Masiki tíng bàt luî taî é Asap é hpàqchyî dang.
Garai Gasang Eq Yhang É A-myû Zo Wuî
78
Ngá é byu pé ê,ngò mhoqshit é dang lé gyô yù keq;
ngá é nhut mai htoq é dang lé gyo keq.
2-3 Ngò gi, ngá-nhûng é îchyí îwâ pé mai,
ngá-nhúng lé taî kyo mù,
ngá-nhúng wó gyo wó sê tô é,
a‑nham mai haq tô é hkyô pé lé,
taî htoq kyo mù,
ngá é nhuthkum hpóng luî,
dangtú dông taí râ nghut lhê.
4 Ngá-mòq gi, haú pé lé,
yhángmòq é zodù wui hí má haq to râ a nghut;
ngá-mòq gi, Yhûmsîng Garai kut é,
hkya-on gíng é múzó lé le, Yhâng é a-tsam lé le,
Yhang kut é maúhpo múzó lé le,
jé lô râ pyàt bán bang lé,
taî kyô nyì râ nghut lhê.
5 Yhang gi, Yakup é matú cháng ra târâ byi mù,
Isira-elaq byu pê é matú,
jep é târâ byî to bê nghut ri.
Yhang gi, ngá-nhûng é îchyí îwa mai,
yhûmsing é zodù wuì lé,
haú pé mhoq byi râ matú,
yhángmòq lé hkunmó hkyô to bê nghut ri.
6 Haû gi, htang lhê pyàt bán bang le,
a hku lé shî é zodù wuì le, wó sé luî,
yhángmòq é zodù wuì lé,
dum wó xoq taî kyo râ matú nghut ri.
7 Haú hkûn, yhángmòq gi,
Garai Gasang lé lùmhkaû mù,
Yhang kut é múzó lé a tô-myhî é za,
Yhâng é hkunmó lé wó cháng râ nghut lhê.
8 Yhángmòq gi,
myìt htan é eq gumlau toq é byù nghut é,
yhángmòq é îchyí îwâ pé su a dùt kôrâ nghut lhê.
Haú bang gi, yhûmsing é myìt mai,
Garai Gasang lé rago a lùm kô é htoq agó,
yhûmsing é sô mai le,
Yhang lé a jujúm kó nghut ri.
9 Ehprim byu pé gi,
lai myoshi gyèzè chûng kôlhang,
majan buìnyì má zùt hpang ló byùq kô é nghut ri;
10 yhángmòq gi, Garai Gasang tô tô é,
dangshikaq lé le a cháng,
Yhâng é târâ dông chyungxe dui râ lé le,
he-ngìk pyâm akô nghut ri.
11 Yhángmòq gi, Yhang kut laî é hkyô nghut é,
Yhang tûn shit é maúhpo múzó lé le,
tô-myhî pyâm akô nghut ri.
12 Yhang gi, Egutuq mau mâ é Zo-an pá má,
yhángmòq é îchyí îwâ pê é hí má,
maúhpo alhô agàn kut shit é nghut ri.
13 Yhang gi, wuìlàng lé í hkyam byáng gam hkoq mù,
wuì lé, xêwâm mó suyhang,
gingtíng shoq shap to luî,
yhángmòq lé haú mai shuî laî byìt é nghut ri;
14 Yhang gi, yhángmòq lé,
nyí má mhut èq shuî û yù mù,
myín lé gi, ra-myin mau,
myîsham èq myòq myàng byî é dông, shuî û yu é nghut ri.
15 Yhang gi, yòso má,
Lungmó Zîng lé bàt hkoq mù,
wuimau su myô é wuì,
yhángmòq lé agùn agó wuì byi huq é nghut ri;
16 Yhang gi, lùq bùm mai wuìbúm htoq nhâng mù,
wuìlàng suyhang yuì nhang ri.
17 Nghut kôlhang, yhángmòq gi,
mara xoq kut shut nyî kômù, yòso má,
Myhang Htáng Sû lé gumlau toq akô nghut ri.
