Htêyung ushuq kut sû é matú. Yhûmsîng Garai é duìnhâng zoshâng Dawiq é jihkyang. Yhâng é gye pé bànshoq bâng é lòq mai le, Sholuq é lòq mai le, yhang lé Yhûmsîng Garaî èq hkyi xe yu é hkûn, haû Yhûmsîng Garai lé Dawiq hkya-ôn é jihkyang dang.
Ûngmyuq hkyô Wó Mahkôn
18
Yhûmsîng Garai,
ngá é wum-o ê,
ngò gi,
Nang lé chyit ri.
2 Haû Yhûmsîng Garai gi,
ngá é lungmó zîng,
ngá é gaû é gingtíng jowò mó eq
ngo lé hkyi xe yù Sû nghut lhê;
ngá é Garai Gasang gi,
ngò nghêhkau nyi é
ngá é lungmó zîng nghut lhê.
Yhang gi,
ngá é gòlong,
ngá é hkyi yù hkyo é hkyuîa eq
ngá é mâchya mó nghut lhê.
3 Ngò gi,
hkya-on kúngtôn gíng Sû,
Yhûmsîng Garai lé wùt dûng é nghut mù,
ngá é gye pê chyáng mai,
lhoqlhut yu é hui bê nghut lhê.
4 Shî-nò hkyo é tui pé gi,
ngo lé baíyùp tô ri;
htên byòq hkyo é wuìbaù pé gi,
ngá ahtoq mai bàt ûm laî ló ri.
5 Mosumhkûng é tui pé gi,
ngo lé tuî hkông lhîng tô ri;
shî-nò hkyo é lhaí gi,
ngá hí má htung tô ri.
6 Ngò gi,
myìt myo myìt chiq é hkûn,
Yhûmsîng Garai lé wùt é nghut lhê;
ngò gi,
ngo lé garúm yû râ matú,
ngá é Garai Gasang lé wùt dûng é nghut lhê.
Yhâng é noqkuq yhûm mai,
ngá é htê lé Yhang wó gyo bê nghut ri;
ngò wùt dûng é dang Yhâng chyáng jé mù,
Yhâng é no má hkyang ròt ló bê nghut ri.
7 Haú hkûn,
myìdàm gi,
dui nún ri;
bùm pûn bùm wang pé gi,
nún byùq ri;
Yhang nhikjum yô é yánmai,
haú pé gi,
dui nún bûm kô é nghut ri.
8 Yhâng é nhô mai,
myihkau htoq ri;
Yhâng é nhut mai,
dùq nyi é myishâm htoq lô mù,
myigye le haû má gyúng nyi ri.
9 Yhang gi,
mauhkûng lé hpóng mù,
gyó lé ri;
Yhâng é hkyîwa ô má gi,
htu dik é mhut nòq,
jòq tô ri.
10 Yhang gi,
hkerubimb htoq má ji mù,
dâng ri;
Yhang gi,
laì htoq mai,
yang dik é dông dâng ri.
11 Yhang gi,
mauchut lé
Yhâng é haq jowò kut mù,
maulat mâ é tîng tîng nòq é wuì bo é mhut èq,
Yhâng é lhînghkyùq má htup nhang tô ri.
12 Yhâng hí má dùq bang tô é mai,
lìkwò mó eq gyúng é myigye htoq lô mù,
mhut hkaû mai dâng htoq lo ri.
13 Haû Yhûmsîng Garai gi,
mauhkûng mai maugum gûm é su,
dáng nyo ri;
Myhang Htáng Sû gi,
Yhâng é htê lhoqhtoq ri;
lìkwò eq myigye le dâng htoq nyi ri.
14 Yhang gi,
Yhâng é myoshi pé lé bìk kat mù,
haû gye pé lé lhoqpyo pyám;
maulhap mó hpyat nhâng mù,
yhángmòq lé
hpang byo byùq nhâng,
kut bê nghut ri.
15 Yhûmsîng Garai ê,
Nàng nhik-yo mù,
Náng é nhô mai soq mó htoq é hkûn,
wuimau chuq gi,
de de dùt bê nghut mù,
myìdàm é a-pûn awang gi,
achîn dùt to bê nghut ri.
