lé,
tô pyám aq.
5 Nàng gi, ngá-mòq lé,
ahtum abyùq nhikjum ru yô nyì shirâ lhú?
Nàng, ngá-mòq lé nhik-yô é hkyô gi,
pyàt bán hkangmó ru joq nyî shirâ lhú?
6 Náng é byu pé,
Náng chyáng wó gabú nyî râ matú,
Nàng, ngá-mòq lé dum duì nhâng râ a nghut lhí?
7 Yhûmsîng Garai ê,
Náng é ru gîng nyi é chyitdàp myìt, ngá-mòq lé shit mù,
Náng é hkyi yù hkyô hpóng byi laq.
8 Ngò gi, Garai Gasang,
haû Yhûmsîng Garai haî taî lo é lé, gyo râ nghut lhê;
Yhang gi, sân-yúng bang nghut é,
Yhâng é byu pé lé,
nguì ngón hkyô byi râ danghtum htûm tô ri.
Nghut kôlhang, yhángmòq lé,
ngha é hkyô shut a dum tau kó sháng gàq.
9 Gè gè yhang, Yhâng é hpungwup shingkang gi,
ngá-nhûng é maumyî má jòq nyì râ matú,
Yhâng é hkyi yù hkyô gi,
Yhang lé gyùq hkúngga bang eq,
chyáng bê nghut ri.
10 Chyitdàp myìt eq jujúm hkyô gi,
rahá nghut nyî mù,
díngmán hkyô eq nguì ngón hkyô gi,
rading ralhum bo-puq puq lhûm é nghut ri.
11 Jujúm hkyô gi,
myìdàm htoq mai yùq htoq lô mù,
díngmán hkyô gi,
mauhkûng mai wú hkyô kat ri.
12 Haû Yhûmsîng Garai gi,
ge é hkyô byi râ nghut luî,
ngá-nhûng é maumyî má,
kyôshi myang shû yù râ nghut lhê.
13 Díngmán hkyô gi,
Yhâng é hí má so byi mù,
Yhang, hkyîbyè che râ matú,
hkyô hên byî é nghut ri.