Htêyung ushuq kut sû Yeduhtun é matú. Asap é jidang.
Myìt Myo Myìt Chiq U Lhê É Nhiktíng Dang
77
Ngò gi, ngo lé garúm yû râ matú,Garai Gasang lé wùt dûng é nghut lhê;
ngò gi, Garai Gasang lé wùt dung jáng,
Yhang gi, ngo lé gyo byi râ nghut lhê.
2 Ngò gi, myìt myo myìt chiq huî é hkûn,
Yhûmsîng lé ho é nghut lhê;
ngò gi, ra myin mau lòq tû mù,
kyûdûng le,
ngá é i‑myìt nhiklhum gi,
nhiktíng byi râ lé a hàp yù nghut ri.
3 Garai Gasang ê, ngò gi,
Nang lé myìtbun mù,
i‑myìt nò-kying kyîng é nghut lhê;
ngò gi, rago myìt tû wú é hkûn,
ngá é sô chut mòq ló byùq ri. Sela
4 Nàng gi, ngo lé myòq a chum nhâng kut tô ri;
ngò gi, dang a wó taí loshoq jamjaû nyi ri.
5 Ngò gi, laî ló bê buìnyì pé eq,
góhkun lhê é zànwut pé lé,
taû myìt wú é nghut lhê.
6 Ngò gi, myín lé hkon é
ngá é mahkôn lé myìtbûn ri.
Ngá i‑myìt gi, rago za myìt wú luî,
ngá é sô gi,
yhûmsing gùng yhûmsîng myî wú é u lé,
7 “Haû Yhûmsîng gi,
ngo lé ahtum abyùq he-ngìk pyám râ lhú?
Yhang gi, ngo lé,
Yhâng é myòqnhô ngelang,
hkâ-nhám le a shit lo râ lhú?
8 Yhâng é ru gîng nyi é chyitdàp myìt gi,
ahtum abyùq byùq ló byùq bê lhú?
Yhang htûm tô é danghtum gi,
pyàt pyàt zaí zaí htên ló byùq râ lhú?
9 Garai Gasang gi, shogyo nhikmyin râ matú,
tô-myhî pyám bê lhú?
Yhang gi, nhikjum yo luî,
Yhâng é shogyo myìt lé,
hkûm zing pyám bê lhú?”
nghu é nghut lhê. Sela
10 Haû mù, ngò myìt é gi,
“Myhang Htáng Su é lòqyo lòq nghut é
a-tsam htaî byùq é yánmai,
ngò hpuzô nyi ri.”
nghu é nghut lhê.
11 Ngò gi, Yhûmsîng Garai kut é múzó lé
myìtbûn nyì râ nghut lhê;
gè gè yhang, ngò gi,
góhkun lhê é Náng é maúhpo alhô agàn lé,
myìtbûn nyì râ nghut lhê.
12 Ngò gi, Náng é múzó bànshoq lé,
nìk nìk myìt tû wú mù,
Náng kut é múzó mó bànshoq lé,
myìt wú râ nghut lhê.
13 Garai Gasang ê,
Náng é hkyô pé gi, chyoiyúng nyi ri.
Ngá-nhûng é Garai Gasang su gyaú é gi,
gótû garai nyì lo râ a nghut.
14 Nàng gi, maúhpo alhô agàn kut é Sû, Garai Gasang nghut ri;
Nàng gi, byù myû wui chyáng,
Náng é hpungwup a-tsam tûn shit Sû nghut ri.
15 Nàng gi, Yakup eq,
Yosep é awùt ashín nghut é,
Náng é byu pé lé,
Náng é wum-o bo é lòq èq
hkyi xe yû bê nghut ri. Sela
16 Garai Gasang ê,
wuì pé gi, Nang lé myang ri;
haú pé gi, Nang lé myàng mù,
gyùq dan bum akô;
nìk htâng é jowò mâ é wuì pé le,
gyùq nán bum akô nghut ri.
17 Mhut pé gi, wuì hut hkyô kat mù,
maulat pé gi, maugum gûm lo ri;
Náng é maulhap myoshi pé gi,
ê ê lò lò dâng myha wún bum ri.
18 Náng é maugum gi,
laìdun hkaû má gûm myhíng mù,
Náng é maulhap gi,
mingkan gón má hpyat sân ri;
myìdàm gi, gyùq nán luî, dui nún nyi ri.
19 Náng é hkyô zo gi, wuimau mai laî byìt ri;
Náng é hkyîhkô lé a myàng kôlhang,
Náng é hkyô gi, wuimau mó pé mai laî byìt ri.
20 Nàng gi, Mosheq eq Arun é lòq mai,
Náng é byu pé lé, sau hpúng lé su,
shuî-û yu bê nghut ri.