Htêyung ushuq kut su é matú. Gihtit bàt mù hkon é, Dawiq é jidang.
Garaî Hpungwup Shingkang Eq Byu É Xânghpoq Nge Wó Hkyô
8
Yhûmsîng Garai, ngá-mòq é Yhûmsîng ê,Náng é myìng gi, myìdàm gón má
hkâ-í yhang kô myhang nyi ri myhî-nhung!
Nàng gi, Náng é hpungwup shingkang lé,
mauhkûng htoq má
lhoqhtoq shit to bê nghut ri.
2 Náng é gye pê é yánmai,
haû gyè kut sû eq lató hpuq sû lé,
lhoqzîm pyám râ matú,
Nàng gi, zoshâng wuì eq zonú pê é nhut má,
wum-o a-tsam kat byi bê nghut ri.
3 Ngò gi, Náng é lòqmú nghut é,
Náng é mauhkûng lé le,
Nàng jòq nhang tô é lha-mó eq kyî pé lé le,
myìt tû wú é hkûn,
4 byù gi, haî wá nghut mù,
Nàng, yhang lé bûn nyi lhê lhú?
Byu yhang zo gi, haî wá nghut mù,
Nàng, yhang lé wú gôn nyi lhê lhú?
5 Nàng gi, yhang lé,
Garai Gasâng htoq ra-tsuí lhoqnyhûm mù,
hpungwup shingkang bò nhang é eq xânghpoq nge wó
nhâng bê nghut ri.
6 Nàng gi, Náng é lòqmú pé lé,
yhang lé ùp nhâng mù,
jung hkang jung mó lé,
yhâng é hkyîwa ô má tô to byi bê nghut ri.
7 Haú pé gi, sau bainám pé eq
no myang bànshoq, yòsô zè pé,
8 maulat má dâng é nghoqzô pé eq,
wuì má lúng é ngozô pé,
wuiming shut yông lhing wún é pé,
bànshoq nghut ri.
9 Yhûmsîng Garai, ngá-mòq é Yhûmsîng ê,
Náng é myìng gi, myìdàm gón má
hkâ-í yhang kô myhang nyi ri myhî-nhung!