16 Yhang gi,
ahtoq mai jín jé mù,
ngo lé zuî zing to luî,
nìk é wuì hkaû mai,
she htoq yû bê nghut ri.
17 Yhang gi,
ngò a wó ung é wum-o bo dik é
ngá é gye pê chyáng mai le,
ngo lé a ngui é
ngá é gye pê chyáng mai le,
ngo lé hkyi xe yù bê nghut ri.
18 Yhángmòq gi,
ngò wuîhke jamjau mó hui zô é hkûn,
ngo lé htîm akô,
nghut kôlhang,
haû Yhûmsîng Garai gi,
ngo lé htuqbáng byi bê nghut ri.
19 Yhang gi,
ngo lé gyùq chiq jang mai,
shuî htoq yû mù,
gyaí lam é jowò shut,
shuî jé bê nghut ri;
Yhang gi,
ngo lé myìt nguì ô nau é yánmai,
ngo lé hkyi xe yù bê nghut ri.
20 Yhûmsîng Garai gi,
ngò díngmán é lé wú mù,
ngo lé a-kyû byi;
ngá é sansêng é lòqmú lé wú mù,
ngo lé chyûnghuq byi kut bê nghut ri.
21 Hkâsu mù gâ le,
ngò gi,
Yhûmsîng Garaî é hkyô lé
cháng bê;
ngò gi,
ngá é Garai Gasang lé nùnghtáng le a tô pyám,
agè ashop é hkyô le a kut é nghut lhê.
22 Yhâng é târâ pé bànshoq lé,
ngò châng nyì bê nghut lhê;
Yhang hkyô tô é hkunmó pé lé,
ngò gyo bê châng bê nghut lhê.
23 Ngò gi,
Yhâng é hí má,
mara hûn jang a bo é sû nghut mù,
agè ashop hkyô lé koi pyâm é nghut lhê.
24 Haû Yhûmsîng Garai gi,
ngò díngmán é lé wú luî le,
Yhâng é hí má,
ngá é lòqmú sansêng é lé wú luî le,
ngo lé chyûnghuq byi bê nghut ri.
25 Jujúm é sû lé gi,
Náng gûng Nàng jujúm é hkyô lé shit bê;
mara hûn jang a jòq sû lé gi,
Náng gûng Nàng mara hûn jang a jòq é hkyô shit bê nghut ri;
26 sân-yúng é sû lé gi,
Náng gûng Nàng sân-yúng é hkyô lé shit bê;
nghut kôlhang,
myìt goí é sû lé gi,
Nàng htuqhtîng pyâm é hkyô
tûn shit bê nghut ri.
27 Nàng gi,
myìt lhoqnyhûm bang lé
hkyi yù mù,
nghutbun bang lé kúm gi,
lhoqnyhum pyâm ri.
28 Nàng gi,
ngá é myibung lé
dùq nhang nyi ri;
Yhûmsîng Garai,
ngá é Garai gi,
ngá é mauchut lé maubó dùt nhang ri.
29 Ngò gi,
Náng é wum-ô èq,
gyè hpûng mó lé wó ung pyâm lhê;
Ngò gi,
ngá é Garai Gasâng é yánmai,
wàhkûm mó lé wó dòq lùt wang lhê.
30 Garai Gasâng é hkyô gi,
gúmjùp ri;
haû Yhûmsîng Garaî é dang gi,
têng é chyat nghut ri.
Yhang gi,
Yhâng chyáng
nghêhkaû bang bànshoq é matú,
gòlong nghut ri.
31 Hkâsu mù gâ le,
haû Yhûmsîng Garai mai lai luî,
ó yùq wá Garai Gasang nghut lhê lhú?
Ngá-nhûng é Garai Gasang mai lai luî,
ó yùq wá Lungmó Zîng nghut lhê lhú?
32 Garai Gasang haû za,
ngo lé wum-o lhoqkíng byî é htoq agó,
ngá é hkyôwuì má gúmjùp yùqyò nhang ri.
33 Yhang gi,
ngá é hkyî lé,
xat hkyî su dùt nhâng mù,
ngo lé,
myhang é jowò pé má
wó yàp nhang ri.
34 Yhang gi,
ngá é lòq lé,
majân é matú gyèmú mhoq byi luî,
ngò gi,
gyi lé saî tô é lai lé wó lâng htung lhê.
