Htêyung ushuq kut su é matú. Mulaben htêyung dông hkon é, Dawiq é jidang.
Târâ Ràp-rá É Garai Gasang Lé Hkya-ôn É Dang
9
Yhûmsîng Garai ê,
ngò gi,
ngá é i‑myìt nhiklhum bànshoq èq
Nang lé hkya-on râ nghut lhê;
ngò gi,
Náng é maúhpo hkyô pé bànshoq lé
taî pyô râ nghut lhê.
2 Ngò gi,
Náng é yánmai,
gabú nguì ngón râ nghut lhê;
Myhang htáng Sû ê,
ngò gi,
Náng é myìng lé,
hkya-on mahkôn hkôn râ nghut lhê.
3 Ngá é gye pé zùt taû ló kô é hkûn,
yhángmòq gi,
Náng é hí má lèqbàt mù,
htên byòq byùq bekô nghut ri.
4 Hkâsu mù gâ le,
Nàng gi,
ngò jô é hkyam shut bo yàp mù,
târâ jéyáng byi bê nghut ri;
Nàng gi,
Náng é tángmyhâng má zùng mù,
díngmán é dông târâ jéyáng nyi ri.
5 Nàng gi,
byù myû pé lé tan mù,
agè ashop bang lé
lhoqhtên pyám bê nghut ri;
Nàng gi,
yhángmòq é myìng lé
ahtum abyùq bùt sut pyám byi bê nghut ri.
6 Haû gye pé gi,
ahtum abyùq htên byòq hkyô má,
byùq ló byùq bekô nghut ri;
Nàng gi,
yhángmòq é wà mó pé lé,
hpyoq pyám bê nghut mù,
haû pé lé bun râ hkyô lháng,
haî a jòq lo nghut ri.
7 Nghut kôlhang,
haû Yhûmsîng Garai gi,
ahtum abyùq ùp nyi é nghut mù,
târâ jéyáng râ matú,
Yhâng é hkóhkâm tángmyhâng lé,
hen to bê nghut ri.
8 Yhang gi,
haû mingkan lé
díngmán é dông jéyáng râ nghut lhê;
Yhang gi,
haû byù myû wuì lé
târâ ràp-rá é dông ùp râ nghut lhê.
9 Yhûmsîng Garai gi,
haû zìk zo hui bâng é matú
nghêhkaû jang,
wuîhke jamjau huî u lhê é
mâchya mó nghut ri.
10 Yhûmsîng Garai ê,
haû Náng é myìng lé rago sé bang gi,
Nang lé lùmhkaû râ nghut lhê;
hkâsu mù gâ le,
Nang lé hô bang lé,
Nàng gi,
hkâ-nhám le pyâm to sû a nghut.
11 Haû Zi-una má ùp nyi é Yhûmsîng Garai lé,
hkya-on mahkôn hkôn keq;
Yhang kut é múzó pé lé,
byù myû wui chyáng taî pyô keq.
12 Hkâsu mù gâ le,
sui yuichyîn lé lató hpuq Sû gi,
yhángmòq lé myìtbun mù,
nhikngê bâng é ngaù htê lé,
tô-myhî pyâm é a nghut.
13 Yhûmsîng Garai ê,
ngá é gye pê èq ngo lé hkâsu kut zing-rî é lé myàng byi laq!
Ngo lé shogyo nhikmyin mù,
hau shî‑nò hkyo é hkúmdong mai lhoqtoq yû laq;
14 haû jáng,
ngò gi,
byìzo Zi-unb é hkúmdong má,
Nang lé wó hkya-ôn shit mù,
Náng é hkyi yù hkyo é yánmai,
wó gabú byam chyû shit râ nghut lhê.
15 Haû byù myû pé gi,
yhûmsîng dû é dong má,
byìt gyó bekô;
yhángmòq haq htung tô é lhaí má,
yhángmòq é hkyî myí bekô nghut ri.
16 Haû Yhûmsîng Garai gi,
târâ ràp-rá hkyô lé,
Yhânggùng yhang shit bê nghut ri.
Haû agè ashop é bang gi,
yhûmsing é lòq múzó pé má,
myí bum akô nghut ri.
Higayunc.
Sela
17 Haû agè ashop é bang nghut é,
Garai Gasang lé tô-myhî pyâm é,
byù myû bànshoq bang gi,
mosumhkung shut gyó kôrâ nghut lhê.
18 Nghut kôlhang,
asho awui dùt bang lé,
ayang tô-myhî pyám râ a nghut;
wuîhke hui bâng é myòqbyù hkyô le,
ayang htên byòq byùq râ a nghut.
19 Toq aq,
Yhûmsîng Garai ê,
byu pé lé hkâ-ûng nhâng;
haû byù myû wuì gi,
Náng é myòq hí má,
târâ jéyáng é hui kó sháng gàq.
20 Yhûmsîng Garai ê,
yhángmòq lé kyuq nhán aq;
haû byù myû wuì lé,
Yhángmòq gi,
byù za nghut é hkyô lé sé nhâng àq.
Sela