18 Yhángmòq gi, yhángmòq mùt shit nyi é zoshuq lé
dûng é dông, Garai Gasang lé,
shi-ngé ngé chyam wú akô nghut ri.
19 Yhángmòq, Garai Gasang lé,
htuqhtíng dang taí kô é gi,
“Yòso má, Garai Gasang,
zangbó wó htûng byi râ lhú?
20 Yhang, lungmó zîng lé bàt kat jáng,
wuì mó yui htoq lô mù,
agùn agó wó yui é nghut ri.
Nghut kôlhang, Yhang gi,
zoshuq le wó byi râ lhú?
Yhâng é byu pé lé,
sho wó lajang byi râ lhú?”
gâ akô nghut ri.
21 Haû Yhûmsîng Garai gi,
haú lé wó gyo jáng,
gyai yhang nhik-yô ri;
Yakup chyáng gi, myi nyé nhâng luî, Isira-elaq pê chyáng gi,
Yhâng é nhikmó-yo hkyô jé nhâng bê nghut ri;
22 hkâsu mù gâ le, yhángmòq gi,
Garai Gasang lé a jíng é htoq agó,
Yhâng é hkyi yù hkyô lé a lùm kó nghut ri.
23 Nghut kôle, Yhang gi,
ahtoq maulat lé hkunmó hkyó mù,
mauhkûng hkum pé hpóng byî ri;
24 yhángmòq zo râ matú,
mannaq mùk wo hkyó byi nhâng mù,
yhángmòq lé mauhkûng mâ é zoshuq byî ri.
25 Yhángmòq gi, maumâng pê é zoshuq zô akô;
Yhang gi, yhángmòq ge zô é zoshuq bànshoq,
yhángmòq lé byî ri.
26 Yhang gi, mauhkûng mâ é,
buìhtoq hkyam laì lé nhang htoq kat mù,
Yhâng é a-tsâm èq maupyî laì lé shuî lo ri.
27 Yhang gi, yhángmòq ahtoq má,
sho lé, hpuílhup su myo shoq,
wo hkyó byi nhâng mù,
dâng wún é nghoq pé lé,
wuimau yàm mâ é se-muî su myo shoq, wo hkyó byí nhang ri.
28 Haú pé gi, yhángmòq nô yu nyi é
jowò hkaû mâ é,
yhángmòq é zúm lhînghkyùq má
ló gyó ri.
29 Yhángmòq gi, mùt shit nyi é eq rajung za,
Yhang byi bê nghut é yánmai,
gyi gyi dau dau myàng zô bum bekô nghut ri.
30 Nghut kôlhang,
Yhángmòq mùt shit é hkyô nhik a dìk shi-má,
yhángmòq é nhut má lháng,
zoshuq ru lúng tô ashî le,
31 Garai Gasang gi,
yhángmòq lé nhikjum yo luî,
yhángmòq chyáng mâ é
wum je bo é bang nghut é,
Isira-elaq mâ é zorâm wuì lé,
sat pyám bê nghut ri.
32 Haú pé bànshoq htûng hui zo kôlhang,
yhángmòq gi, mara xoq kut nyi akô;
Yhâng é maúhpo múzó tûn shit kôlhang,
yhángmòq gi, a lùmjíng kó nghut ri.
33 Haû mù, Yhang gi,
yhángmòq é buìnyì pé lé,
akôm má htûm byùq nhâng mù,
yhángmòq é zànwut pé lé,
gyùq chiq hpo má,
htûm ló byùq nhâng bê nghut ri.
34 Yhángmòq mâ é ra-am lé,
Garai Gasang sat pyám hkangmó,
yhángmòq gi, Yhang lé hô mù,
Yhâng chyáng lhing taû lo akô nghut ri.
35 Haû Garai Gasang gi,
yhángmòq é Lungmó Zîng nghut é hkyô lé le,
Myhang htáng Garai Gasang gi,
yhángmòq lé Hkyi yù Sû nghut é lé le,
yhángmòq myìtbûn akô nghut ri.
36 Nghut kôlhang, yhángmòq gi,
yhángmòq é nhut mai,
Yhang lé taî ngón kômù,
yhángmòq é nhutshô mai,
Yhang lé mhaû akô nghut ri.