35 Nang gi,
Náng é hkyi yu é gòlong,
ngo lé byi luî,
Náng é lòqyo lòq èq,
ngo lé wùn wàq ri;
Nàng garúm é hkyô gi,
ngo lé kô myhâng nhang ri.
36 Nàng gi,
ngá é hkyîyìn pé,
a lhoqnghuq sháng gàq ga,
ngá é hkyô pé lé lhoqlâm byî ri.
37 Ngò gi,
ngá é gye pé lé châng hkat mù,
yhángmòq lé wó chyup yu é nghut lhê;
yhángmòq lé a wó lhoqhtên pyám pyám gi,
ngò taû lo é a nghut.
38 Ngò gi,
yhángmòq a wó dum toq kó sháng gàq nghû,
yhángmòq lé lhoqhkyop pyám bê nghut mù,
yhángmòq gi,
ngá é hkyîwa má lêng lèq to bekô nghut ri.
39 Nàng gi,
majân é matú,
ngo lé wum-o lhoqkíng byi bê nghut mù,
ngá é gye pé lé,
ngá é hkyîwa ô má tô to byi bê nghut ri.
40 Nàng gi,
ngá é gye pé lé ngá chyáng mai
nùnghtáng lhik mù hpâng nhâng bê nghut ri;
ngò gi,
ngo lé a nguì bang lé,
lhoqhtên pyám bê nghut lhê.
41 Yhángmòq gi,
garúm wùt dûng akô;
nghut kôlhang,
yhángmòq lé hkyi yù byù a nyì nghut ri;
yhángmòq gi,
Yhûmsîng Garai lé
wùt dung kôlhang,
Yhang gi,
a tu byi nghut ri.
42 Ngò gi,
laì mâ é hpuílhup lé su,
yhángmòq lé bàt mhun pyám bê nghut lhê;
ngò gi,
hkyô mâ é ga-po lé su,
yhángmòq lé hut hkyô pyám bê nghut lhê.
43 Nàng gi,
ngo lé,
gumlau byu pê chyáng mai hkyi htoq yû mù,
byù myû wui é ushuq kut nhang to bê nghut lhê;
ngò a sê é byu pé gi,
ngo lé dójaú akô nghut ri.
44 Yhángmòq gi,
ngá é dang lé wó gyo eq yhang,
châng kut akô nghut ri;
byù bíng pé gi,
ngá é hí má,
gyùq kyûm ngóm gòp bum akô nghut ri.
45 Yhángmòq bànshoq bang gi,
myìt wum gyuî byùq kômù,
yhángmòq é gingtîng é gyèdap mai,
gyùq nán é èq htoq lé lo akô nghut ri.
46 Haû Yhûmsîng Garai gi,
dui nyi ri ô!
Ngá é Lungmó Zîng gi,
hkya-on hui sháng gàq ô!
Ngo lé hkyi yu é Sû Garai Gasang gi,
hkya-on wàq toq hui sháng gàq ô!
47 Yhang gi,
ngá é matú lató hpuq byi Sû,
byù myû wuì lé ngá é a‑ô má tô tô é Sû,
48 ngá é gye pê chyáng mai,
ngo lé hkyi yù Sû Garai Gasang nghut ri.
Nàng gi,
ngá é gye pê htoq má,
ngo lé lhoqtoq lhoqmyhang to bê nghut ri;
Nàng gi,
gyai ashop bâng chyáng mai,
ngo lé hkyi xe yù bê nghut ri.
49 Haû mù luî,
Yhûmsîng Garai ê,
ngò gi,
byù myû wui pê hí má,
Nang lé hkya-on râ nghut lhê;
Ngò gi,
Náng é myìng lé,
hkya-on mahkôn hkôn râ nghut lhê.
50 Yhang gi,
Yhang hkyin tô é hkóhkâm lé,
ûngmyuq hkyô mó pé byî ri;
Yhang gi,
Yhâng é namngón xû bùt byî é dông
hkyin yu é Dawiq lé le,
Dawiq é awùt ashîn pé lé le,
ahtum abyùq é shogyo nhikmyin hkyô,
tûn shit é nghut ri.