Dawiq é jihkyang.
Gingtîng É Lùmjíng Myìt Mai Kyûdûng É Dang
16
Garai Gasang ê,
ngo lé ùpzúng byi laq;
hkâsu mù gâ le,
ngò gi,
Nang lé lùmhkau nyi lhê.
2 Ngò gi,
haû Yhûmsîng Garai lé,
“Nàng gi,
ngá é Yhûmsîng;
ngá é matú ngò gè râ hkyô,
Nàng mai lai luî gótû haî a jòq lo.”
nghû,
taí bê nghut lhê.
3 Ngò gi,
myìdàm htoq má nyi é,
sân-yúng bang nghut é,
hpúng bo é bang lé za,
myìt dìk myìt ngui nyi lhê.
4 Gótû hparà pê htâng cháng bâng é,
myìt myo myìt chiq hkyô gi,
myô jàt lò râ nghut lhê.
Yhángmòq é hkungga sui lé,
ngò bo hut hpyun râ a nghut é htoq agó,
yhángmòq é myìng lé le,
ngò lang râ a nghut.
5 Yhûmsîng Garai ê,
Nàng gi,
ngá é silî wunlî gàmbùm eq
ngá é jeju gòm nghut ri;
ngá é i-pyàt gyunghkyô gi,
Náng chyáng mai gaû é hkyô wó yu nyi ri.
6 Ngá é matú nghut é maukyo pé gi,
ngón é jowò má ang râ nghut lhê;
Gè gè yhang,
ngò gi,
gè réng é silî wunlî wó é nghut lhê.
7 Ngò gi,
ngo lé hpàqchyî byî é,
Yhûmsîng Garai lé hkya-on râ nghut lhê;
Myín lé lháng ngá é i‑myìt nhiklhum gi,
ngo lé mhoq byî nyi ri.
8 Ngò gi,
ngá é hí má haû Yhûmsîng Garai lé
ayang nyì nhang to bê nghut lhê.
Yhang gi,
ngá é lòqyo hkyam má,
nghut nyi é yánmai,
ngò gi,
lhoqdui nhûn é hui râ a nghut.
9 Haû mù,
ngá é i‑myìt nhiklhum gi,
gabú nyî luî,
ngá é nhut shô gi,
gabú hkya-ôn nyi ri;
ngá é gùngdu le,
ngón za wó nô yù râ nghut lhê;
10 hkâsu mù gâ le,
Nàng gi,
ngá é sô lé,
mosumhkung má
tô pyâm to râ a nghut é htoq agó,
Náng é chyoiyúng Sû lé,
bùp byùq nhâng râ a nghut.
11 Nàng gi,
ngò chyungxe duì râ hkyô lé,
tûn shit râ nghut lhê;
Nàng gi,
ngo lé,
Náng é hí má
gabú hkyô lhoqpyíng byi râ nghut lhê;
Náng é lòqyo hkyam má gi,
ahtum abyùq nguì ngón hkyô ru joq nyi ri.