37 Yhángmòq gi,
yhángmòq é myìt nhiklhum mai,
Yhang lé a jujúm kó;
Yhâng é dangshikaq lé le,
jujúm râ myìt a bò kó nghut ri.
38 Nghut kôlhang, Yhang gi,
shogyo nhikmyin myìt bò mù,
yhángmòq é yubàk mara lé,
mara hkyut byi luî,
yhángmòq lé a lhoqhtên pyám nghut ri.
Yhang nhik-yô nau é i‑myìt lé,
adàm dàm hkûm zing pyám mù,
Yhâng é nhikmó-yo hkyô lé,
lhoqzîm pyâm é nghut ri.
39 Yhángmòq gi,
xângzo gùngsho za nghut é lé le,
mùt ló byùq luî a dum taû lo é,
laì zo su za nghut é lé le,
Yhang bûn byî ri.
40 Yhángmòq gi,
yòso má Yhang lé gumlau toq kômù,
tô pyâm tô é maumyî má,
Yhang lé lhoqyón é,
gyai yhang myo bekô nhung!
41 Yhángmòq gi, Garai Gasang lé,
dum chyam wú wú kut kôluî,
Isira-elaq é Chyoiyúng Sû lé,
nhik lhoqyô akô nghut ri.
42 Yhángmòq gi, Yhâng é hpungwup a-tsam shit é,
zìk zo bâng chyáng mai,
yhángmòq lé hkyi yu é buìnyì lé le,
43 Egutuq ming má,
Yhâng é maúhpo alhô agàn tûn shit luî, Zo-an jowò má,
Yhâng é maúhpo múzó tûn shit é buìnyì lé le,
a bûn byùq kó nghut ri.
44 Yhang gi, Egutuq byu pé wuì a wó shuq loshoq,
yhángmòq é wuìlàng pé lé sui dut nhang é nghut ri.
45 Yhang gi, yhángmòq lé pat râ mhoq jûm eq,
yhángmòq lé lhoqhtên pyám râ po pé lé, nhang kat é nghut ri.
46 Yhángmòq é hôwa lé gi,
bau jûm lé hkê pyám nhâng mù,
yhángmòq wó shû yu tô é zè lé gi,
dinggám pé lé zô pyám nhang é nghut ri.
47 Yhang gi, yhángmòq é tsibyiq gâm pé lé,
lìkwo èq lhoqhtên pyám mù,
yhángmòq é hkohúm gâm pé lé,
gyô èq lhoqsat pyám é nghut ri.
48 Yhángmòq é no myang lé gi,
lìkwo èq lhoqsat nhâng mù,
yhángmòq é sau bainám lé gi,
maulhap hpyat é èq,
lhoqsat pyâm é nghut ri.
49 Yhang gi, Yhâng é nhikjum mó yo hkyô, nhikmó-yo hkyô,
nhik hko zô é hkyô eq,
achyî a-ku nyì wuî é hkyô pé lé,
lhoqhten lhoqhpyoq é maumang jùm lé su,
yhángmòq chyáng nhang kat ri.
50 Yhang gi, yhángmòq lé,
shî râ mai a hkyi yu é za,
Yhang nhikjum yô é lé jâng shit mù,
wúm htûng hui zo râ matú,
àp pyâm bê nghut ri.
51 Yhang gi, Egutuq mâ é
zo-mún bànshoq lé le,
Ham é zúm mâ é
wúm bo u wó é zo-mún pé lé le,
sat pyâm é nghut ri.
52 Nghut kôlhang, Yhâng é byu pé lé gi,
sau bainám hpúng lé su,
shuî htoq lô mù,
sau zô pé lé zúng é su,
yòso mai shuî-û laî ló é nghut ri.
53 Yhang gi, yhángmòq lé gau shoq shuî-u luî,
yhángmòq gi, a gyùq kó;
yhángmòq é gye pé lé kúm gi,
wuimau mó hkaû má,
myùp shi pyám nhâng bê nghut ri.
