Htêyung ushuq kut su é matú. “Dangshikaq tô é htupbó ban” htê má cháng mù, Asap kat é jihkyang dang.
Mîngdán Dum Wó Xuq Râ Matú Kyûdûng É Dang
80
Sau hpúng lé su Yosep lé hkyô shuî-û é,Isira-elaq lé zúng Sû ê,
ngá-mòq lé gyo byi laq;
hkerubim gyoro má zùng Sû ê,
2 Ehprim, Ben-yamin eq Manase pé hí má, dùq bó byi aq.
Náng é wum-o a-tsam mó lhoqhtoq mù,
ngá-mòq lé lé hkyi yù àq.
3 Garai Gasang ê,
ngá-mòq lé, hí lhê su taû dùt nhâng laq;
ngá-mòq hkyi yu é wó hui sháng gàq,
Náng é myòqdong,
ngá-mòq é ahtoq má dùq bó byî nyì àq.
4 Wum-o a-tsam dìk shoq bò Sû,
Yhûmsîng Garai Gasang ê,
Náng é byu pé kyûdûng é dang lé,
hkâ-myháng jé shoq,
Nàng nhikjum yô nyì râ lhú?
5 Nàng gi, ngaùbyi ngaùnhap lé,
zang dông kut luî, yhángmòq lé byi tso mù,
hkoq mó mai ngaùbyi myo shoq
shuq nhâng bê nghut ri.
6 Nàng gi, ngá-mòq lé,
ngá-mòq é yhûmkyochâng pé mai,
dangnyhin nyhîn kún jowò kut pyám mù,
ngá-mòq é gye pé gi,
ngá-mòq lé rhoi pyâm akô nghut ri.
7 Wum-o a-tsam dìk shoq bò Sû Garai Gasang ê,
ngá-mòq lé hí lhê su taû dùt nhâng laq;
ngá-mòq hkyi yu é wó hui sháng gàq,
Náng é myòqdong,
ngá-mòq é ahtoq má dùq bó byi aq.
8 Nàng gi, Egutuq ming mai,
Náng é byù nghut é tsibyiq ragàm yu lò mù,
gótû byù myû lé hkat htoq pyám luî,
tsibyiq gâm haú lé hô tô bê nghut ri.
9 Hau é jowò lé Nàng byin gông pyám byi mù,
agàm haû gi, a-myìt chín luî,
ra-mau gón byíng zan to bê nghut ri.
10 Bùm pé gi,
hau é buìshûm ô má nghut nyî mù,
kyám gâm mó pé gi,
hau é akoq èq nghop tô é nghut ri.
11 Hau é akoq pé gi, wuimaua jé shoq,
hau é a‑nyùq pé gi, wuì mób lâng jé shoq, kô lam ló bê nghut ri.
12 Nàng gi, laî ló é bang bànshoq,
haû mâ é tsibyiq wó hpyoq yû râ matú,
haú má kyâm tô é xêwâm lé,
haî mù hpyoq hpyi pyâm lhê lhú?
13 Sik mó yô mâ é wàqte pé,
haú lé dû bùt zô pyám mù,
yòso mâ é tân jung gaunyhaú pé,
haú lé zô pyâm akô nghut ri.
14 Wum-o a-tsam dìk shoq bò Sû Garai Gasang ê,
ngá-mòq chyáng taû lhing lò mù,
mauhkûng mai wú hkyô kat àq!
Tsibyiq nuî shî lé rago lé wú aq.
15 Hau é a-pûn lé gi,
Nàng, lòqyo lòq èq hô tô é nghut mù,
hau é akoq lé gi, Náng é matú,
wum-o lhoqkîng yù àq.
16 Náng é tsibyiq nuì haû zân hpyit pyâm é hui luî,
myî èq nyhê hkyô pyâm é hui bê;
Náng é byu pé gi, Nàng nhik-yô é yánmai,
htûm ló byùq bê nghut ri.
17 Náng é lòq gi,
Náng é lòqyo hkyam mâ é sû,
haû Nàng hku kô é
byu yhang zô é ahtoq má,
jòq nyì sháng gàq.
18 Haú hkûn, ngá-mòq gi,
Náng chyáng mai lhing ló byùq râ a nghut;
ngá-mòq lé chyungxe duì nhâng àq,
haû jáng, ngá-mòq gi,
Náng é myìng lé lang râ nghut lhê.
19 Wum-o a-tsam dìk shoq bò Sû, Yhûmsîng Garai Gasang ê,
ngá-mòq lé hí lhê su taû dùt nhâng laq;
ngá-mòq hkyi yu é wó hui sháng gàq,
Náng é myòqdong,
ngá-mòq é ahtoq má dùq bó byi aq.