Ben-yamin byù Hkusha eq séng luî, haû Yhûmsîng Garai lé Dawiq hkon é jihkyang.
Târâ Ràp-rá Râ Matú Kyûdûng É Hkyô
7
Ngá é Garai Gasang nghut é, Yhûmsîng Garai ê,ngò gi, Náng chyáng nghêhkau nyi lhê;
ngo lé hkat hkyut é bànshoq bâng chyáng mai
hkyi yù xe yù laq ô;
2 haû a nghut jáng, yhángmòq gi,
hkanghkyi su ngo le lâng myha pyám mù,
ó lháng a wó hkyi xe yù loshoq,
ngo lé ajàp azo lâng cheq pyám kôrâ nghut lhê.
3 Ngá é Garai Gasang nghut é, Yhûmsîng Garai ê,
ngò rajung jung kut shut é nghut jáng,
ngá é lòq má mara dàp é nghut jáng,
4 ngò eq nguì ngón nyî sû lé,
ngò agè ashop hkyô kut é nghut jáng,
ngá é gyè lé, ngò jumjíng má
zìk lú yu pyâm é nghut jáng,
5 haû gye pé gi, ngo lé
wó châng hkat chyup yû kó sháng gàq;
ngá é chyungxe lé
myigùng má nâng pyeq pyám kômù,
ngá é gùngsôm lé
hpuílhup yô má hkyô pyám kó sháng gàq. Sela
6 Yhûmsîng Garai ê,
nhikjum yô é èq toq àq!
Ngá é gye pê é nhikmó-yô é hkyô lé,
htuqhtíng byi laq.
Ngá é Garai Gasang ê,
ngo lé toq garúm yû làq;
târâ ràp-rá hkyô Nàng kut byi laq.
7 Haû byù hpûng pé lé,
Náng é lhînghkyùq má zîng to nhâng mù,
yhángmòq lé myhang é jang mai ùp nyì àq.
8 Haû Yhûmsîng Garai gi, byu pé lé jéyáng ri.
Yhûmsîng Garai ê,
ngá é díngmán hkyô má cháng mù,
ngo lé jéyáng aq;
Myhang htáng htum Sû ê,
ngá é jujúm sanséng myìt má cháng mù, ngo lé jéyáng aq.
9 Myìt é hkyô eq i‑myìt nhiklhum lé,
chyam wú Sû díngmán é Garai Gasang ê,
haû agè ashop bâng é lú lhum bàt zìk hkyô lé,
lhoqhtûm pyám mù,
haû díngmán sû lé,
gau shoq nyì nhâng laq.
10 I‑myìt díngmán é sû lé,
hkyi yù Sû Garai Gasang gi,
ngá é gòlong nghut ri.
11 Garai Gasang gi,
díngmán é târâ agyì nghut mù,
nyí wuî Yhâng é nhikmó-yo hkyô lé,
tûn shit Sû le nghut ri.
12 Byù rayùq yùq myìt a lhing é nghut jáng, Garai Gasang gi,
Yhâng é shâm lé suî htoq mù,
Yhâng é lai lé wìng luî,
lâng htung to râ nghut lhê.
13 Yhang gi, shî nhâng làknàk
hen to bê nghut ri;
Yhang gi, myi duq é lai myoshi lé
rì rì kut bê nghut ri.
14 Haû agè ashop hkyô lé,
zogûng su wun to mù,
wuîhke hkyô lé,
wam su bùt chûng sû gi,
mhaû é hkyô lé hku htoq kat ri.
15 Góyùq byìt gyó râ matú,
nìk shoq dong du sû gi,
yhang dû dong má yhang gyó ri.
16 Yhang kut htoq é agè ashop hkyô gi,
yhâng ulhum má dum taû jé mù,
Yhâng é lú lhum bàt zìk hkyô gi,
yhâng é ují lagùng má dum taû gyó ri.
17 Ngò gi, haû Yhûmsîng Garai lé,
Yhâng é díngmán hkyo é yánmai,
jeju hkya-on râ nghut lhê;
Ngò gi, haû Myhang htâng é,
Yhûmsîng Garaî é myìng lé,
hkya-on mahkôn hkôn râ nghut lhê.