54 Haú dông mai, Yhang gi, yhángmòq lé,
Yhâng é chyoiyúng maumyî maukyo jé shoq le,
Yhâng é lòqyo lòq èq wó yu tô é,
bum mau jé shoq le,
shuî jé ló é nghut ri.
55 Yhang gi, haú mâ é byù myû wuì lé
yhángmòq é hí mai hkat htoq pyám byi luî,
haú bâng é maumyî lé,
silî wunlî dông yhángmòq lé byi mù,
haú bâng é zúm pé má,
Isira-elaq é byù myû up hkangmó lé nyì nhang ri.
56 Nghut kôlhang, yhángmòq gi,
Myhang Htáng Sû Garai Gasang lé,
chyam wú mù, gumlau toq akô;
Yhâng é cháng ra târâ lé le,
a cháng kó nghut ri.
57 Yhángmòq gi, Yhángmòq é îchyí îwâ pé kut é su,
a lùmhkaû kô é eq lùmjíng myìt a bò kó nghut ri;
a díng é lai su, a wó lum é bang nghut akô.
58 Yhángmòq gi, yhángmòq noqkuq é myhang é jowò pê èq,
Yhang lé nhikjum lhoqyo nhâng mù,
yhángmòq é hparà hpôlhô pê èq,
Yhang lé manôn nhang akô nghut ri.
59 Garai Gasang gi,
haú hkyô pé lé wó gyo jáng,
gyai yhang nhikjum yo mù,
Isira-elaq byu pé bànshoq lé,
he-ngìk pyám bê nghut ri.
60 Yhang gi, byu pê chyáng,
Yhang saî tô é zúm nghut é,
Shilo wà mó mâ é sàksé zúm lé,
tô pyám bê nghut ri.
61 Yhang gi, Yhâng é a-tsam bo é
sàksé dò lé, shúm dông àp pyám mù,
Yhâng é hpungwup shingkang lé,
gye pê é lòq má àp byî pyám bê nghut ri.
62 Yhang gi, Yhâng é byu pé lé,
sham èq sat hui râ matú àp pyám mù,
Yhâng é silî wunlî nghut é byu pé lé,
gyai yhang nhikjum mó yô nyi ri.
63 Yhángmòq é zorâm wuì gi,
myî èq nyhê sat pyâm é hui luî,
yhángmòq é zo-myi wuî gi,
yhángmòq é myiháng mahkôn pé a wó gyo lo kó nghut ri;
64 yhángmòq é hkyangjông pé gi,
sham èq sat pyâm é hui kôle,
yhángmòq é chuimó myhî pé gi,
ngaù hkyang a myang sâng kó nghut ri.
65 Haú hkûn, Yhûmsîng gi,
yhup ngón nyi é mai bûn gyîng lo é su le,
tsibyiq wing shuq wùt sû gyîng lo é su le,
bûn gyîng lò bê nghut ri.
66 Yhang gi, Yhâng é gye pé lé nhuq luî,
zùt tau nhâng mù, yhángmòq lé,
ahtum abyùq hoq hpu nhâng bê nghut ri.
67 Hau htâng, Yhang gi,
Yosep é zúm lé he-ngìk pyám mù,
Ehprim up lé a hkyin yù nghut ri.
68 Nghut kôlhang, Yudaq up eq
Yhang chyitdàp é Zi-un bùm lé gi,
Yhang hkyin yu ri.
69 Yhang gi, myhang é jowò lé su kut le,
ahtum abyùq gîng nyi é myìdàm htoq lé su kut le,
Yhâng é chyoiyúng yhûm saî tô ri.
70 Yhang gi, Yhâng é duìnhâng zoshâng Dawiq lé,
sau hpúng mai hkyin htoq yû mù,
71 Yhâng é byù Yakup lé le,
Yhâng é silî wunlî Isira-elaq lé le,
zúng sû dùt râ matú,
sau zúng nyi é mai shuî yù bê nghut ri.
72 Dawiq gi, yhángmòq lé,
myìt díng é dông mai zúng mù,
hpàqchyî bo é lòq èq shuî-u bê nghut ri.