Htêyung ushuq kut su é matú. Gihtit tíng bàt mù hkon é Asap é jidang.
Wum-o Byî É Garai Gasang Lé Hkya-on Râ Hkyô
81
Ngá-nhûng é wum-o nghut sûGarai Gasang lé,
gabú mahkôn hkôn keq;
Yakup é Garai Gasang lé,
htê mó èq hkya-on keq!
2 Mahkôn hkon hî mù,
chapchéng bàt luî,
ngón é tíng eq sámpyí pé ajà jà bàt mù, hkya-on keq.
3 Lhôxan Lhôsik má le, lhôlíng má le,
ngá-nhûng é poî buìnyì má le,
tut mùt myhíng keq;
4 haû gi, Isira-elaq pê é matú,
târâ wàng hkunmó nghut luî,
Yakup é Garai Gasâng é
târâ hpyit hkyô nghut ri.
5 Ngá-nhúng a sê gyô é myíng,
wó gyô é jowò nghut é
Egutuq ming lé, Yhang dàm byî é hkûn, haú lé, Yosep é matú,
cháng ra târâ ralhum dông
Yhang tô to bê nghut ri.
6 Yhang taî é gi,
“Yhángmòq é gòqsân mâ é wòlai lé,
Ngo yu pyám byi mù, kyáng lé,
yhángmòq é lòq mai hkyô pyám byi bê nghut lhê.
7 Nàng myìt myo myìt chiq é hkûn,
nàng wùt dung mù,
Ngò, nang lé hkyi yù luî,
maugum htê mó mai,
nang lé gyo byi bê nghut lhê;
Meriba wuì yàm má,
Ngò, nang lé chyam wú bê nghut lhê. Sela
8 Ngá é byu pé ê, gyô wú keq;
Ngò, núngmòq lé sidìq byi kó lé,
Isira-elaq pé ê, núngmòq,
Ngá dang gyo râ lé,
Ngò ô nau ri!
9 Núngmòq chyáng gótû hparà ge nyì râ a nghut;
gó-mîng hparà lé ge noqkuq râ a nghut.
10 Ngò gi, Egutuq ming mai,
núngmòq lé shuî htoq lo é
núngmòq é Garai Gasang,
haû Yhûmsîng Garai nghut lhê.
Núngmòq é nhut galhám há keq,
Ngò lhoqpyíng byi râ nghut lhê.
11 Nghut kôlhang, Ngá é byu pé gi,
Ngá é htê lé a gyo kó;
Isira-elaq byu pé gi,
Ngá é dang lé haî su a ngàm kut akô.
12 Haû mù, Ngò gi,
yhángmòq myìt sôn tô é hkyô má,
cháng kôrâ matú, yhángmòq lé
myìt htân nhâng bê nghut lhê.
13 Ngá é byu pé, Ngá é dang lé gyo mù,
Isira-elaq pé, Ngá é hkyô lé,
cháng kô é ru nghut le gi,
14 yhángmòq é gye pé lé,
han dik é dông ùp zing pyám mù,
Ngá é lòq gi, yhángmòq é gumlau gye pé lé,
htim berâ za nghut lhê!
15 Hau Yhûmsîng Garai lé
a naù a wôm é bang gi,
Yhâng é hí má gyùq kyum byùq kôrâ;
yhángmòq hui zo râ ihkyùp gi,
ahtum abyùq nghut nyî râ nghut lhê.
16 Nghut kôlhang, Ngò gi, núngmòq lé,
ge dik é súngso èq hku baú mù,
lungmó zîng mâ é byô‑i èq,
nhik lhoqdìk byi râ nghut lhê.” gâ ri.