Dawiq é kyûdung dang.
Agè Ashop Bâng Chyáng Mai Mâgum Yù Râ Hkyô
17
Yhûmsîng Garai ê,
ngá é tengmán dang lé gyo byi laq;
ngá é ngaù htê lé tâm gyo byi laq.
mhaú zo myìt èq a dûng é,
ngá é kyûdung dang lé gyô yù byi laq.
2 Ngò mara a bo é hkyô shit é sàksé shî gi,
Náng chyáng mai lo é nghut sháng gàq;
Náng é myòqjí gi,
jo têng é hkyô lé myang byi sháng gàq.
3 Nàng,
ngá é i‑myìt lé,
chyam gôn wú kôlhang;
Nàng,
myín lé ngo lé,
chyam lìk wú kôlhang;
Nàng,
ngo lé,
jên wú kôlhang;
Nàng gi,
hai mara a myàng nghut ri.
Ngò gi,
ngá é nhut mai,
mara a kut shut râ matú,
myìt hpyit yû bê nghut lhê.
4 Byù kut é hkyîzó lòqzó eq séng luî ga jáng,
ngò gi,
Náng é nhutwuî mai
htoq é dang má cháng luî,
agè ashop bâng é hkyô lé,
ngá gûng ngò koi pyám bê nghut lhê.
5 Ngá é hkyîbyè pé gi,
Náng é hkyô má châng nyì bê nghut lhê.
Ngá é hkyî pé gi,
a nâng chot wú é nghut lhê.
6 Garai Gasang ê,
Nàng gi,
ngo lé gyo byi râ nghut mù,
ngò gi,
Nang lé wùt dûng lhê;
Náng é nohkyap ngá shut hû mù,
ngá é kyûdung dang lé gyo byi aq.
7 Yhángmòq é gye pê é yánmai,
Náng chyáng nghêhkau nyi é bang lé,
Náng é lòqyo lòq èq hkyi yù Sû ê,
Náng é chyitdàp myìt mó lé,
maúhpo dông tûn shit àq.
8-9 Náng é myòqjí lé chun é su,
ngo lé ùpzúng yû laq;
ngo lé htîm é agè ashop bâng chyáng mai le,
ngo lé sat râ ga lóm tô é,
ngá é gye pê chyáng mai le,
ngo lé ùpzúng yû mù,
Náng é dùng ô mâ é buìshûm hkaû má,
haq to laq.
10 Yhángmòq gi,
shogyo nhikmyin myìt lé,
myhî lhûng pyâm to kômù,
nghutbûn é dang lé,
yhángmòq nhut mai taî akô nghut ri.
11 Ngò e ló é hkyô má,
yhángmòq ngo lé myàng kômù,
ahkuî lóm to kôluî,
ngò lé myigùng má dú hkyô pyám râ matú,
láng wú nyi akô nghut ri.
12 Yhángmòq gi,
zò-mut luî,
sho zô nau é hkanghkyi su le,
sho gyám râ matú tsik za haq lúng tô é hkanghkyi râm zo su le
nghut bum akô.
13 Yhûmsîng Garai ê,
toq aq,
yhángmòq é hí má yàp tâng byi mù,
yhángmòq lé lhoqhkyô pyám byi aq;
agè ashop bâng chyáng mai,
Náng é sham èq ngo lé hkyi yù àq.
14 Yhûmsîng Garai ê,
haû sû é bâng chyáng mai le,
shí i-pyàt má za chyûnghuq wó é,
shî mingkan byu pê chyáng mai le,
Náng é lòq èq ngo lé hkyi yù laq.
Nghut kôlhang,
Nàng myìt ngui ô nau é bang lé,
lhoqgyi byi aq.
Yhángmòq lé zodù myo myo wó nhâng luî,
yhángmòq gi,
zoshâng wui matú sùtzè
hkong to byî akô nghut ri.
15 Ngò kúm gi,
ngò díngmán é yánmai,
Náng é myòqdong lé myàng râ nghut lhê;
ngò yhup bûn lo é hkûn,
Náng é gùnghkyâng isâm lé myàng jáng,
ngò gi,
nhik dìk râ nghut lhê.