Asap é jidang.
A-myû Zo Wuî Hkyi Yù Hui Râ Matú Kyûdûng É Hkyô
79
Garai Gasang ê, maigan byu pé gi,Nàng hkyin tô é silî wunlî mau má chyîn wàng mù,
Náng é chyoiyúng noqkuq yhûm lé,
agòt a-û kut pyám luî, Yerusalem wà mó lé,
hpyoq hpyi bum zang pyám bekô nghut ri.
2 Yhángmòq gi,
Náng é duìnhâng zoshâng wui é màng lé,
maulat nghoqzô pê é zoshuq kut pyám mù,
Náng é sân-yúng bâng é gùngsho lé,
myìdàm htoq mâ é tân jung yòsô zè pê é zoshuq
kut pyám bekô nghut ri.
3 Yhángmòq gi, Náng byu pê é sui lé,
Yerusalem wà mó lhînghkyùq má wuì su yuì nhâng mù,
màng myhup râ byù lháng rayùq le a nyì nghut ri.
4 Ngá-mòq gi, yhûmkyochâng èq
lùmù gànsang é hui bang eq,
awui ayàm mâ é bâng èq
rhoi é eq wuìzuì kut pyám byî é hui bang,
dùt byùq bê nghut ri.
5 Yhûmsîng Garai ê, shí hkyô hkâ-myháng jé dùt nyì râ lhú?
Nàng gi, ahtum abyùq nhikjum yô nyì râ lhú?
Náng é manôn myìt gi, hkâ-myháng jé shoq,
myi su nyé nyî râ lhú?
6 Nang lé a sê é byù myû wui htoq má le,
Náng myîng lé a dàt lâng é mîngdán pê htoq má le,
Náng é nhikmó-yo hkyô hut gyun aq;
7 hkâsu mù gâ le, haú bang gi,
Yakup lé myui pyám kômù,
yhâng é yhum mau lé,
lhoqhtên pyám bekô nghut ri.
8 Îchyí îwâ pê é marâ é yánmai,
ngá-mòq lé mara dam hkâbyi;
Náng é shogyo nhikmyîn myìt mai,
ngá-mòq lé hân lé te yù àq;
hkâsu mù gâ le, ngá-mòq gi,
asho awui yhang dùt nyì bê nghut ri.
9 Ngá-mòq é hkyi yù Sû, Garai Gasang ê,
Náng myîng xânghpoq nge wó râ matú,
ngá-mòq lé garúm yû laq;
Náng mying é yánmai,
ngá-mòq lé hkyi yù mù,
ngá-mòq é mara lé hkyut pyám byi aq.
10 Haî mù luî, maigan a-myû wuì mai,
“Yhángmòq é Garai Gasang gi, hká má?” ga taí kôrâ lhú?
Ngá-mòq é hí má yhang,
Náng é duìnhâng zoshâng wui é
sui lhoqshûn bang lé,
Nàng lató hpuq é hkyô,
haû maigan a-myû wuì lé sé nhâng àq.
11 Htóng lúng bâng é myìt nò-kying htê gi,
Náng é hí má jé hkyâng sháng gàq;
shî râ mara byî é hui bang lé,
Náng é wum-o bo é lòqbú èq mâgum yù àq.
12 Yhûmsîng ê,
Nang lé lùmù gànsang é
ngá-mòq é yhûmkyochang pé lé,
yhángmòq é tanghkoí má,
nyhit tú yhang mara dam byi aq.
13 Haú hkûn,
Náng é no‑mhan yò mâ é sau nghut é,
Náng é byu pé ngá-mòq gi,
Nang lé ahtum abyùq hkya-on râ;
Nang lé hkya-ôn é dang lé,
pyàt bán hkangmó,
ngá-mòq taî nyì râ nghut lhê.