Garai Garúm Yû Râ Matú Kyûdûng É Hkyô
10
Yhûmsîng Garai ê,
Nàng gi,
haî mù luî we we má yàp tô lhê lhú?
Wuîhke jamjau huî nyi é u má,
Nang gi,
haî mù luî haq nyi lhê lhú?
2 Haû agè ashop sû gi,
yhang nghutbûn é yánmai,
asho awuî é bang lé châng hkat hkyut ri.
Haú yùq gi,
yhang htung tô é lhaí má myí sháng gàq.
3 Haû agè ashop sû gi,
yhâng é myìt yùt yùt ô nau é má,
taî nghutbûn nyi ri;
yhang gi,
myòqnòq bang lé,
shimân dang taí byi mù,
Yhûmsîng Garai lé gi,
tô pyâm tô ri.
4 Haû agè ashop sû gi,
nghutbûn é myìt bò mù,
Garai lé a hô nghut ri;
yhang myìt é hkyô bànshoq má,
Garai Gasang a nyì gâ ri.
5 Yhang kut é bànshoq gi,
ûngmyuq é chyat nghut ri;
yhang gi,
Náng é târâ jéyáng hkyô lé,
haî su a ngàm nghut ri;
yhang gi,
yhâng é gye pé bànshoq lé,
wú rhoi pyâm ri.
6 Yhang gi,
yhûmsing gùng yhûmsîng,
“Ngo lé hai eq le
wó lhoqdui nhún râ a nghut;
ngò gi,
ayang gabú nyî luî,
hkâ-nhám le wuîhke hkyô hui râ a nghut.”
ga taî ri.
7 Yhâng é nhut má gi,
nhing myíng nhing htê,
mhaú htê eq kyuq htê baú byíng tô ri;
yhâng é nhut shô ô má gi,
wuîhke hkyô eq agè ashop hkyô bo nyi ri.
8 Yhang gi,
wà yàm pé má
haq láng zung tô ri;
yhang gi,
haq gyám é jang má
mara a bò bang lé sat ri;
garúm râ byù a nyi é bang lé,
hpuzo nhâng râ matú haq wú zùq nyi ri.
9 Yhang gi,
lùqhkyûng má
hkanghkyi láng nyi é su,
haq láng nyi ri;
yhang láng nyi é gi,
garúm râ byù a nyi é bang lé
chyup yû râ matú nghut ri.
Yhang gi,
haû bang lé chyup yû mù,
yhâng é gùn mai she hkyut ló ri.
10 Haû hpuzô é bang gi,
nhê hkyop é hui kômù,
lèq gyòp kôluî,
yhâng é wum-o a-tsam ô má,
lêng lèq to bê nghut ri.
11 Yhang gi,
yhâng é myìt má,
“Garai Gasang gi,
haî le a kut nghut ri;
Yhang gi,
Yhâng é myòq lé,
nghop pyâm tô lhê nghut mù,
hkâ-nhám le myang é a nghut.”
ga taî ri.
12 Yhûmsîng Garai ê,
toq àq!
Garai Gasang ê,
Náng é lòq tû àq.a
Garúm râ byù a nyi é bang lé,
hkâ tô-myhî pyám ô.
13 Haû agè ashop sû gi,
haî mù luî,
Garai Gasang lé he-ngìk pyâm lhê làq?
“Yhang gi,
ngò râ é lé myî choq râ a nghut.”
ga yhânggùng yhang
haî mù taî nyi lhê làq?
14 Nghut kôlhang,
Garai Gasang ê,
Nàng gi,
wuîhke hkyô eq yón kuq hkyô lé,
myàng byi bê nghut mù,
haú lé myìt byi luî,
garúm yû râ nghut lhê.
Haû hpuzô nyì sû gi,
Nang lé lùmhkau ri;
Nàng gi,
îwa a wó é chuízô pé lé,
garúm yû Sû nghut ri.
15 Haû agè ashop su é lòqbú lé,
lhoqhkyuî pyám byi aq;
yhang kut é agè ashop hkyô lé,
haî lháng a myìt to loshoq,
Nàng myî choq àq.
16 Haû Yhûmsîng Garai gi,
ahtum abyùq hkóhkâm nghut nyi ri;
haû tûngbaù pé gi,
Yhâng é maumyî mai,
htûm byùq kôrâ nghut lhê.
17 Yhûmsîng Garai ê,
haû myìt nyhûm bang ô nau é hkyô lé,
Nàng wó gyô ri;
Nàng gi,
yhángmòq lé myìt wum byi mù,
yhángmòq é wùt dung htê lé,
gyo byî ri.
18 Náng gi,
îwa a wó é chuízô pé eq
zìk zo huî é bang lé hûng yu nyi ri.
Haû gi,
myìdàm byu pé
a ge kyuq zo lo râ matú nghut ri.