Htêyung ushuq kut su é matú. Gihtit tíng bàt mù hkon é, Kora é yhang zô pé é jidang.
Garaî Noqkuq Yhûm Lé Myìt Tuî Nyi É Hkyô
84
Wum-o a-tsam dìk shoq bo Sû Yhûmsîng Garai ê,Náng é nyì jowò gi,
hkâ-í yhang myìt chyit râ su dùt rî-nhung!
2 Ngá é i‑myìt sô gi,
Yhûmsîng Garaî é wânghkaû lé myìt tui luî,
nyì a chyí yàp a chyí dùt nyi ri;
ngá é i‑myìt nhiklhum eq gùngsho gi,
rû dui nyi é Garai Gasang lé,
gabú garû nyi lhê.
3 Ngá é Hkóhkâm eq ngá é Garai Gasang,
wum-o a-tsam dìk shoq bò Sû Yhûmsîng Garai ê,
Náng é kaúgyàp nàm má,
jòhkyáng gi, nyì jang myang hô mù,
kyîshin gi, azo shui râ matú,
sut myang hô bê nghut ri.
4 Náng é yhûm má nyi é bang gi,
hkungsô wó nyi ri;
yhángmòq gi,
Nang lé ru hkya-ôn nyì kôrâ nghut lhê. Sela
5 Náng chyáng wum-o yù mù,
Zi-un bùm ê râ gyung hkyô lé myìt tuî nyi é bang gi,
hkungsô wó nyi ri.
6 Yhángmòq gi, Baka langhkung mai,
laî ló kô é hkûn,
haú jowò lé wuìbúm kut yu akô;
mau mún le,
wuìhtum pé byíng shûn nhâng bê nghut ri.
7 Yhángmòq gi, wum-o dum jàt yù yù kut luî,
Zi-un bùm mâ é Garai Gasâng é hí má jé shoq,
dòq ló bum akô nghut ri.
8 Wum-o a-tsam dìk shoq bò Sû,
Yhûmsîng Garai Gasang ê,
ngá é kyûdung dang lé gyô yù byi aq;
Yakup é Garai Gasang ê,
ngo lé gyo byi aq. Sela
9 Garai Gasang ê,
ngá-mòq é gòlong lé wú aq;
Náng é xû bùt hui sû lé,
chyitdàp myìt mai wú mâgum yù àq.
10 Gótû jowò má,
buìnyì rahkyîng nyí nyi é htoq má,
Náng é wânghkaû má,
ra-nyí myang nyi é gi, je ge ri;
agè ashop bâng é zúm má nyì râ htoq má,
ngá é Garai Gasâng é yhûm má,
hkum zúng sû dùt râ lé je ô nau ri.
11 Hkâsu mù gâ le, Yhûmsîng Garai Gasang gi,
buì eq gòlong nghut nyi ri;
Yhûmsîng Garai gi,
jeju eq xânghpoq nge wó hkyô lé hkyó byî ri;
Yhang gi, jo âng é hkyô cháng bang lé,
ge é hkyô a byi a kut râ nghut lhê.
12 Wum-o a-tsam dìk shoq bò Sû Yhûmsîng Garai ê,
Nang lé lùmhkaû sû gi, hkungsô wó nyi ri.