Htêyung ushuq kut su é matú. Tíng tui shit hkat bàt mù hkon é, Dawiq é jidang.
Garúm Yû Râ Matú Kyûdûng É Dang
12
Yhûmsîng Garai ê,
garúm yû laq.
Hkâsu mù gâ le,
târâ hkúngga bang a nyì lo kó;
Jujúm lùmlùq bang gi,
byu pê chyáng mai htûm ló byùq bekô nghut ri.
2 Yùq hkangmó gi,
yhángmòq é yhûmkyochang lé,
mhaú dang taî akô;
Yhángmòq é gyáng nau é nhutwuî gi,
mhaú zo dang taî akô nghut ri.
3 Haû Yhûmsîng Garai gi,
gyáng nau é nhutwuî bànshoq eq
nghutbûn é nhutshô hkangmó lé,
yâm hpyit pyám sháng gàq.
4 Yhángmòq taí kô é gi,
“Ngá-mòq gi,
ngá-mòq é nhutshô mai,
ûngmyuq râ nghut lhê;
ngá-mòq é nhutwuî pé lé,
ngá-mòq yhang sing lhê;
Ó yùq wá,
ngá-mòq é yhûmsîng
nghut lhê lhú?”
ga akô.
5 Haû Yhûmsîng Garai kúm gi,
“Asho awui zìk zo hui bâng é yánmai le,
ra châ nyì bâng é yón ngaû hte é yánmai le,
Ngò ahkuî toq mù,
yhángmòq myìt ô nau nyi é gaû é jowò má,
yhángmòq lé nyhi to râ nghut lhê.”
ga taî ri.
6 Haû Yhûmsîng Garaî é dang gi,
tengmán sansêng é dang nghut mù,
myi bunghkyûng má,
nyhit dâm yhang jên yù bê ngùn su yhang nghut nyi ri.
7 Yhûmsîng Garai ê,
Nàng gi,
ngá-mòq lé gau shoq
nyhi to râ nghut é htoq agó,
Agè ashop é i-pyàt shî mai ngá-mòq lé ahtum abyùq
wú mâgum yù râ nghut lhê.
8 Hkâsu mù ga le,
agè ashop é hkyô gi,
byu pê hí má hkúnggâ é hui jáng,
a târa é bang gi,
jowò hkangmó má,
nghutbûn jón wún akô nghut ri.