Htêyung ushuq kut su é matú. Dawiq é jidang.
Byu Pê É Agè Ashop Hkyô
14
Byù ngòk gi,
yhâng é i‑myìt hkaû má,
“Garai Gasang a nyì.”
ga taî ri.
Haû sû é bang gi,
htên byòq byùq bê nghut luî,
yhángmòq é hkyô gi,
achaq achyut nghut nyi ri;
ge é hkyô kut é byù,
rayùq le a nyì nghut ri.
2 Haû Yhûmsîng Garai gi,
xângzo byu pê chyáng
sê gyô é u-nuq bo é byù nyi lhê làq ga le,
Garai Gasang lé ho é bang nyi lhê làq ga le,
mauhkûng mai yhángmòq chyáng
wú hkyô kat ri.
3 Nghut kôle,
yùq hkangmó gi,
yhik ló byùq bekô nghut mù,
yhángmòq gi,
htên byòq é bang,
dùt bùm bekô nghut ri;
ge é hkyô kut é byù a nyì,
rayùq lháng a nyì nghut ri.
4 Mùk lé zô é su,
Ngá é byu pé lé
zô myui pyâm nyì kômù,
Yhûmsîng Garai lé a wùt dûng é,
haû agè ashop hkyô kut é bang gi,
hkâ-nhám le a wó mhoq sê yu jung nghut lhê lhí?
5 Garai Gasang gi,
díngmán bang eq rahá nyi nyi é yánmai,
agè ashop bang gi,
gyùq chiq mó hui kôrâ nghut lhê.
6 Agè ashop kut bang núngmòq gi,
asho awuî é bang hen tô é lé,
myìt wum lhoqshûn nhang akô;
nghut kôlhang,
haû Yhûmsîng Garai gi,
yhángmòq é nghêhkaû jang nghut ri.
7 Isira-elaq a-myû wui é matú hkyi yù hkyô gi,
Zi-un bùm mai htoq lô sháng gàq ô!
Haû Yhûmsîng Garai gi,
Yhâng é byu pé lé,
dum nyì ngón yùqyò nhang é hkûn,
Yakup é awùt ashín gi,
gabú byam chyu mù,
Isira-elaq byu pé gi,
gabú myìt ngui nyì kó sháng gàq ô!